Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 78

Jesuseʼ tu kʼaʼaytaj le Reinooʼ

Jesuseʼ tu kʼaʼaytaj le Reinooʼ

Maʼ úuch tsʼoʼokok u yokjaʼeʼ, Jesuseʼ káaj u kʼaʼaytik: ‹U Reinoil kaʼaneʼ tsʼoʼok u náatsʼal›. U disipuloʼobeʼ binoʼob kʼaʼaytaj tu yéetel tiʼ tuláakal Galilea yéetel Judea. Ka suunaj Jesús tu kaajil Nazareteʼ, bin teʼ sinagogaoʼ, tu chʼaʼaj le rollo tu tsʼíibtaj Isaíasoʼ, ka tu kʼaʼam xokaj: ‹Jéeobaeʼ tsʼoʼok u tsʼáaikten u kiliʼich muukʼ utiaʼal in tsikbaltik le jatsʼuts baʼaloʼob ken u beetoʼ›. ¿Baʼax tu yóotaj u yaʼale? Le máakoʼoboʼ u kʼáat kaʼach u yiloʼob le milagroʼob ku beetik Jesusoʼ. Chéen baʼaleʼ tiʼ letiʼeʼ maʼ tsʼaʼab le kiliʼich muukʼ chéen utiaʼal u beetik milagroʼoboʼ. Le baʼax maas unaj u beetkoʼ u kʼaʼaytik le baʼax ken u beet le Reinooʼ. Tu tsʼookeʼ tu yaʼalaj tiʼ le máaxoʼob chʼenxikintikoʼ: ‹Bejlaʼeʼ táan u béeychajal le baʼax tsʼíibtaʼanaʼ›.

Ka tsʼoʼokeʼ Jesuseʼ bin tu Kʼáaʼnáabil Galilea. Teʼeloʼ tu yilaj kantúul u disipuloʼob ku chuk kayoʼobiʼ ka tu yaʼalajtiʼob: ‹Koʼoteneʼex tin paach, ka in kaʼanseʼex a chukeʼex wíinikoʼob›. Le j-chuk kayoʼoboʼ u kʼaabaʼobeʼ Pedro, Andrés, Santiago yéetel Juan. Letiʼobeʼ tu séebaʼanil tu pʼatoʼob u chuk kayoʼobeʼ ka binoʼob yéetel Jesús. Binoʼob tiʼ tuláakal Galilea táan u kʼaʼaytikoʼob u Reino Jéeoba. Kʼaʼaytajnajoʼob tiʼ sinagogaʼob, mercadoʼob yéetel teʼ calleʼoboʼ. Jeʼel tuʼuxak ka xiʼikoʼobeʼ yaʼab máak ku bin tu paachoʼob. Le baʼaxoʼob ku yaʼalal yoʼolal Jesusoʼ kʼuch ojéeltbil tuláakal tuʼux, tak tu náanach luʼumil Siria.

Ka máan kʼiineʼ Jesuseʼ tu tsʼáaj páajtalil tiʼ jujuntúul u disipuloʼob utiaʼal u tsʼakikoʼob kʼojaʼanoʼob yéetel utiaʼal u jóoʼskoʼob demonioʼob. Uláakʼoʼobeʼ tu láakʼintoʼob kʼaʼaytaj Jesús tiʼ nukuch kaajoʼob yéetel tiʼ kajtaliloʼob. Anchaj xan junmúuchʼ koʼoleloʼob bin tu yéetel, jeʼex María Magdalena, Juana, Susana yéetel uláakʼ koʼoleloʼob. Letiʼobeʼ tu tsʼáajoʼob baʼax kʼaʼabéet tiʼ Jesús yéetel tiʼ u disipuloʼob.

Ka tsʼoʼok u kaʼansik u disipuloʼobeʼ, tu túuxtoʼob kʼaʼaytaj. Le táan u máanoʼob Galileaoʼ yaʼab uláakʼ máaxoʼob tu beetubaʼob disipuloʼob tiʼ Jesús, ka okjaʼanajoʼob. Yaʼab máak u kʼáat kaʼach u beetuba u disipulo Jesús, le oʼolal letiʼeʼ tu ketoʼob yéetel junpʼéel kool kʼaʼabéet u séeb joʼochol. Tu yaʼalaj: ‹Kʼáat óolteʼex tiʼ u Yuumil le kool ka u túuxt uláakʼ máakoʼob utiaʼal le joochoʼ›. Tsʼoʼoleʼ tu yéeyaj 70 disipuloʼobeʼ ka tu  túuxtoʼob kʼaʼaytaj kaʼakaʼatúulil tiʼ tuláakal Judea. Tu kʼaʼaytoʼob u Reino Dios tiʼ tuláakal máak. Ka suunajoʼobeʼ taakchaj u jach tsikbaltikoʼob tiʼ Jesús bix biniktiʼob. Le Kʼaasilbaʼaloʼ maʼ páajchaj u beetik mix baʼal utiaʼal u xuʼulul le kʼaʼaytajoʼ.

Jesuseʼ tu kaʼansaj tubeel u disipuloʼob utiaʼal u seguer u kʼaʼaytajoʼob ken tsʼoʼokok u bin teʼ kaʼanoʼ. Tu yaʼalajtiʼob: ‹Kʼaʼayteʼex tiʼ tuláakal yóokʼol kaab le baʼax ken u beet le Reinooʼ. Kaʼanseʼex u Tʼaan Dios tiʼ le máakoʼoboʼ yéetel tsʼáaʼex u yokjaʼob›.

«Kʼaʼabéet xan in kʼaʼaytik u maʼalob péektsilil u Reino Dios tiʼ uláakʼ kaajoʼob, tumen le beetik túuxtaʼaben.» (Lucas 4:43)