Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 32

Barak yéetel kaʼatúul koʼolel maʼ saajkoʼobiʼ

Barak yéetel kaʼatúul koʼolel maʼ saajkoʼobiʼ

Josueeʼ yaʼab años tu nuʼuktaj u kaajal Jéeoba yéetel 110 años yaantiʼ ka kíimi. Teʼ kʼiinoʼob kuxaʼan Josueoʼ le israelitaʼoboʼ tu adorartoʼob Jéeoba. Chéen baʼaleʼ ka kíimeʼ káaj u adorartikoʼob yaanal diosoʼob jeʼex u beetik le cananeoʼoboʼ. Tumen maʼ tu yuʼuboʼob tʼaaneʼ, Jéeobaeʼ tu kʼuboʼob tu kʼab Jabín, u reyil Canaán. Le israelitaʼob túunoʼ tu kʼáatoʼob u yáantaj Jéeoba. Le oʼolal Jéeobaeʼ tu tsʼáaj Barak utiaʼal u nuʼuktikoʼob. Letiʼ kun áantkoʼob u kaʼa adorartoʼob Jéeoba.

Déboraeʼ juntúul koʼolel ku profetizar. Letiʼeʼ tu túuxtaj tʼanbil Barak utiaʼal u tsʼáaik u yojéelt baʼax ku yaʼalik Jéeoba. Tu yaʼalajtiʼ: ‹Xeen teʼ tuʼux ku máan u jaʼil Cisón yéetel 10,000 máakoʼob utiaʼal a baʼateʼel yéetel u soldadoʼob Jabín. Teʼ ken in kʼub ta kʼab Sísara le máax nuʼuktik u soldadoʼob Jabinoʼ›. Barakeʼ tu yaʼalaj tiʼ Débora: ‹Jeʼel in bin chéen wa ka bin tin wéeteleʼ›. Déboraeʼ tu núukajtiʼ: ‹Yaan in bin ta wéetel, chéen baʼaleʼ kʼaʼabéet a wojéeltikeʼ maʼ teech kan kíimsik Sísaraiʼ. Jéeobaeʼ tsʼoʼok u yaʼalikeʼ juntúul koʼolel kun kíimsik›.

Débora, Barak yéetel u soldadoʼobeʼ naʼakoʼob tu puʼukil Tabor utiaʼal u líiʼskubaʼob baʼateʼel. Le ka tu yojéeltaj Sísaraeʼ, tu muchʼaj u carroiloʼob baʼateʼel yéetel u soldadoʼob teʼ tuʼux ku máan u jaʼil Cisonoʼ. Déboraeʼ tu  yaʼalaj tiʼ Barak: ‹Jéeobaeʼ yaan u beetik a ganar bejlaʼeʼ›. Bey túunoʼ Barak yéetel u 10,000 soldadoʼobeʼ éemoʼob teʼ puʼuk utiaʼal u baʼateloʼob tu contra u soldadoʼob Sísaraoʼ.

Ka tsʼoʼokeʼ, Jéeobaeʼ tu beetaj u tuul u jaʼil le río Cisonoʼ, yoʼolal lelaʼ tsʼóop u carroiloʼob u baʼateʼel Sísara teʼ luukʼoʼ. Sísara túuneʼ éem tu carroeʼ ka bin áalkabil. Barak yéetel u soldadoʼobeʼ tu ganartoʼob u soldadoʼob Sísara, chéen baʼaleʼ Sísaraeʼ púutsʼi ka bin u taʼakuba teʼ chan naj tuʼux kajaʼan juntúul koʼolel ku kʼaabaʼtik Jaeloʼ. Le koʼolelaʼ tu tsʼáaj junpʼíit leche tiʼ utiaʼal u yukʼe, ka tsʼoʼokeʼ tu pixaj yéetel junpʼéel nookʼ. Sísaraeʼ weeni tumen jach kaʼanaʼan. Jael túuneʼ náatsʼ chaambelil tu yiknaleʼ, tu bajaj junxóotʼ cheʼ tu pooleʼ ka kíimi.

Maʼ sáam tiʼ leloʼ, kʼuch Barak u kaxt Sísara. Ka jóokʼ Jaeleʼ, tu yaʼalajtiʼ: ‹Ooken, ka in weʼestech le máak ka kaxtikoʼ›. Ka ook Barakeʼ tu yilaj tiʼ pekekbal Sísaraiʼ. Ka tsʼoʼokeʼ, Barak yéetel Déboraeʼ kʼaaynajoʼob utiaʼal u alabartikoʼob Jéeoba tumen áantaʼaboʼob u ganart u enemigoʼob. U kajnáaliloʼob Israeleʼ kuxlajoʼob ich jeetsʼelil tu yáamil 40 años.

«Le koʼoleloʼob tsikbaltik le jatsʼuts baʼaloʼob ku taal u kʼiinoʼ, beyoʼob junpʼéel ejércitoeʼ.» (Salmo 68:11)