Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 83

Jesuseʼ tu tséentaj u milesil máakoʼob

Jesuseʼ tu tséentaj u milesil máakoʼob

Maʼ sen úuch tsʼoʼokok le Pascua tu añoil 32, le apostoloʼoboʼ suunajoʼob tiʼ junpʼéel u viajeil kʼaʼaytaj. Jach kaʼanaʼanoʼob kaʼachi, le oʼolal Jesuseʼ tu bisoʼob tiʼ junpʼéel chan barco tak Betsaida utiaʼal u jeʼeleloʼobiʼ. Chéen baʼaleʼ le táan u náatsʼloʼob tu jáal le kʼáaʼnáaboʼ, Jesuseʼ tu yilaj u milesil máakoʼob bijaʼanoʼob u páaʼtoʼob teʼeloʼ. Letiʼ kaʼacheʼ u kʼáat antal chéen tu juunal yéetel u apostoloʼob, chéen baʼaleʼ ka tu yilaj le máakoʼoboʼ tu kʼamoʼob yéetel yaabilaj. Tu tsʼakaj le kʼojaʼanoʼoboʼ yéetel joʼopʼ u kaʼansiktiʼob yaʼab baʼaloʼob. Bul kʼiin tu tsikbaltajtiʼob baʼax ken u beet u Reino Dios. Le táan u yéeʼsameʼentaloʼ le apostoloʼoboʼ, tu yaʼaloʼob tiʼ Jesús: ‹Maʼ xaaneʼ wiʼij le máakoʼoboʼ. Aʼaltiʼob ka xiʼik u manoʼob wa baʼax u jaantoʼob›.

Jesuseʼ tu yaʼalajtiʼob: ‹Maʼ tsaaj ka xiʼikoʼobiʼ. Tsʼáaʼex baʼal u jaantoʼob›. Le apostoloʼoboʼ tu kʼáatoʼobtiʼ: ‹¿A kʼáat wa ka xiʼikoʼon k-man waaj utiaʼal u jaantoʼob?›. Felipe, juntúul tiʼ le apostoloʼoboʼ, tu yaʼalaj: ‹Kex wa yaantoʼon yaʼab taakʼineʼ, ¿tuʼux jeʼel k-kaxtik waaj utiaʼal tuláakal le máakoʼobaʼ?›.

Jesús túuneʼ tu kʼáatajtiʼob: ‹¿Bukaʼaj janal yaantoʼon?›. Andreseʼ tu yaʼalajtiʼ: ‹Yaantoʼon cinco waajoʼob yéetel kaʼatúul kayoʼob. Chéen baʼaleʼ maʼ ken u tsʼáa utiaʼal tuláakal le máakoʼobaʼ›. Jesuseʼ tu yaʼalaj: ‹Taaseʼexoʼob wayeʼ›. Ka tsʼoʼokeʼ tu yaʼalaj tiʼ le máakoʼob ka kulakoʼob yóokʼol le suʼukoʼ, yéetel ka u muchʼubaʼob de 50 wa tak 100 u túulaloʼob. Letiʼ túuneʼ tu chʼaʼaj le waajoʼob yéetel le kayoʼoboʼ, paakatnaj teʼ kaʼanoʼ ka orarnaji. Tsʼoʼoleʼ tu tsʼáaj le janal tiʼ le apostoloʼoboʼ utiaʼal u tʼoxkoʼob tiʼ tuláakal le máakoʼoboʼ. Le 5,000 xiiboʼob yanoʼob teʼeloʼ bey xan le koʼoleloʼob  yéetel le paalaloʼoboʼ jaanoʼob tak ka naʼajchajoʼob. Tu tsʼookeʼ le apostoloʼoboʼ tu moloʼob tuláakal le xéexetʼal pʼáatoʼ utiaʼal maʼ u peʼerchajal mix baʼal. ¡Tu chupoʼob 12 xaakoʼob! ¿Máasaʼ jach jatsʼuts le milagro tu beetoʼ?

Le máakoʼoboʼ jach jaʼakʼ u yóoloʼobeʼ ka taakchaj u beetkoʼob reyil Jesús. Chéen baʼaleʼ Jesuseʼ u yojel maʼ kʼuchuk u kʼiinil u beetik u reyil jeʼex u yaʼalmil Jéeobaoʼ. Le oʼolal tu yaʼalaj tiʼ le máakoʼob ka suunak tu yotochoʼoboʼ yéetel tu yaʼalaj tiʼ u apostoloʼob ka xiʼikoʼob tuláakʼ juntséel u Kʼáaʼnáabil Galilea. Letiʼob túuneʼ naʼakoʼob teʼ barcooʼ ka binoʼob, chéen baʼaleʼ Jesuseʼ naʼak chéen tu juunal tiʼ junpʼéel puʼuk. ¿Baʼaxten? Tumen ku tsʼíiboltik u yantal chéen tu juunal utiaʼal ka orarnak tiʼ u Taata. Kex yaʼab baʼax ku beetik kaʼacheʼ, Jesuseʼ mantatsʼ tu jóoʼsaj tiempo utiaʼal u orar.

«Maʼ a meyajeʼex yoʼolal le janal ku kʼastaloʼ, baʼaxeʼ yoʼolal le janal maʼ tu kʼastal ku tsʼáaik kuxtal minaʼan u xuuloʼ, lelaʼ letiʼe baʼax ken u tsʼáateʼex u Paal máakoʼ.» (Juan 6:27)