Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 66

Esdraseʼ tu kaʼansaj u Ley Dios

Esdraseʼ tu kaʼansaj u Ley Dios

Tsʼoʼok u máan kex 70 años suunak u maas yaʼabil le israelitaʼob tu kaajil Jerusalenoʼ. Chéen baʼaleʼ jujuntúuleʼ láayliʼ kajaʼan tiʼ jejeláas tuʼuxoʼob tu luʼumil Persiaeʼ. Juntúul tiʼ letiʼobeʼ Esdras, letiʼeʼ juntúul sacerdote ku kaʼansik kaʼach u Ley Jéeoba. Esdraseʼ tu yojéelteʼ u kajnáaliloʼob Jerusaleneʼ maʼ táan u beetkoʼob le baʼax ku yaʼalik le Leyoʼ, le oʼolal u kʼáat bin u yáantoʼob. Artajerjes u reyil Persiaeʼ tu yaʼalajtiʼ: ‹Dioseʼ tsʼoʼok u tsʼáaiktech naʼat utiaʼal a kaʼansik u Ley. Xeen yéetel bis jeʼel máaxak u kʼáat bin ta wéeteleʼ›. Esdraseʼ tu muchʼuba yéetel tuláakal le máaxoʼob taak u bin Jerusalenoʼ. Letiʼobeʼ tu kʼáatoʼob tiʼ Jéeoba ka kanáantaʼakoʼob teʼ bejoʼ, ka túun tu káajsaj u binoʼob.

Ka máan cuatro meseseʼ kʼuchoʼob Jerusalén. U principeiloʼob le kaajoʼ tu yaʼaloʼob tiʼ Esdras: ‹Le israelitaʼoboʼ maʼ u beetoʼob baʼax ku yaʼalik Jéeobaiʼ, tumen tsʼoʼok u beeloʼob yéetel koʼoleloʼob adorartik maʼ jaajil diosoʼobiʼ›. ¿Baʼax túun tu beetaj Esdras? Xolaj tu táan le kaajoʼ ka tu yaʼalaj: ‹Jéeoba, techeʼ jach yaʼab baʼal tsʼoʼok a beetik t-oʼolal, chéen baʼaleʼ toʼoneʼ tsʼoʼok k-kʼebantal ta táan›. Le israelitaʼoboʼ arrepentirnajoʼob, chéen baʼaleʼ láayliʼ kʼaʼabéet u yáantaʼaloʼob u beetoʼob baʼax maʼalobeʼ. Le oʼolal Esdraseʼ tu yéeyaj juezoʼob yéetel u nuuktakiloʼob le kaajoʼ utiaʼal ka áantaʼakoʼoboʼ. Tu yáamil tres meseseʼ láaj jóoʼsaʼab le máaxoʼob maʼ tu yóotoʼob u adorartoʼob Jéeobaoʼ.

Máan 12 años. Ichil le bukaʼaj tiempooʼ jel beetaʼab u baʼpakʼiloʼob Jerusalén. Esdraseʼ tu muchʼaj le israelitaʼob tu kʼíiwikil le kaaj utiaʼal u xokik tiʼob u Ley Diosoʼ. Le ka tu jeʼekʼabtaj u libroil le Leyoʼ tuláakal le yanoʼoboʼ waʼalajoʼob. Esdraseʼ tu alabartaj Jéeoba, le israelitaʼob túunoʼ tu líiʼsaj u kʼaboʼob utiaʼal u yeʼeskoʼob ku kʼamkoʼob le baʼax ku yaʼalik Esdrasoʼ. Ka tsʼoʼokeʼ tu xokaj yéetel tu tsolaj le baʼax ku yaʼalik le Leyoʼ. Le kaajoʼ jach tu chʼenxikintaj Esdras. Letiʼob túuneʼ tu tsʼáajoʼob cuenta tsʼoʼok u kaʼa náachtaloʼob tiʼ Jéeoba ka túun joʼopʼ u yokʼoloʼob. Ka sáaschajeʼ, Esdraseʼ seguernaj u xokik tiʼob le Leyoʼ. Le israelitaʼoboʼ tu yiloʼobeʼ jach taʼaytak u kʼuchul u kʼiinil u Kʼiinbesajil le Paseloʼoboʼ. Ka joʼopʼ túun u líiʼskubaʼob utiaʼal le kʼiinbesajaʼ.

 Le israelitaʼoboʼ jach kiʼimakchaj u yóoloʼob le siete kʼiinoʼob táan le kʼiinbesajoʼ. Tu tsʼáajoʼob gracias tiʼ Jéeoba úuchik u yantal yaʼab u yich u paakʼaloʼob. Desde ka kíim Josueeʼ maʼ beetaʼak junpʼéel kʼiinbesaj jeʼex lelaʼ. Ka tsʼoʼokeʼ tu muchʼubaʼobeʼ ka orarnajoʼob: ‹Jéeoba, teech beet u xuʼulul k-palitsiltaʼal. Ta tsʼáaj baʼal k-jaant le tiaʼanoʼon teʼ desiertooʼ, bey xan ta tsʼáajtoʼon le jatsʼuts luʼumaʼ. Chéen baʼaleʼ toʼoneʼ yaʼab u téenel maʼ k-uʼuy a tʼaaniʼ. Kex ta túuxtaj yaʼab profetaʼob u yaʼaltoʼon maʼ maʼalob baʼax táan k-beetkeʼ, maʼ t-beetaj u cuentailiʼ. Kex beyoʼ ta weʼesaj paciencia. Mix juntéen ta tuʼubsaj le baʼax ta prometertaj tiʼ Abrahanoʼ. Beoraaʼ k-prometertik yaan k-uʼuyik a tʼaan›. Le kaajoʼ tu tsʼíibtaj le baʼax tu prometertoʼ, ka tsʼoʼokeʼ sellartaʼab tumen le principeʼob, le levitaʼob yéetel le sacerdoteʼoboʼ.

«¡Kiʼimak u yóol le máaxoʼob ku chʼenxikintikoʼob yéetel ku beetkoʼob baʼax ku yaʼalik Diosoʼ!» (Lucas 11:28)