Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 20

Le uláakʼ seis plagaʼoboʼ

Le uláakʼ seis plagaʼoboʼ

Moisés yéetel Aaroneʼ bin u yiloʼob faraón utiaʼal u tsʼáaikoʼob u yojéelt le baʼax tu yaʼalaj Diosoʼ: ‹Wa maʼ ta chaʼik u bin in kaajaleʼ yaan in túuxtik áakachoʼob tiʼ tuláakal Egipto›. Le áakachoʼoboʼ nukuch x-yaʼaxkachoʼob ku chiʼikoʼob máak. U milesil le áakachoʼoboʼ ookoʼob tu yotoch le egipcioʼoboʼ, le ayikʼaloʼoboʼ yéetel le óotsiloʼoboʼ. Tuláakal u luʼumil Egipto chuʼup yéetel áakachoʼob. Chéen baʼaleʼ tu luʼumil Gosén, tuʼux kajaʼan le israelitaʼoboʼ mix juntúul áakach yaan kaʼachiʼ. Le kanpʼéel plagaaʼ yéetel le u maasiloʼoboʼ chéen tu beetaj loob tiʼ le egipcioʼoboʼ, tiʼ le israelitaʼoboʼ mix baʼal úuchtiʼob. Le faraonoʼ tu yaʼalaj tiʼ Moisés: ‹Kʼáat tiʼ Jéeoba ka u luʼs le áakachoʼoboʼ ken tsʼoʼokkeʼ kin chaʼik u bin a kaajal›. Chéen baʼaleʼ le ka luʼsaʼaboʼob tumen Jéeobaeʼ, faraoneʼ maʼ tu kaʼa chaʼaj u binoʼobiʼ. A tuklikeʼ, ¿yaan wa u kʼuchul u kʼiinil u chaʼik faraón u bin le israelitaʼoboʼ?

Ka tsʼoʼokeʼ Jéeobaeʼ tu yaʼalaj: ‹Wa faraón maʼ tu chaʼik u bin in kaajaleʼ yaan in beetik u kʼojaʼantal yéetel u kíimil u yalakʼ baʼalcheʼ le egipcioʼoboʼ›. Le ka sáaschaj tuláakʼ kʼiineʼ Jéeobaeʼ tu beetaj jach jeʼex tu yaʼaliloʼ, chéen baʼaleʼ mix juntúul tiʼ u yalakʼ baʼalcheʼ le israelitaʼob kíimoʼoboʼ. Kex beyoʼ faraoneʼ tumen jach tercoeʼ maʼ tu chaʼaj u binoʼobiʼ.

Jéeoba túuneʼ tu kaʼa túuxtaj Moisés tuʼux yaan faraón yéetel kaʼa lóochʼ taʼan utiaʼal u pulik kaʼanal. Le taʼan túunoʼ yaʼabchaj bey jeʼex le polvooʼ, ka kʼiʼitpaj yóokʼol tuláakal le egipcioʼoboʼ. Le polvoaʼ tu beetaj u jóokʼol nukuch llagaʼob tiʼ letiʼob bey xan tiʼ u yalakʼ baʼalcheʼob. Chéen baʼaleʼ le faraonoʼ tu kaʼa aʼalaj tiʼ le israelitaʼob maʼ tu páajtal u binoʼoboʼ.

 Jéeobaeʼ tu kaʼa túuxtaj Moisés u yaʼal tiʼ faraón: ‹¿Láayliʼ wa maʼ a kʼáat a túuxt in kaajaleʼ? Wa beyoʼ sáamaleʼ yaan in beetik u sen kʼáaxal bat›. Ka sáaschaj tuláakʼ kʼiineʼ, Jéeobaeʼ tu beetaj u kʼáaxal bat, u kíilbal cháak yéetel u yéemel kʼáakʼ. Mix juntéen kʼáaxak bat kaʼach Egipto jeʼex le kʼiin jeʼeloʼ. Tu kʼaskúuntaj tuláakal le xíiwoʼoboʼ yéetel tu kaʼakachaj tuláakal le cheʼoboʼ, chéen tu luʼumil Gosén maʼ úuch beyoʼ. Faraón túuneʼ tu yaʼalaj: ‹Aʼal tiʼ Jéeoba ka u beet u xuʼulul u kʼáaxal le batoʼ, ken tsʼoʼokkeʼ yaan in chaʼik a bineʼex›. Chéen baʼaleʼ le ka xuʼul u kʼáaxal le bat yéetel le jaʼoʼ, faraoneʼ maʼ tu chaʼaj u binoʼobiʼ.

Le oʼolal Moiseseʼ tu yaʼalaj tiʼ faraón: ‹Beoraaʼ yaan u taal sáakʼoʼob, yaan u láaj jaantkoʼob le paakʼaloʼob maʼ tu kʼaskúuntaj le batoʼ›. U millonesil sáakʼoʼobeʼ tu jaantoʼob tuláakal le xíiwoʼob yéetel u leʼ le cheʼoboʼ. Faraoneʼ tu yaʼalaj tiʼ Moisés: ‹Aʼal tiʼ Jéeoba ka u luʼs le sáakʼoʼobaʼ›. Chéen baʼaleʼ ka tsʼoʼok u luʼsik Jéeoba le sáakʼoʼoboʼ, faraoneʼ seguernaj u beetik u tercoil.

Ka tsʼoʼokeʼ Jéeobaeʼ tu yaʼalaj tiʼ Moisés: ‹Tichʼ a kʼab tu tojil le kaʼanoʼ›. Le ka tu beeteʼ láaj pʼáat éeʼjochʼeʼenil. Le egipcioʼoboʼ óoxpʼéel kʼiin maʼ páajchaj u yilkoʼob mix baʼaliʼ. Chéen tuʼux yaan le israelitaʼob yaan sáasil kaʼachoʼ.

Faraoneʼ tu yaʼalaj tiʼ Moisés: ‹Teech yéetel a kaajaleʼ jeʼel u páajtal a bineʼexeʼ, chéen baʼaleʼ yaan a pʼatkeʼex a walakʼ baʼalcheʼex›. Moiseseʼ tu yaʼalajtiʼ: ‹Maʼ, yaan k-bisik k-alakʼ baʼalcheʼob utiaʼal ka k-kʼub ofrendaʼob tiʼ Jéeoba k-Dios›. Faraoneʼ pʼuʼujeʼ ka tu yaʼalajtiʼ: ‹¡Lukʼkech way tin táaneʼ! Bik táabakech taal tu kaʼatéen, tumen le kʼiin ken taalakecheʼ yaan in kíimskech›.

«Yaan a kaʼa ilkeʼex u jelaʼanil juntúul utsul máak tiʼ juntúul kʼasaʼan máak, u jelaʼanil juntúul máak ku meyajtik Dios tiʼ juntúul máak maʼatech u meyajtik.» (Malaquías 3:18)