Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 26

Le Luʼumaʼ yaan u suʼutul paraísoi

Le Luʼumaʼ yaan u suʼutul paraísoi

Yéetel le Reino yaan tu kʼab Cristooʼ, Jéeobaeʼ yaan u kiliʼichkúuntik u kʼaabaʼ, yaan u xuʼulsik le baʼaloʼob kʼaastakoʼ yéetel yaan u yeʼesik chéen tiʼ letiʼ yaan u derechoi u gobernar

APOCALIPSIS, u tsʼook libroi le Bibliaoʼ, ku líiʼsik u yóol tuláakal máak. Le libroaʼ tsʼíibtaʼab tumen apóstol Juan, letiʼeʼ tsʼaʼab u yil baʼaxoʼob ku taal kʼiinil u yúuchul, le profecíaʼob ku taaskoʼ ku yeʼesik bix ken u béeykuntil Jéeoba le baʼax u tukulmaj u beetkoʼ.

Teʼ yáax náay tsʼaʼab u yiloʼ, tu yilaj Jesús táan u líiʼsik u yóol yéetel táan u tsolik u nuʼuk tiʼ u jaats múuchʼuliloʼob. Teʼ tuláakʼ náayoʼ tu yilaj u trono Dios yaan teʼ kaʼanoʼ bey xan le máaxoʼob tsʼáaik nojbeʼenil tiʼ teʼ kaʼanoʼ.

Ka náatsʼ u kʼiinil u láaj béeykuntik Dios le baʼaxoʼob u tukulmoʼ, tiʼ le Taman wa Jesucristooʼ tsʼaʼab upʼéel rollo yaan siete u selloiloʼob. Ka tu wachʼaj Jesús le yáax kampʼéeloʼ, Juaneʼ tu yilaj u jóokʼol kantúul máakoʼob u natʼmaj u tsiimnoʼob. Le yáaxoʼ Jesús, letiʼeʼ tsʼoʼok u tsʼaʼabal u beet u Reyil yéetel u natʼmaj utúul sak tsíimin. Le uláakʼ óoxtúul máakoʼoboʼ u natʼmoʼob tsíimnoʼob yaanal u coloril cada utúul, leloʼobaʼ ku chíikbesikoʼob le baʼateltáambaloʼoboʼ, le wiʼijiloʼoboʼ yéetel le yaayaj kʼojaʼaniloʼoboʼ, le baʼaloʼob ku sen ilaʼaloʼob bejlaʼa teʼ yóokʼol kaab jach taʼaytak u xuʼulsaʼal tiʼaʼ. Le ka wachʼaʼab le u siete sellooʼ uʼuyaʼab u paʼaxal siete trompetaʼob, leloʼobaʼ tu chíikbesoʼob bix kun kʼaʼaytbil le castigoʼob ken u taas Diosoʼ. Cada upʼéel tiʼ leloʼobaʼ tu beetoʼob u yantal uláakʼ siete noj yajiloʼob, wa castigoʼob ku tsʼáaik Dios.

Ka tsʼoʼokeʼ, Juaneʼ tu yilaj u síijil utúul chaambal, lelaʼ ku yeʼesikeʼ u Reino Dioseʼ tsʼoʼok u káajal u meyaj teʼ kaʼanoʼ. Yanchaj upʼéel baʼateltáambal teʼ kaʼanoʼ ka puʼul Satanás yéetel u kʼasaʼan angeloʼob way Luʼumeʼ. Ka uʼuyaʼab upʼéel kʼaʼamkach tʼaan táan u yaʼalik: «Óotsiloʼob le máaxoʼob kajaʼanoʼob teʼ luʼumoʼ». ¿Baʼaxten? Tumen le Kʼaasilbaʼaloʼ jach pʼujaʼan, tumen u yojel chéen upʼíit kʼiin pʼaatal tiʼ (Apocalipsis 12:12).

Juaneʼ tu kaʼa ilaj Jesús teʼ kaʼan bey utúul tamaneʼ, tu tséeleʼ tiaʼan 144,000 máakoʼob yéeyaʼanoʼob utiaʼal u reinaroʼob tu yéetel. Chéen tu libroi Apocalipsis k-ilik 144,000 máakoʼob kun táakpajloʼob ichil le chʼiʼibal aʼalaʼanoʼ (Apocalipsis 14:1; 20:6).

Ka tsʼoʼokeʼ, u gobiernoiloʼob le Luʼumaʼ tu muchʼubaʼob utiaʼal le Armagedonoʼ, lelaʼ «u baʼatelil u nojoch kʼiinil» Dios, letiʼobeʼ baʼatelnajoʼob tu contra Jesús, le máax natʼmil le sak tsíiminoʼ, yéetel tu contra le angeloʼob bey xan le 144,000 yéeyaʼanoʼoboʼ. ¿Bix kun tsʼoʼokol le baʼateltáambalaʼ? U gobiernoiloʼob le Luʼumaʼ yaan u xuʼulsaʼaltiʼob yéetel Satanaseʼ yaan u kʼaʼalal. Jesús yéetel le 144,000 yéeyaʼanoʼoboʼ yaan u reinaroʼob yóokʼol le Luʼum ichil mil jaʼaboʼob, ken tsʼoʼokok le mil jaʼaboʼoboʼ, yaan u xuʼulsaʼal xan tiʼ Satanás (Apocalipsis 16:14; 20:4).

¿Baʼax ken u beet Cristo ichil le mil jaʼaboʼob kun reinaroʼ? Juaneʼ ku yaʼalik: «Jajal Dios[eʼ] [yaan u] choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil, tumen tuláakal baʼax yaan kaʼacheʼ tsʼoʼok u máan» (Apocalipsis 21:4). Jeʼex túun k-ilkoʼ, ¡le Luʼumaʼ yaan u suʼutul paraísoi!

Le baʼaxoʼob ku yaʼalik u libroi Apocalipsisoʼ letiʼ chúukbesik tuláakal le baʼaxoʼob ku kaʼansik le Bibliaoʼ: yéetel u Reino Dios yaan tu kʼab Cristooʼ, Jéeobaeʼ yaan u kiliʼichkúuntik u kʼaabaʼ yéetel yaan u chíikbesik chéen tiʼ letiʼ yaan u derechoi utiaʼal u gobernar.

(Chʼaʼabaʼan tu libroi Apocalipsis.)