Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 21

Jesuseʼ kaʼa kuxkíintaʼabi

Jesuseʼ kaʼa kuxkíintaʼabi

Jesuseʼ tu chíikbesuba tiʼ u disipuloʼob utiaʼal u líiʼsik u yóoloʼob yéetel utiaʼal u yaʼalik baʼax unaj u beetkoʼob

TU YÓOXPʼÉEL kʼiinil kíimik Cristoeʼ, jujuntúul tiʼ le koʼoleloʼob tsaypachtikoʼ binoʼob teʼ tuʼux tsʼaʼab u wíinkliloʼ, baʼaleʼ tu yiloʼobeʼ jeʼekʼab. Luʼsaʼan le tuunich makmiloʼ yéetel minaʼan u wíinklil Jesusiʼ.

Teʼeloʼ chíikpaj kaʼatúul angeloʼobiʼ. Utúul tiʼ letiʼobeʼ tu yaʼalaj: «Teʼexeʼ táan a kaxantikeʼex Jesús [...]. Baʼaleʼ letiʼeʼ tsʼoʼok u kaʼapúut kuxtal» (Marcos 16:6). Tu séebaʼanileʼ, le koʼoleloʼoboʼ bin áalkabil u yaʼaloʼob tiʼ le apostoloʼoboʼ. Teʼ bejoʼ tiʼ tu yiloʼob Jesusiʼ, letiʼeʼ tu yaʼalajtiʼob: «Maʼ a chʼaʼikeʼex sajakil. Xeeneʼex a waʼaleʼex tiʼ in sukuʼunoʼobeʼ unaj u binoʼob tak Galilea, tiʼ [ken] u yilenoʼobiʼ» (Mateo 28:10).

Láayliʼ teʼ kʼiin jeʼeloʼ, kaʼatúul disipuloʼobeʼ lukʼoʼob tu kaajil Jerusalén utiaʼal u binoʼob tu kaajil Emaús. Le táan u binoʼoboʼ náatsʼ tu yiknaloʼob utúul máakeʼ ka tu kʼáatajtiʼob baʼax le ku taal u tsikbaltkoʼoboʼ. Le máakaʼ Jesús, baʼaleʼ maʼ tu jáan kʼaj óoltoʼobiʼ. Yaachajaʼan u yóoloʼobeʼ ka tu yaʼaloʼob táan u taal u tʼaanoʼob yoʼolal Jesús. Le máak túunoʼ joʼopʼ u tsoliktiʼob le baʼax ku yaʼalik le Kiliʼich Tsʼíiboʼob tu yoʼolal le Mesíasoʼ. U jaajileʼ, tiʼ Jesús láaj béeychaj le profecíaʼob tʼaanajoʼob tiʼ le Mesíasoʼ. * Ka tu tsʼáajoʼob cuenta yéetel Cristo ku tʼaanoʼobeʼ, letiʼeʼ saʼat tiʼ letiʼob.

Le kaʼatúul disipuloʼoboʼ suunajoʼob Jerusaleneʼ ka bin u yiloʼob le apostoloʼoboʼ, letiʼobeʼ u kʼalmubaʼob ichil upʼéel cuarto. Le táan u tsikbaltik le kaʼatúul disipuloʼob le baʼax tu yiloʼoboʼ, Jesuseʼ tu chíikbesuba tiʼ le yanoʼoboʼ, ka láaj jaʼakʼ u yóoloʼob. Jesús túuneʼ tu kʼáatajtiʼob: «¿Baʼaxten yaan kaʼapʼéel óolal ta puksiʼikʼaleʼex?». Ka xan tu yaʼalajtiʼob: «Bey tsʼíibaʼanil, le Cristooʼ kʼaʼabéet u mukʼyaj, baʼaleʼ tu yóoxpʼéel kʼiineʼ yaan u kaʼapúut kuxtal ichil le kimenoʼoboʼ» (Lucas 24:38, 46).

Ich cuarenta kʼiinoʼobeʼ Jesuseʼ tu chíikbesuba tiʼ yaʼab máakoʼob. Utéenjeakileʼ ilaʼab tumen maas tiʼ quinientos máakoʼob. Maʼ xaaneʼ, teʼ kʼiin jeʼeloʼ letiʼe ka tu yaʼalaj tiʼ u disipuloʼob: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob; [...] yéetel kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex. Yéetel ojéelteʼexeʼ teneʼ tiʼ yanen ta wéeteleʼex tuláakal kʼiinoʼob tak tu xuul yóokʼol kaab» (Mateo 28:19, 20).

Le u tsʼook utéen ka tu chíikbesuba Jesús tiʼ le once apostoloʼoboʼ, tu yaʼalajtiʼob: «Le ken taalak le kiliʼich [muukʼ] ta wóokʼoleʼexeʼ, yaan a kʼamikeʼex páajtalil utiaʼal ka jóokʼokeʼex a [kʼaʼayteʼex] in kaabaʼ [...] tak [teʼ] kúuchiloʼob yaan tu xuul yóokʼol kaaboʼ» (Beetaʼanoʼob 1:8). Ka tsʼoʼok u yaʼalik lelaʼ ka káaj u bin teʼ kaʼanoʼ, tak ka saʼat ichil upʼéel múuyal.

(Chʼaʼabaʼan tiʼ Mateo capítulo 28, Marcos capítulo 16, Lucas capítulo 24, Juan capítulo 20 yéetel 21 yéetel 1 Corintoiloʼob 15:5, 6.)

^ xóot’ol 3 Jeʼel u páajtal a wilik u maasil profecíaʼob yoʼolal le Mesías béeychajoʼob tiʼ Jesús ku chíikpajal teʼ xook 14, xook 15 yéetel xook 16 tiʼ le folletoaʼ, bey xan le xook yaan teʼ tipʼaʼanil «Jesús, le Mesías aʼalaʼan u taaloʼ» teʼ libro ¿Baʼax jach tu jaajil ku kaʼansik le Bibliaoʼ?.