Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 47

Jéeobaeʼ tu líiʼsaj u yóol Elías

Jéeobaeʼ tu líiʼsaj u yóol Elías

Le reina Jezabeloʼ jach pʼuʼuj ka tu yojéeltaj baʼax úuch tiʼ u profetaʼob Baal. Le oʼolal tu túuxtaj aʼalbil tiʼ Elías: ‹Sáamaleʼ yaan a kíimsaʼal jeʼex úuchik tiʼ u profetaʼob Baaloʼ›. Elíaseʼ sajakchaji, púutsʼeʼ ka bin teʼ desiertooʼ. Teʼeloʼ tu yaʼalaj tiʼ Jéeoba: ‹Way kin náakleʼ. Beoraaʼ luʼs in kuxtal›. Elíaseʼ tumen jach kaʼanaʼaneʼ chilaj wenel yáanal junkúul cheʼ.

Chéen baʼaleʼ juntúul angeleʼ tu yajseʼ ka tu chaambel aʼalajtiʼ: ‹Líikʼen ka jaankech›. Elíaseʼ tu yilaj junpʼéel wóolis waaj yóokʼol choko tuunichoʼob bey xan junpʼéel jarra jaʼ. Ka tsʼoʼok u janal yéetel u yukʼik le jaʼoʼ, ween tu kaʼatéen. Le ángel túunoʼ tu kaʼa ajseʼ ka tu yaʼalajtiʼ: ‹Jaanen, kʼaʼabéet u yantal a muukʼ tumen jach náach le tuʼux kan binoʼ›. Elías túuneʼ kaʼa jaani. Ka tsʼoʼokeʼ xíimbalnaj 40 kʼiinoʼob yéetel 40 áakʼaboʼob tak ka kʼuch tu puʼukil Horeb. Le tiaʼan teʼeloʼ ook wenel ichil junpʼéel sajkab. Ka tsʼoʼokeʼ Jéeobaeʼ tu yaʼalajtiʼ: ‹Elías, ¿baʼax ka beetik wayeʼ?›. Letiʼeʼ tu núukajtiʼ: ‹Le israelitaʼoboʼ tu tuʼubsoʼob le promesa tu beetoʼobtechoʼ. Tsʼoʼok u nikikoʼob a altaroʼob yéetel u kíimskoʼob a profetaʼob. Beoraaʼ taak xan u kíimskenoʼob›.

Jéeobaeʼ tu yaʼalaj tiʼ Elías: ‹Jóokʼen ka waʼalakech teʼ puʼukoʼ›. Ka taal túun junpʼéel kʼaʼamkach iikʼ, ka tsʼoʼokeʼ tu tíituba le luʼumoʼ yéetel anchaj junpʼéel kʼáakʼ. Tu tsʼoʼokeʼ Elíaseʼ tu yuʼubaj u chaambel tʼaʼanal. Le oʼolaleʼ tu pixaj u yich yéetel u nookʼeʼ ka pʼáat waʼatal tu jool le sajkaboʼ. Jéeobaeʼ tu kʼáatajtiʼ baʼaxten púutsʼi. Elías túuneʼ tu núukajtiʼ: ‹Tumen chéen teen le profeta pʼaatloʼ›. Chéen baʼaleʼ Jéeobaeʼ tu yaʼalajtiʼ: ‹Maʼ chéen ta juunal yanechiʼ. Tu kaajil Israeleʼ yaan uláakʼ 7,000 u túulal máakoʼob táan u adorartikenoʼob. Xeen a waʼal tiʼ Eliseo tsʼoʼok in yéeyik utiaʼal ka u beet u profetail ta lugar›. Tu séebaʼanileʼ bin Elías u beet le baʼax aʼalaʼabtiʼoʼ. A tuklikeʼ, ¿jeʼel wa xan u yáantkech Jéeoba wa ka wuʼuyik u tʼaaneʼ? Jeʼel u yáantkecheʼ. Beoraaʼ koʼox ilik baʼax úuch teʼ kʼiinoʼob maʼ kʼáax jaʼoʼ.

«Maʼ a sen chiʼichnaktaleʼex tu yoʼolal mix baʼal, baʼaxeʼ tiʼ tuláakal baʼaleʼ, ich oración bey xan ich kʼáat óolal junmúuchʼ yéetel a tsʼáaikeʼex graciaseʼ, aʼaleʼex tiʼ Dios baʼax a kʼáateʼex.» (Filiposiloʼob 4:6)