Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 7

Dioseʼ tu jáalkʼabtaj le israelitaʼoboʼ

Dioseʼ tu jáalkʼabtaj le israelitaʼoboʼ

Jéeobaeʼ tu beetaj u taal noj yajiloʼob tu luʼumil Egipto, yéetel jóoʼsaʼab le israelitaʼob tumen Moisés teʼ luʼum jeʼeloʼ. Dioseʼ tu kʼubaj u Ley tiʼ Moisés

LE ISRAELITAʼOB yanoʼob kaʼach tu luʼumil Egiptooʼ jach yaʼabchajoʼob. Teʼ kʼiinoʼob jeʼeloʼ káaj u gobernar utúul faraón jach kʼasaʼan yéetel maʼ u kʼaj óolmaj Joseiʼ. Le ka tu yilaj tsʼoʼok u yaʼabtal le israelitaʼoboʼ tu yaʼalaj ka palitsiltaʼakoʼob yéetel ka kíimsaʼak le mejen xiʼipalaloʼob ku síijloʼoboʼ. Baʼaleʼ utúul koʼolel israelitaeʼ tu tsʼáaj u chaambal ichil upʼéel chan xaakeʼ ka tu taʼakaj ichil le suʼukoʼob yaan tu jáal u áalkab jaʼi le Nilooʼ. Le ka bin túun u hija faraón teʼ Nilooʼ tu kaxtaj le chaambaloʼ, ka tu tsʼáaj u kʼaabaʼteʼ Moisés, letiʼeʼ tiʼ líikʼ tu yotoch le faraonoʼ.

Ka tu tsʼáaj 40 jaʼaboʼob tiʼ Moiseseʼ tu yoksuba ich upʼéel talmil úuchik u defendertik utúul israelita táan kaʼach u jaʼajaʼatsʼaʼal tumen utúul egipcio, le oʼolal púutsʼi, ka bin kajtal tiʼ upʼéel náanach luʼum. Ka tu tsʼáaj 80 jaʼaboʼob tiʼeʼ, aʼalaʼabtiʼ tumen Dios ka suunak Egipto u yaʼal tiʼ faraón ka u chaʼa u jóokʼol le israelitaʼoboʼ.

Baʼaleʼ Faraoneʼ maʼ tu chaʼaj u bin le israelitaʼoboʼ, le oʼolal Dioseʼ tu beetaj u taal diez noj yajiloʼob tu luʼumil Egipto. Táanil tiʼ u káajal cada upʼéeleʼ, Moiseseʼ ku bin u yaʼal tiʼ faraón baʼax unaj u beetik utiaʼal maʼ u taal le noj yajiloʼ. Baʼaleʼ cada utéen u bineʼ, faraoneʼ ku taaskuba jach noj baʼalil yéetel ku tʼaan tu contra Moisés bey xan tu contra Jéeoba. Teʼ diez noj yajiloʼ Jéeobaeʼ tu túuxtaj utúul ángel utiaʼal ka u kíims tuláakal u yáax paalal le egipcioʼoboʼ. Baʼaleʼ teʼ najoʼob tuʼux bonaʼan u marcoi le joonaʼob yéetel u kʼiʼikʼel utúul chan taman, jeʼex úuchik u yaʼalik Jéeoba ka beetaʼakoʼ, maʼ kíimsaʼab le yáax paalaloʼob tumen le angeloʼ. Utiaʼal túun u kʼaʼajsik le israelitaʼob le baʼax úuchaʼ joʼopʼ u kʼiimbeskoʼob le Pascua cada jaʼaboʼ.

Ka tsʼoʼok u kíimil u hijo faraoneʼ, tu yaʼalaj tiʼ Moisés yéetel tiʼ le israelitaʼob ka jóoʼkoʼob tu luʼumil Egiptooʼ. Tu séebaʼanileʼ, jóokʼoʼobiʼ. Baʼaleʼ faraoneʼ kʼexpaj u tuukul, ka tu muchʼaj tuláakal u soldadoʼob yéetel u carroiloʼob u baʼateleʼ ka bin u chukpachtoʼob utiaʼal u kíimsoʼob. Ka tu chukpachtoʼob tu jáal le Chak kʼáaʼnáaboʼ, tu tuklaj jach maʼ talam ken u kíimsiloʼobiʼ. Baʼaleʼ Jéeobaeʼ tu beetaj u jeʼekʼabpajal upʼéel bej tu chúumuk le kʼáaʼnáab utiaʼal u máan le israelitaʼob tuláakʼ tséeliloʼ. Ka ook le egipcioʼob ichil le kʼáaʼnáab u chukpacht le israelitaʼoboʼ, Dioseʼ tu beetaj u suut u jaʼi le kʼáaʼnáaboʼ ka búul faraón paʼteʼ yéetel u soldadoʼob.

Ka tsʼoʼokeʼ, le israelitaʼoboʼ kʼuchoʼob tu jáal u witsil Sinaí, teʼeloʼ Jéeobaeʼ tu beetaj upʼéel pacto tu yéeteloʼob. Tsʼoʼoleʼ tu kʼubaj u Ley tiʼ Moisés utiaʼal u tsʼáa tiʼ le israelitaʼoboʼ, lelaʼ le kun nuʼuktkoʼob yéetel kun kanáantkoʼob kaʼach ichil u kuxtaloʼob. Tu yaʼalajtiʼobeʼ wa ku beetkoʼob baʼax ku yaʼalikeʼ, maʼ ken u pʼatoʼob yéetel tu yoʼolaloʼobeʼ yaan u kiʼikiʼtʼantik uláakʼ kaajoʼob.

Baʼaleʼ yaʼab tiʼ letiʼobeʼ maʼ tu kʼubaj u yóoloʼob tiʼ Diosiʼ. Le oʼolal letiʼeʼ tu castigartoʼob, tu beetaj u máanoʼob ich cuarenta jaʼaboʼob teʼ desiertooʼ. Ka tsʼoʼokeʼ Moiseseʼ tu tsʼáaj Josué utiaʼal u seguert u nuʼuktik le israelitaʼoboʼ. Bey úuchik u kʼuchloʼob teʼ luʼum u yaʼalmaj Jéeoba u tsʼáaik tiʼ Abrahamoʼ.

(Chʼaʼabaʼan tiʼ Éxodo, Levítico, Números, Deuteronomio, Salmo 136:10-15 yéetel Beetaʼanoʼob 7:17-36.)