Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 10

Kʼaʼajaktech baʼax úuch tiʼ u yatan Lot

Kʼaʼajaktech baʼax úuch tiʼ u yatan Lot

Loteʼ kajaʼan kaʼach yéetel Abrahán, u tío, tu luʼumil Canaán. Ka máan kʼiineʼ tu kaʼatúulal anchaj yaʼab u yalakʼ baʼalcheʼob le oʼolal pʼáat minaʼan tuʼux u yantal tuláakloʼob. Le oʼolal Abrahaneʼ tu yaʼalaj tiʼ Lot: ‹Maʼ maʼalob ka seguernak k-kajtal tiʼ junpʼéeliliʼ tuʼuxiʼ, beet uts a yéeyik tuʼux a kʼáat bin. Wa ka bin teʼ x-tsʼíikoʼ teneʼ kin bin teʼ x-noʼojoʼ›. ¿Máasaʼ jach uts u modos Abrahán?

Loteʼ tu yilaj u jaats luʼum jach jatsʼuts, tuʼux yaan yaʼab jaʼiʼ yéetel yaʼax xíiwoʼobiʼ. Lelaʼ naatsʼ yanil tiʼ junpʼéel kaaj ku kʼaabaʼtik Sodoma. Letiʼ túuneʼ tu yéeyaj u bin kajtal yéetel u láakʼtsiloʼob teʼeloʼ.

Le máakoʼob kajaʼanoʼob Sodoma bey xan le yanoʼob teʼ tuláakʼ kaaj ku kʼaabaʼtik Gomorraoʼ jach kʼasaʼanoʼob. Le oʼolal Jéeobaeʼ tu chʼaʼtuklaj u xuʼulsik le kaʼapʼéel kaajoʼobaʼ. Chéen baʼaleʼ Dioseʼ taak kaʼach u salvartik Lot yéetel u láakʼtsiloʼob, le oʼolal tu túuxtaj kaʼatúul angeloʼob u yaʼaltiʼob: ‹¡Séebkunteʼex! ¡Jóokʼeneʼex teʼ kaajaʼ, nukaʼaj xuʼulsbil tumen Jéeoba!›.

Chéen baʼaleʼ Loteʼ maʼ séeb jóokʼiʼ. Le oʼolal le angeloʼoboʼ tu machoʼob u kʼab Lot, u yatan yéetel le u kaʼatúul hijaʼoboʼ, ka tu séeb jóoʼsoʼob teʼ kaajoʼ. Ka aʼalaʼabtiʼob: ‹¡Púutsʼkeʼex utiaʼal maʼ a kíimleʼex! ¡Maʼ a paakateʼex paachil! Wa ka beetkeʼexeʼ yaan a kíimleʼex›.

Le ka kʼuchoʼob tu kaajil Zoareʼ, Jéeobaeʼ tu beetaj u kʼáaxal kʼáakʼ yéetel azufre tu yóokʼol Sodoma yéetel Gomorra. Jach xuʼulsaʼab junpuliʼ le kaʼapʼéel kaajoʼobaʼ. U yatan Loteʼ maʼ tu yuʼubaj u tʼaan Jéeobaiʼ,  paakatnaj paachileʼ ka túun suunaj junpʼéel estatua de taʼab. Chéen baʼaleʼ Lot yéetel u hijaʼobeʼ tu salvartubaʼob tumen tu yuʼuboʼob tʼaan. U yatan Loteʼ maʼ tu yuʼubaj u tʼaan Diosiʼ, le oʼolal Lot yéetel u hijaʼobeʼ jach yaachaj u yóoloʼob. Kex beyoʼ tu yuʼububaʼob xan maʼalobil tumen letiʼobeʼ tu beetoʼob baʼax tu yaʼalaj Jéeoba.

«Kʼaʼajakteʼex u yatan Lot.» (Lucas 17:32)