Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 23

Le bix binik u kʼaʼaytaʼal le maʼalob péektsiloʼ

Le bix binik u kʼaʼaytaʼal le maʼalob péektsiloʼ

Apóstol Pabloeʼ yaʼab úuchik u viajar utiaʼal u kʼaʼaytik u maʼalob péektsilil le Reinooʼ

KA TSʼOʼOK u yokjaʼ Pabloeʼ, jach tu tsʼáaj u yóol u kʼaʼayt u maʼalob péektsilil le Reinooʼ. Baʼaleʼ ka tsʼoʼokeʼ jach chʼaʼapachtaʼabi. Letiʼeʼ yaʼab úuchik u viajar utiaʼal u kʼaʼaytik le Reino kun béeykuntik le baʼaxoʼob u tukulmaj Dios utiaʼal wíinikoʼ.

Teʼ yáax viaje tu beetoʼ, kʼaʼaytajnaj tu kaajil Listra, teʼeloʼ tu tsʼakaj utúul máak móoch desde ka síiji. Le máaxoʼob iloʼ joʼopʼ u yaʼalikoʼobeʼ, Pablo yéetel Bernabé, le máax bin tu yéeteloʼ, diosoʼob. Jach istikia úuchik u yáantkoʼob u naʼatoʼob maʼ unaj u adorartaʼaloʼobiʼ. Baʼaleʼ ka tsʼoʼokeʼ, letiʼobeʼ tu tsʼáajubaʼob tu contra Pablo, ka tu muruxtuntoʼob. Tu tukloʼob kaʼacheʼ tu kíimsoʼob, baʼaleʼ Pabloeʼ maʼ kíimiʼ, maʼ úuch tiʼ leloʼ suunaj Listra utiaʼal u líiʼsik u yóol le disipuloʼoboʼ.

Ka máan kʼiineʼ, le judíoʼob tsaypachtik Cristooʼ, joʼopʼ u yaʼalikoʼobeʼ le maʼ judíoʼoboʼ unaj u beetkoʼob baʼax ku yaʼalik u Ley Moisés. Pablo túuneʼ tu kʼáataj áantaj tiʼ le apostoloʼob yéetel le ancianoʼob yanoʼob Jerusalenoʼ. Letiʼobeʼ tu xakʼaltoʼob le Kiliʼich Tsʼíiboʼoboʼ yéetel tu kʼáatoʼob u yáantaj le kiliʼich muukʼoʼ, ka tsʼoʼokeʼ tu yaʼaloʼob tiʼ le múuchʼuliloʼoboʼ maʼ u adorartkoʼob yaanal diosoʼob, maʼ u jaantkoʼob kʼiʼikʼ mix bakʼ maʼ jóoʼsaʼan u kʼiʼikʼeliʼ yéetel maʼ u núupkʼebantaloʼob. Le baʼaloʼobaʼ «jach kʼaʼabéet» u beetkoʼob, baʼaleʼ maʼ tsaj ka seguernak u beetkoʼob baʼax ku yaʼalik u Ley Moisesiʼ (Beetaʼanoʼob 15:28, 29).

Teʼ tu kaʼapʼéel viajeoʼ, Pabloeʼ bin tu kaajil Berea, upʼéel kaaj yaan tu luʼumil Grecia. Le judíoʼob kajaʼanoʼoboʼ jach séebaʼan úuchik u kʼamikoʼob le maʼalob péektsiloʼ, kex beyoʼ sáamsamal ku xakʼaltkoʼob le Kiliʼich Tsʼíiboʼob utiaʼal u yilkoʼob wa jach jaaj le baʼaxoʼob ku kaʼansaʼaltiʼoboʼ. Maʼ jach úuch tiʼ leloʼ, Pabloeʼ yanchaj u kaʼa púutsʼul tiʼ le máaxoʼob pʼekmiloʼ, ka bin tu kaajil Atenas. Teʼeloʼ, tu táan máakoʼob jach kaʼanchajaʼan u xookoʼobeʼ, tu máansaj upʼéel tsoltʼaan jach maʼalob yéetel jach jatsʼuts.

Ka tsʼoʼok le u yóoxpʼéel viajei u kʼaʼaytajoʼ, Pabloeʼ bin tu kaajil Jerusalén. Ka bin teʼ templooʼ, taakchaj u kíimsaʼal tumen u múuchʼ máakoʼob. Baʼaleʼ u soldadoiloʼob Romaeʼ maʼ tu chaʼajoʼobiʼ, baʼaxeʼ tu bisoʼob u kʼáatchiʼitoʼob. Tumen Pablo sijnáal Romaeʼ, chaʼab u bin u defendertuba tu táan gobernador Félix. Le judíoʼoboʼ maʼ páajchaj u yeʼeskoʼob wa jaaj le baʼaxoʼob ku yaʼalikoʼob tu contraoʼ. Kex beyoʼ, Festo, le máax ook gobernar tu jeel Felixoʼ, u kʼáat kaʼach u kʼubtiʼob. Pablo túuneʼ tu yaʼalaj u kʼáat ka juzgartaʼak tumen César, Festo túuneʼ tu yaʼalajtiʼ: «Yaan a bin tu táan César» (Beetaʼanoʼob 25:11, 12).

Letiʼeʼ yaan kaʼach u juzgartaʼal tu kaajil Roma. Le oʼolal naʼaksaʼab tiʼ upʼéel barco utiaʼal u bisaʼal tak Italia, baʼaleʼ le barcooʼ búuli, ka yanchaj u pʼáatloʼob tu islai Malta tak ka tsʼoʼok u kʼiiniloʼob le keʼeliloʼ. Ka kʼuch Pablo Romaeʼ kajlaj kaʼapʼéel jaʼab tiʼ upʼéel naj tuʼux ku kanáantaʼal tumen le soldadoʼoboʼ. Kex maʼatech u chaʼabal u jóoʼleʼ, maʼ tu chaʼaj u jach lúubul u yóoliʼ, yéetel maʼ xuʼul u kʼaʼaytik le Reino tiʼ tuláakal le máaxoʼob ku binoʼob tu yiknaloʼ.

(Chʼaʼabaʼan tiʼ Beetaʼanoʼob 11:22–28:31.)