Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 19

Upʼéel profecía táan u béeychajal tak teʼ kʼiinoʼobaʼ

Upʼéel profecía táan u béeychajal tak teʼ kʼiinoʼobaʼ

Jesuseʼ tu yaʼalaj baʼax kun eʼesik tsʼoʼok u káajal u reinar yéetel tsʼoʼok u náatsʼal u kʼiinil u xuʼulsaʼal tiʼ le kʼasaʼan yóokʼol kaabaʼ

TEʼ TU puʼukil le Olivoʼob tuʼux bin Jesús yéetel kantúul apostoloʼoboʼ jach chíikaʼan u yilaʼal Jerusalén yéetel le templooʼ. Teʼeloʼ letiʼobeʼ tu kʼáatoʼob tiʼ Jesús ka u tsoltiʼob jujumpʼéel tiʼ le baʼaxoʼob tsʼoʼok u yáax aʼalikoʼ. Letiʼeʼ táant u yaʼaliktiʼobeʼ le templooʼ yaan u xuʼulsaʼaltiʼ, yéetel tsʼoʼok u yáax tʼaan tiʼ u «kʼiiniloʼob u tsʼoʼokol tiʼ u baʼaloʼobil le yóokʼol kaabaʼ» (Mateo 13:40, 49NM). Le oʼolaleʼ tu kʼáatoʼobtiʼ: «¿Baʼax kʼiin ken úuchuk le baʼaloʼobaʼ, yéetel baʼax chíikulal ken u yeʼes way yanecheʼ yéetel táan u taal u tsʼoʼokol tiʼ le yóokʼol kaabaʼ?» (Mateo 24:3NM).

Jesuseʼ tu yaʼalajtiʼob baʼaxoʼob kun úuchul táanil tiʼ u xuʼulsaʼal tiʼ Jerusalén bey xan tiʼ u templo. Baʼaleʼ le baʼax tu yaʼaloʼ, maʼ chéen teʼ kʼiinoʼob kun béeychajal kaʼachoʼ, baʼaxeʼ ken máanak kʼiineʼ tiʼ tuláakal yóokʼol kaab kun ilbil u béeychajal. Utiaʼal u yojéeltaʼal baʼax kʼiin way yaan Cristo tu kaʼatéeneʼ, letiʼeʼ tu yaʼalaj yaan u yilaʼal u yúuchul jejeláas baʼaloʼob tuláakal tuʼux. Le baʼaloʼobaʼ yaan u yeʼeskoʼobeʼ Jéeobaeʼ tsʼoʼok u tsʼáaik Jesús u beet u Reyil tiʼ u Reino yéetel yaan xan u yeʼeskeʼ le Reinoaʼ maʼ kun xáantal ken u luʼs le baʼaloʼob kʼaastak ku beetaʼaloʼ yéetel yaan u beetik u yantal jeetsʼelil tuláakal tuʼux. Le baʼaxoʼob tu yaʼalaj Jesús kun ilbiloʼ yaan u yeʼeskoʼob taʼaytak u xuʼulsaʼal tiʼ le kʼasaʼan yóokʼol kaab paʼteʼ yéetel u religioniloʼoboʼ, u política yéetel tuláakal le baʼaxoʼob ku beetik u kʼasaʼan máakiloʼoboʼ, yéetel yaan xan u yeʼesik taʼaytak u káajal upʼéel túumben yóokʼol kaab.

Jesuseʼ tu yaʼaleʼ ken káajak u gobernar teʼ kaʼanoʼ, yaan u yantal baʼateltáambaloʼob, wiʼijil, u tíitkuba le luʼumoʼ yéetel yaan u yantal yaayaj kʼojaʼaniloʼob tuláakal tuʼux. Yaan xan u yaʼabtal u beetaʼal baʼax kʼaas. Tsʼoʼoleʼ u disipuloʼobeʼ yaan u kʼaʼaytikoʼob tiʼ tuláakal kaajoʼob u maʼalob péektsilil u Reino Dios. Tuláakal lelaʼ yaan u tsʼoʼokol yéetel le «táaj yaʼab muʼyaj» mix utéen ilaʼakoʼ (Mateo 24:21).

¿Bix jeʼel u yojéeltik le cristianoʼob tsʼoʼok u náatsʼal le kʼiin jeʼeloʼ? Jesuseʼ tu yaʼalaj tiʼ u disipuloʼob ka kaambalnakoʼob «tiʼ le higueraoʼ» (Mateo 24:32). Le ken káajak u jóokʼol u kʼuʼukʼ le higueraoʼ ojéelaʼaneʼ tsʼoʼok u náatsʼal u kʼiinil u yichankil le cheʼoboʼ. Le ken ilaʼak xan tuláakal tuʼux táan u yúuchul le baʼaxoʼob tu yaʼalaj Jesusoʼ, yaan u tsʼaʼabal cuentaeʼ tsʼoʼok u náatsʼal le xuʼulsajiloʼ. Baʼaleʼ Jesuseʼ tu yaʼaleʼ chéen u Taata u yojel baʼax kʼiin yéetel baʼax hora ken káajak le «táaj yaʼab muʼyaj[oʼ]». Le oʼolaleʼ tu yaʼalaj: «Pʼil ichneneʼex, [...] tumen maʼ a wojeleʼex baʼax kʼiin ken kʼuchuk u yorailiʼ» (Marcos 13:33).

(Chʼaʼabaʼan tiʼ Mateo capítulo 24 yéetel 25, Marcos capítulo 13 yéetel Lucas capítulo 21.)

^ xóot’ol 14 Utiaʼal a wilik u maasil tiʼ le baʼaxoʼob tu yaʼalaj Jesús kun ilbiloʼ, ilawil le xookil 9 tiʼ le libro ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.