Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 39

U yáax reyil Israel

U yáax reyil Israel

Jéeobaeʼ tu tsʼáaj juezoʼob utiaʼal u nuʼuktik le israelitaʼoboʼ, chéen baʼaleʼ letiʼobeʼ u kʼáatoʼob juntúul rey. Le oʼolal tu yaʼaloʼob tiʼ Samuel: ‹Le u maasil nukuch kaajoʼoboʼ yaan u reyiloʼob, toʼon xaneʼ k-kʼáat juntúuliʼ›. Samueleʼ maʼ maʼalob tu yilil le baʼax tu kʼáatoʼoboʼ. Le oʼolal orarnaj tiʼ Jéeoba, Jéeoba túuneʼ tu yaʼalajtiʼ: ‹Le kaajoʼ maʼ teech tsʼoʼok u rechazarkechoʼobiʼ, baʼaxeʼ teen tsʼoʼok u rechazarkoʼob bey u reyoʼobeʼ. Aʼaltiʼob jeʼel u páajtal u yantaltiʼob juntúul reyeʼ, chéen baʼaleʼ le reyaʼ yaʼab baʼaloʼob ken u kʼáat ka tsʼaʼabaktiʼ›. Kex beyoʼ, le israelitaʼoboʼ tu yaʼaloʼob: ‹¡Baʼax k-kʼáajtiʼ, toʼoneʼ k-kʼáat ka tsʼaʼabaktoʼon juntúul rey!›.

Jéeobaeʼ tu yaʼalaj tiʼ Samueleʼ, juntúul máak ku kʼaabaʼtik Saúl ken u beet u yáax reyil. Le ka bin Saúl u xíimbalt Samuel tu kaajil Ramaeʼ, yéeyaʼab tumen Samuel, letiʼeʼ tu yalaj aceite tu pool utiaʼal u yeʼesik letiʼ ken u beet u reyil.

Ka tsʼoʼokeʼ, Samueleʼ tu muchʼkíintaj le israelitaʼob utiaʼal u yaʼaliktiʼob máax tsʼoʼok u tsʼaʼabal u beet u reyiloʼ. Chéen baʼaleʼ le ka bin kaxtbileʼ maʼ jáan ilaʼab tuʼux yaniʼ. ¿A wojel wa baʼaxten? Tumen u taʼakmuba kaʼach ichil yaʼab baʼaloʼob. Le ka kaxtaʼabeʼ, jóoʼsaʼabeʼ ka waʼakúuntaʼab chúumuk tiʼ le máakoʼoboʼ. Sauleʼ letiʼ u maas kaʼanlil u baakel tiʼ tuláakal le máaxoʼob yanoʼoboʼ yéetel jach jatsʼuts u yilaʼal. Samueleʼ tu yaʼalaj: ‹Letiʼe máax tsʼoʼok u yéeyaʼal tumen Jéeobaaʼ›. Le máakoʼoboʼ joʼopʼ u yawtikoʼob: ‹¡Bendecirtaʼak le reyoʼ!›.

Tu káajbaleʼ rey Sauleʼ ku beetik kaʼach baʼax ku yaʼalik Samuel yéetel ku yuʼubik u tʼaan Jéeoba. Chéen baʼaleʼ kʼexpaj u modos. Juntéenjeakeʼ Samueleʼ tu yaʼalaj tiʼ Saúl ka u páaʼt u suut utiaʼal u kʼubik le tóokbil baʼalcheʼoboʼ, tumen maʼ le rey unaj u kʼubikoʼ. Chéen baʼaleʼ Samueleʼ maʼ séeb kʼuchiʼ, le oʼolal Sauleʼ tu kʼubaj. ¿Baʼax túun tu beetaj Samuel ka kʼuchi? Tu yaʼalajtiʼ: ‹Unaj a wuʼuyik kaʼach u tʼaan Jéeoba, chéen baʼaleʼ maʼ ta beetiʼ›. A tuklikeʼ, ¿yaan wa u seguer u yuʼubaʼal u tʼaan Jéeoba tumen Saúl?

Ka máan kʼiineʼ, Sauleʼ bin baʼateʼel yéetel le amalequitaʼoboʼ. Samueleʼ tu yaʼalajtiʼ unaj u láaj kíimskoʼob kaʼachi. Chéen baʼaleʼ Sauleʼ tu chʼaʼtuklaj  maʼ u kíimsik rey Agag. Jéeoba túuneʼ tu yaʼalaj tiʼ Samuel: ‹Sauleʼ tsʼoʼok u náachtal tiʼ teen yéetel tsʼoʼok u pʼáatal maʼatech u yuʼubik in tʼaan›. Samueleʼ jach yaachaj u yóol, ka túun tu yaʼalaj tiʼ Saúl: ‹Jéeobaeʼ yaan u yéeyik uláakʼ rey tumen techeʼ tsʼoʼok u pʼáatal maʼatech a wuʼuyik u tʼaan›. Le ka tu sutuba Samuel utiaʼal u bineʼ, Sauleʼ tu machaj tu nookʼeʼ ka tu jataj. Samuel túuneʼ tu yaʼalaj tiʼ Saúl: ‹Jeʼex bix ta jatil le nookʼaʼ, bey xan kun luʼsbiltech le reino tumen Jéeobaoʼ›. Lelaʼ u kʼáat u yaʼaleʼ Jéeobaeʼ yaan u tsʼáaik le reino tiʼ juntúul máax yaabiltmil yéetel ku yuʼubik u tʼaanoʼ.

«U obedecer máakeʼ maas maʼalob ke junpʼéel sacrificio.» (1 Samuel 15:22)