Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 85

Tsʼaʼak juntúul máak tu kʼiinil sábado

Tsʼaʼak juntúul máak tu kʼiinil sábado

Le fariseoʼoboʼ u pʼekmoʼob kaʼach Jesús yéetel táan u kaxtikoʼob baʼax oʼolal u machkoʼob. Ku yaʼalikoʼobeʼ maʼ unaj u tsʼakik máak sabadoiʼ tumen u kʼiinil jeʼelel. Juntéeneʼ Jesuseʼ tu yilaj juntúul máak chʼóop táan u kʼáatik caridad tu kʼiinil sábado. Letiʼ túuneʼ tu yaʼalaj tiʼ u disipuloʼob: ‹Ilawileʼex bix kun áantbil le máak tumen u poder Diosoʼ›. Letiʼeʼ tu xaʼakʼtaj luʼum yéetel u túub, tu choʼaj tu yich le máakoʼ, ka tu yaʼalaj: ‹Xeen a pʼoʼ a wich tu pilail Siloam›. Le máakoʼ tu beetaj leloʼ ka káaj u paakat.

Le máakoʼoboʼ jach jaʼakʼ u yóoloʼobeʼ ka tu yaʼaloʼob: ‹¿Maʼ wa letiʼe máak ku kutal u kʼáat caridadaʼ? ¿Wa chéen chíikaʼan tiʼ?›. Le máakoʼ tu núukaj: ‹Teen le máak chʼóop desde ka síijoʼ›. Letiʼobeʼ tu kʼáatoʼobtiʼ: ‹¿Bix túun úuchik u sáasiltal a wich?›. Letiʼeʼ tu tsolajtiʼob le baʼax úuchoʼ. Ka tsʼoʼokeʼ bisaʼab utiaʼal ka tʼaanak yéetel le fariseoʼoboʼ.

Le máakoʼ tu yaʼalajtiʼob: ‹Jesuseʼ tu beetaj luukʼeʼ ka tu choʼaj tin wich, tsʼoʼoleʼ tu yaʼalajten ka in pʼoʼe. Bey úuchik u sáasiltal in wichoʼ›. Le fariseoʼoboʼ tu yaʼaloʼob: ‹Jesuseʼ maʼ tiʼ Dios u taaliʼ tumen ku tsʼakik máak tu kʼiinil sábado›. Uláakʼoʼobeʼ joʼopʼ u yaʼalikoʼob: ‹Wa maʼ tiʼ Dios u taaleʼ, ¿bix túun u béeytal u tsʼakik le kʼojaʼanoʼoboʼ?›.

Le fariseoʼoboʼ tu tʼanoʼob u papaʼob le máakoʼ ka tu kʼáatajtiʼob: ‹¿Bix túun yanil ku páajtal u paakat a hijoʼex beoraaʼ?›. Letiʼobeʼ saajkoʼob kaʼachi tumen le fariseoʼoboʼ u yaʼalmoʼob yaan  u tojolchʼintikoʼob tiʼ le sinagoga jeʼel máaxak ka u tsʼáa u fe tiʼ Jesusoʼ. Le oʼolal tu yaʼaloʼob: ‹Maʼ k-ojliʼ, kʼáateʼextiʼ›. Le fariseoʼoboʼ seguernaj u kʼáatkoʼob tiʼ le máak bix úuchik u tsʼaʼakaloʼ, chéen baʼaleʼ letiʼeʼ tu yaʼalajtiʼob: ‹Tsʼoʼok in waʼalikteʼex baʼax úuchi. ¿Baʼaxten ku seguer a kʼáatkeʼex teen?›. Le fariseoʼoboʼ jach pʼuʼujoʼobeʼ ka tu tojolchʼintoʼob le máakoʼ.

Ka tsʼoʼokeʼ Jesuseʼ bin u yil le máakoʼ ka tu yaʼalajtiʼ: ‹¿Ka tsʼáaik wa a fe tiʼ le Mesíasoʼ?›. Le máakoʼ tu núukajtiʼ: ‹Wa ka in wojéelt máaxeʼ jeʼel in tsʼáaik in fe tiʼeʼ›. Jesuseʼ tu yaʼalajtiʼ: ‹Teen le Mesíasoʼ›. ¿Máasaʼ Jesuseʼ jach tu yeʼesaj u yutsil tiʼ le máak chʼóopoʼ? Letiʼeʼ tu tsʼakaj yéetel tu yáantaj utiaʼal ka yanak u fe.

«Teʼexeʼ maʼ maʼalob bix a tuukuleʼexiʼ, tumen maʼ a kʼaj óoleʼex le Kiliʼich Tsʼíiboʼoboʼ mix le páajtalil yaan tiʼ Diosoʼ.» (Mateo 22:29)