Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 51

Le chan x-chʼúupal áant juntúul soldadooʼ

Le chan x-chʼúupal áant juntúul soldadooʼ

Tu luʼumil Siriaeʼ kajaʼan kaʼach juntúul chan x-chʼúupal israelita náach yanil tiʼ u yotoch bey xan tiʼ u láakʼtsiloʼob. Letiʼeʼ oklaʼab tumen u soldadoiloʼob Siria yéetel beoraaʼ tiʼ ku meyaj tu yotoch u yatan Naamán, u nojchil le soldadoʼoboʼ. Le chan x-chʼúupalaʼ ku adorartik kaʼach Jéeoba, kex le máakoʼob teʼ tuʼux kajaʼan maʼ bey u beetkoʼoboʼ.

Tiʼ Naamaneʼ yaan kaʼach junpʼéel yaayaj kʼojaʼanil tu wíinklil. Le chan x-chʼúupaloʼ taak kaʼach u yáantik, le oʼolal tu yaʼalaj tiʼ u yatan Naamán: ‹Yaan juntúul máak in kʼaj óol jeʼel u tsʼakik a wíichameʼ. Letiʼeʼ juntúul profeta kajaʼan tu luʼumil Israel, u kʼaabaʼeʼ Eliseo›.

Le koʼoleloʼ tu tsikbaltaj tiʼ u yíicham le baʼax aʼalaʼabtiʼoʼ. Naamaneʼ táan u kaxtik kaʼach bix jeʼel u yutstaleʼ, le oʼolal bin tu yotoch Eliseo. Letiʼeʼ tu tuklaj yaan u jóokʼol chʼaʼabil jeʼex juntúul máax jach kʼaj óolaʼaneʼ. Chéen baʼaleʼ Eliseoeʼ maʼ jóokʼiʼ, chéen tu túuxtaj u j-meyaj aʼaliktiʼ: ‹Xeen, ka a bulaba siete u téenel teʼ río Jordanoʼ utiaʼal ka utschajkech›.

 Naamaneʼ maʼ utschaj tu tʼaan le baʼax aʼalaʼabtiʼoʼ, ka tu yaʼalaj: ‹Tin tuklajeʼ le profetaoʼ yaan u tʼanik u Dios yéetel yaan u sen péeksik u kʼab utiaʼal u tsʼakiken. Chéen baʼaleʼ maʼ bey tu beetiliʼ, baʼaxeʼ chéen tu yaʼalaj ka xiʼiken in bulinba teʼ río yaan Israeloʼ. Yaantoʼon ríoʼob maas maʼalobtak Siria. ¿Maʼ wa tu páajtal in biniʼiʼ?›. Naamaneʼ jach kʼuuxilnajeʼ, tu sutaj u paacheʼ ka lukʼ tu yotoch Eliseo.

U j-meyajoʼob Naamaneʼ tu yaʼaloʼobtiʼ ka u tukult maʼalob le baʼax aʼalaʼabtiʼoʼ. Tu yaʼaloʼobtiʼ: ‹¿Máasaʼ jeʼel a beetik jeʼel baʼalak utiaʼal ka utschajkecheʼ? Le baʼax ku yaʼaliktech le profetaoʼ chéen chʼaʼabil, ¿baʼaxten maʼ ta beetik?›. Naamaneʼ tu beetaj le baʼax aʼalaʼabtiʼoʼ, ka bin teʼ río Jordanoʼ ka tu buluba siete u téeneliʼ. Le u tsʼook ka tu bulubaoʼ ka jóokʼeʼ tsʼoʼok u yutstal. Letiʼeʼ jach kiʼimakchaj u yóoleʼ ka suunaj u tsʼáa u diosboʼotikil tiʼ Eliseo. Tu yaʼalajtiʼ: ‹Beoraaʼ in wojleʼ Jéeoba u jaajil Dios›. Ka suunaj Naamán tu yotocheʼ tsʼoʼok u yutstal. ¿Bix ta tʼaan tu yuʼubiluba le chan x-chʼúupal israelita ka tu yiloʼ?

«Ta beetaj u jóokʼol kiʼikiʼtʼaan tu chiʼ le mejen paalaloʼoboʼ bey xan tu chiʼ le táan chuʼuchiloʼoboʼ.» (Mateo 21:16)