Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 38

Jéeobaeʼ tu tsʼáaj u muukʼ Sansón

Jéeobaeʼ tu tsʼáaj u muukʼ Sansón

Yaʼab israelitaʼobeʼ joʼopʼ u kaʼa adorartikoʼob yaanal diosoʼob. Le oʼolal Jéeobaeʼ tu chaʼaj u chʼaʼabal u luʼumil Israel tumen le filisteoʼoboʼ. Chéen baʼaleʼ jujuntúuloʼobeʼ u yaabiltmoʼob kaʼach Jéeoba, jeʼex Manoaeʼ. Letiʼ yéetel u yataneʼ minaʼan kaʼach u paalaloʼob. Juntéenjeakeʼ Jéeobaeʼ tu túuxtaj juntúul ángel tu yiknal u yatan Manoa, ka tu yaʼalajtiʼ: ‹Yaan u yantal juntúul a hijo, letiʼ kun salvartik le israelitaʼob tu kʼab le filisteoʼoboʼ. Yaan u meyajtik Dios bey nazareoeʼ›. ¿A wojel wa máax kaʼach le nazareoʼoboʼ? Máaxoʼob tu kʼubaj u yóoloʼob u meyajtoʼob Jéeoba yéetel aʼalaʼantiʼob mix juntéen unaj u kʼoʼosol u tsoʼotsel u pooloʼob.

Ka máan kʼiineʼ anchaj u hijo Manoa, ka tu tsʼáajoʼob u kʼaabaʼt Sansón. Le ka nojochchajeʼ, Jéeobaeʼ tu tsʼáaj yaʼab muukʼ tiʼ. ¡Páajchaj u kíimsik juntúul león chéen yéetel u kʼaboʼob! Juntéenjeakeʼ tu kíimsaj 30 filisteoʼob, tsʼoʼoleʼ mix máak áante. Le oʼolal jach pʼektaʼab tumen le filisteoʼoboʼ yéetel taak u yojéeltikoʼob bix jeʼel u kíimskoʼobeʼ. Junpʼéel áakʼab le táan u wenel tu kaajil Gazaoʼ bin le filisteoʼob tu joonajil le kaaj utiaʼal u páaʼtkoʼob yéetel u kíimskoʼob ken sáaschajkoʼ. Chéen baʼaleʼ Sansoneʼ líikʼ chúumuk áakʼab, bin tu yookbal le kaajoʼ ka tu lakaj u joonajil u baʼpakʼiloʼob. Tsʼoʼoleʼ tu páajkalteʼ ka tu bisaj tu maas kaʼanlil junpʼéel puʼuk yaan naatsʼ tiʼ Hebrón.

Ka tsʼoʼokeʼ le filisteoʼoboʼ binoʼob tʼaan yéetel Dalila, u novia Sansón, ka tu yaʼaloʼobtiʼ: ‹Yaan k-tsʼáaiktech u milesil u pʼéelel baʼaloʼob de plata wa ka kʼáatik tiʼ Sansón baʼax beetik u jach yantal u muukʼ. Toʼoneʼ k-kʼáat k-mach utiaʼal k-kʼalik cárcel›. Dalilaeʼ u kʼáat ka tsʼaʼabak le taakʼin tiʼoʼ, le oʼolal tu yaʼalaj jeʼel u kʼáatiktiʼeʼ. Tu káajbaleʼ Sansoneʼ maʼ u kʼáat kaʼach u yaʼal tiʼ Dalila baʼax jach beetik u yantal u muukʼiʼ. Chéen baʼaleʼ Dalilaeʼ maʼ xuʼul u sen kʼáatiktiʼiʼ, le oʼolal Sansoneʼ tu yaʼalajtiʼ baʼax beetik u yantal u muukʼ. Letiʼeʼ tu yaʼalajtiʼ: ‹Mix juntéen kʼoʼosok u tsoʼotsel in pool tumen nazareoen. Wa ka kʼoʼoskeneʼ yaan u pʼáatal minaʼan in muukʼ›. ¿Máasaʼ maʼ unaj kaʼach u yaʼalik Sansón tiʼ Dalila baʼax beetik u yantal u muukʼiʼ?

 Tu séebaʼanileʼ, Dalilaeʼ tu yaʼalaj tiʼ le filisteoʼoboʼ: ‹¡Tsʼoʼok in wojéeltik baʼax beetik u yantal u muukʼ!›. Letiʼ túuneʼ tu beetaj u wenel Sansón tu yóokʼol u yookeʼ ka tu tʼanaj juntúul máax kʼosik u tsoʼotsel u pool. Ka tsʼoʼokeʼ Dalilaeʼ tu yawtaj: ‹¡Sansón, tsʼoʼok u kʼuchul le filisteoʼoboʼ!›. Le ka aajeʼ tu tsʼáaj cuenta minaʼan u muukʼ. Ka maʼach túun tumen le filisteoʼoboʼ, jóoʼsaʼab u yichoʼobeʼ ka kʼaʼali.

Juntéenjeakeʼ tu muchʼuba u milesil filisteoʼob tu templo Dagón, u diosoʼob. Letiʼobeʼ táan kaʼach u yawtikoʼob: ‹Dagoneʼ, tsʼoʼok u kʼubiktoʼon Sansón. Taaseʼex utiaʼal k-cheʼejtik›. Tu waʼakúuntoʼob chúumuk tiʼ le columnaʼoboʼ ka joʼopʼ u burlartikoʼob. Sansón túuneʼ tu kʼaʼam aʼalaj: ‹Jéeoba, beet uts a kaʼa tsʼáaik in muukʼ, kex chéen u tsʼook juntéenaʼ›. Tsʼokaʼaniliʼ u kaʼa chowaktal u tsoʼotsel u pooleʼ, le oʼolal tu léenchʼintaj u columnailoʼob le templo yéetel tuláakal u muukʼoʼ. Le naj túunoʼ júuteʼ ka kíim tuláakal le máaxoʼob yanoʼoboʼ, tak Sansón.

«Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ.» (Filiposiloʼob 4:13)