Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 22

Junpʼéel milagro teʼ Chak Kʼáaʼnáaboʼ

Junpʼéel milagro teʼ Chak Kʼáaʼnáaboʼ

Le ka tu yuʼubaj faraón tsʼoʼok u jóokʼol le israelitaʼob Egiptooʼ, arrepentirnaj úuchik u chaʼik u binoʼob. Tu yaʼalaj tiʼ u soldadoʼob: ‹Listokíinteʼex u carroiloʼob k-baʼateʼel utiaʼal k-bin k-chʼaʼpachtoʼob. Maʼ unaj k-chaʼik u binoʼob kaʼachiʼ›. Faraón yéetel u soldadoʼob túuneʼ bin u chukpacht le israelitaʼoboʼ.

Jéeobaeʼ táan kaʼach u nuʼuktik u kaajal, de díaeʼ yéetel junpʼéel múuyal, de áakʼabeʼ yéetel junpʼéel nojoch kʼáakʼ. Tu bisoʼob naatsʼ tiʼ le Chak Kʼáaʼnáaboʼ ka tu yaʼalajtiʼob ka pʼáatkoʼob jeʼeleliʼ.

Ka tsʼoʼokeʼ le israelitaʼoboʼ tu yiloʼob tu paachoʼobeʼ táan kaʼach u taal faraón yéetel u soldadoʼob. Le israelitaʼoboʼ kʼataʼan u beeloʼob tumen le kʼáaʼnáaboʼ bey xan tumen le soldadoʼob egipcioʼoboʼ. Letiʼobeʼ joʼopʼ u yawatoʼob yéetel u yaʼalikoʼob tiʼ Moisés: ‹¡Yaan k-kíimil! ¿Baʼaxten ta jóoʼsoʼon Egipto?›. Chéen baʼaleʼ Moiseseʼ tu yaʼalajtiʼob: ‹Maʼ a chʼaʼikeʼex saajkil. Ilawileʼex bix ken u salvartiloʼon Jéeoba›. ¿Máasaʼ Moiseseʼ jach ku confiar kaʼach tiʼ Jéeoba?

Ku tsʼoʼokoleʼ Jéeobaeʼ tu yaʼalaj tiʼ le israelitaʼob ka seguernak u binoʼoboʼ. Teʼ áakʼaboʼ Jéeobaeʼ tu beetaj u máan le múuyal tu chúumuk le israelitaʼob yéetel le egipcioʼoboʼ. Teʼ tuʼux yaan le egipcioʼoboʼ éeʼjochʼeʼen, yéetel tuʼux yaan le israelitaʼoboʼ sáasil.

Tsʼoʼoleʼ Jéeobaeʼ tu yaʼalaj tiʼ Moisés ka u tichʼ u kʼab tu tojil le kʼáaʼnáaboʼ.  Jéeoba túuneʼ bul áakʼab tu beetaj u taal junpʼéel kʼaʼamkach iikʼ. Le kʼáaʼnáaboʼ tu jatsubaeʼ ka anchaj junpʼéel bej tu chúumuk. Le u millonesil israelitaʼoboʼ páajchaj u máanoʼob teʼ tikin luʼum tu chúumuk le kʼáaʼnáaboʼ tak ka kʼuchoʼob tuláakʼ juntséeloʼ.

U soldadoʼob faraoneʼ joʼopʼ u chʼaʼpachtikoʼob le yaʼabkach israelitaʼob teʼ tikin luʼum tuʼux táan u binoʼoboʼ. Chéen baʼaleʼ Jéeobaeʼ tu beetaj u sen sajaktal le egipcioʼoboʼ. Káaj u jóotsʼol u ruedail u carroʼob yéetel joʼopʼ u yawtikoʼob: ‹¡Koʼoneʼex púutsʼul! Jéeobaeʼ táan u baʼateʼel yoʼolal u kaajal›.

Jéeobaeʼ tu yaʼalaj tiʼ Moisés: ‹Tichʼ a kʼab tu tojil le kʼáaʼnáaboʼ›. Le ka tu tichʼeʼ le jaʼoʼ suunaj tu yóokʼol le egipcioʼoboʼ. Faraón yéetel u soldadoʼobeʼ láaj kíimoʼob.

Tuláakal le máaxoʼob máanoʼob tuláakʼ juntséel le kʼáaʼnáaboʼ joʼopʼ u alabartikoʼob Jéeoba yéetel junpʼéel kʼaay: ‹Yaan in kʼaay tiʼ Jéeoba tumen yaan u sen kʼaj óoltaʼal tuláakal tuʼux yoʼolal le baʼateʼel tu ganartoʼ. Letiʼeʼ tsʼoʼok u bulik teʼ kʼáaʼnáab le tsíimin yéetel le máax natʼmiloʼ›. Le táan u kʼaayoʼoboʼ, le koʼoleloʼoboʼ táan kaʼach u yóokʼotoʼob yéetel táan u paxik u panderetaʼob. Beoraaʼ láaj kiʼimak u yóoloʼob tumen maʼ palitsiloʼobiʼ.

«Le oʼolaleʼ jeʼel u páajtal u líikʼil k-óol yéetel k-aʼalik lelaʼ: ‹Jéeoba máax áantken; maʼ ken in chʼaʼ saajkil. ¿Baʼax jeʼel u beetikten wíinikeʼ?›» (Hebreoʼob 13:6)