Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 19

Le yáax óoxpʼéel plagaʼoboʼ

Le yáax óoxpʼéel plagaʼoboʼ

Teʼ kʼiinoʼob palitsiltaʼan le israelitaʼoboʼ jach yaʼab u beetaʼal u meyajoʼob tumen le egipcioʼoboʼ. Jéeobaeʼ tu túuxtaj Moisés yéetel Aarón u yaʼaloʼob tiʼ faraón: ‹Chaʼa u bin in kaajal utiaʼal ka u adorartenoʼob teʼ desiertooʼ›. Le faraonoʼ jach nojbaʼal u yuʼubikuba, le oʼolal tu yaʼalaj: ‹Kex jeʼel baʼalak ka u yaʼal Jéeobaeʼ, maʼ ken in chaʼa u bin le israelitaʼoboʼ›. Ka tsʼoʼokeʼ le faraonoʼ tu beetaj u maas meyajoʼob. Le oʼolaleʼ Jéeobaeʼ tu chʼaʼtuklaj u yeʼesik tiʼ faraón máax letiʼ. ¿Baʼax tu beetaj? Tu túuxtaj diez plagaʼob tu luʼumil Egipto. Jéeobaeʼ tu yaʼalaj tiʼ Moisés: ‹Le faraonoʼ maʼ tu beetik baʼax kin waʼalik. Sáamal tempranoeʼ yaan u bin teʼ río Nilooʼ. Xeen a waʼaltiʼeʼ yaan u suut kʼiʼikʼil tuláakal u jaʼil le ríooʼ, tumen maʼ u chaʼa u bin in kaajaliʼ›. Moiseseʼ tu beetaj baʼax tu yaʼalaj Jéeobaeʼ ka bin u yil faraón. Le faraonoʼ tu yilaj u jaʼatsʼal u jaʼil le Nilo tumen Aarón yéetel u xóolteʼoʼ, ka suunaj kʼiʼikʼil le jaʼoʼ. U jaʼil le ríooʼ káaj u tuʼutal, maʼ tu páajtal u yukʼul, tsʼoʼoleʼ le kayoʼoboʼ kíimoʼob. Chéen baʼaleʼ le faraonoʼ láayliʼ maʼ u kʼáat kaʼach u chaʼa u binoʼob teʼ desiertooʼ.

 Ka máan siete kʼiinoʼobeʼ, Jéeobaeʼ tu kaʼa túuxtaj Moisés u yaʼal tiʼ faraón: ‹Wa maʼ ta chaʼik u bin in kaajaleʼ yaan in chupik yéetel muuchoʼob tuláakal u luʼumil Egipto›. Tumen maʼ tu beetaj u cuentail faraón le baʼax aʼalaʼabtiʼoʼ, Aaroneʼ tu tichʼaj u xóolteʼeʼ ka joʼopʼ u yantal muuchoʼob, leloʼobaʼ tu chuʼupoʼob u luʼumil Egipto. Anchaj muuchoʼob tu yotoch le máakoʼoboʼ, tu camaʼob bey xan tu platoil u yoʼochoʼob. ¡Tuláakal tuʼux anchajoʼob! Le faraón túunoʼ tu yaʼalaj tiʼ Moisés: ‹Aʼal tiʼ Jéeoba ka u luʼs le plagaoʼ. Ku tsʼoʼokoleʼ kin chaʼik u bin le israelitaʼoboʼ›. Ka túun tu luʼsaj Jéeoba le plagaoʼ. Le egipcioʼob túunoʼ tu juntartoʼob yaʼab muuchoʼob kimentakoʼob. U luʼumil Egiptoeʼ káaj u tuʼutal, chéen baʼaleʼ faraoneʼ maʼ tu kaʼa chaʼaj u bin le israelitaʼoboʼ.

Ka tsʼoʼokeʼ Jéeobaeʼ tu yaʼalaj tiʼ Moisés: ‹Aʼal tiʼ Aarón ka u jatsʼ le polvo yaan teʼ luʼum yéetel u xóolteʼoʼ. Le ken u beeteʼ le polvooʼ yaan u suut kʼoxoliloʼob›. Lelaʼ bey úuchikoʼ, káaj u kʼiʼitpajal yaʼab kʼoxoloʼob tuláakal tuʼuxeʼ ka joʼopʼ u chiʼik le máakoʼoboʼ. Yaan tiʼ le egipcioʼoboʼ tu yaʼaloʼob tiʼ faraón: ‹¡Le plagaaʼ Dios beet u yantal!›. Kex beyoʼ faraoneʼ maʼ tu chaʼaj u bin le israelitaʼoboʼ.

«Yaan in weʼesiktiʼob in poder yéetel in páajtalil, letiʼob túuneʼ yaan u yojéeltikoʼob Jéeoba in kʼaabaʼ.» (Jeremías 16:21)