Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

U TIPʼAʼANIL

Jesús, le Mesías aʼalaʼan u taaloʼ

Jesús, le Mesías aʼalaʼan u taaloʼ

JÉEOBAEʼ tu tsʼáaj u yojéelt tiʼ u profetaʼob yaʼab baʼaloʼob yoʼolal le Mesíasoʼ, le Salvador aʼalaʼan u taaloʼ. Maʼ talam k-ojéeltik máax le Mesíasoʼ, tumen le profetaʼoboʼ tu yaʼaloʼob bix kun síijil, baʼaxoʼob ken u beete yéetel bix kun kíimil. Tuláakal le baʼaxoʼob aʼalaʼab yoʼolal le Mesíasoʼ láaj béeychajoʼob tiʼ Jesús. Utiaʼal k-ilik jach bey úuchikoʼ, koʼox ilik le profecíaʼob tʼaanajoʼob tiʼ u síijiloʼ yéetel tiʼ baʼaxoʼob kun úuchul tu paalil.

Le profeta Isaíasoʼ tu yaʼaleʼ tiʼ u chʼiʼibal David kun taal le Mesíasoʼ (Isaías 9:7). Jach bey úuchikoʼ: Jesuseʼ tiʼ taal tiʼ u chʼiʼibal le Reyaʼ (Mateo 1:1, 6-17).

Miqueas, uláakʼ u profeta Dioseʼ, tu yaʼaleʼ tu kaajil «Belén Efrata» kun síijil le Mesíasoʼ yéetel yaan u kʼuchul u beetuba gobernantei (Miqueas 5:2). Ka taal Jesús way Luʼumeʼ, tu luʼumil Israeleʼ yaan kaʼapʼéel kaaj ku kʼaabaʼtikoʼob Belén. Upʼéeleʼ tiaʼan tu xamanil wa u nortei Israeleʼ, naatsʼ tiʼ Nazaret; uláakʼoʼ tiʼ pʼaatal Judaeʼ, naatsʼ tiʼ Jerusalén. Le pʼaatal kaʼach naatsʼ tiʼ Jerusalenoʼ u kʼaabaʼ kaʼacheʼ Efrata. Teʼ kaajaʼ tiʼ síij Jesusiʼ, jach jeʼel bix aʼalaʼabikoʼ (Mateo 2:1).

Le Biblia xanoʼ tu yaʼaleʼ Dioseʼ yaan u tʼanik u Paal tiʼ u «luʼumil Egipto». Jach xan bey úuchikoʼ; tu paalileʼ Jesuseʼ bisaʼab tu luʼumil Egipto, baʼaleʼ ku maan kʼiineʼ, le ka kíim le rey Herodesoʼ, Jesuseʼ suunaj tu luʼumil Judá. Bey béeychajik le baʼax u yaʼalmaj le Bibliaoʼ (Oseas 11:1; Mateo 2:15).

Teʼ cuadro ku kʼaabaʼtik [«Le profecíaʼob ku tʼaanoʼob tu yoʼolal le Mesíasoʼ»], le tekstoʼob yaan yáanal le tʼoʼol ku kʼaabaʼtik «Tuʼux aʼalaʼan», ku tʼaan tiʼ jujumpʼéel baʼaloʼob yaan yil yéetel le Mesíasoʼ. Maʼalob ka ket yéetel le tekstos yaan teʼ tʼoʼol ku kʼaabaʼtik «Bix béeychajik». Bey túunoʼ yaan a maas ilik jach jaaj baʼax ku yaʼalik u Tʼaan Dios.

Ken a xok le baʼaxoʼob aʼalaʼanaʼ, kʼaʼabéet a kʼaʼajsikeʼ yaʼabach jaʼaboʼob u bin u síijil Jesús ka tsʼíibtaʼabi. Jesuseʼ tu yaʼalaj: «Kʼaʼabéet[iliʼ] u tsʼoʼokbesaʼal tuláakal baʼax tsʼíibaʼan tin woʼolal tu [ley] Moisés, tu tsʼíiboʼob le [profetaʼoboʼ] yéetel tiʼ le Salmoʼoboʼ» (Lucas 24:44). Ta Bibliaeʼ jeʼel u páajtal a wilik jach jaaj béeychaj tuláakal le baʼax tsʼíibtaʼab tu yoʼolal Jesusoʼ.

BAʼAXOʼOB AʼALAʼAN TU YOʼOLAL LE MESÍASOʼ
BAʼAX AʼALAʼN TUʼUX AʼALAʼAN BIX BÉEYCHAJIK
Tiʼ kun taal tiʼ u chʼiʼibal Judaeʼ Génesis 49:10 Lucas 3:23-33
Yaan u síijil tiʼ utúul sujuy chʼúupal wa virgen Isaías 7:14 Mateo 1:18-25
Tiʼ kun taal tiʼ u chʼiʼibal le rey Davidoʼ Isaías 9:7 Mateo 1:1, 6-17
Jéeobaeʼ yaan u yaʼalik u Hijo Salmo 2:7 Mateo 3:17
Maʼ kun kʼambil Isaías 53:1 Juan 12:37, 38
Tu yóokʼol utúul burro kun okol tu kaajil Jerusalén Zacarías 9:9 Mateo 21:1-9
Yaan u koʼonol tumen utúul u amigo Salmo 41:9 Juan 13:18, 21-30
Yaan u koʼonol yoʼolal 30 upʼéelel u taakʼinil plata Zacarías 11:12 Mateo 26:14-16
Maʼ ken u yaʼal mix baʼal ken joʼopʼok u taʼakal u pool Isaías 53:7 Mateo 27:11-14
Yaan u báaxtaʼal buul utiaʼal u tʼoʼoxol u nookʼ Salmo 22:18 Mateo 27:35
Yaan u pʼaʼastaʼal chʼuykíintaʼan teʼ cheʼoʼ Salmo 22:7, 8 Mateo 27:39-43
Mix upʼéel u baakel kun kachbil Salmo 34:20 Juan 19:33, 36
Yaan u muʼukul ich ayikʼaloʼob Isaías 53:9 Mateo 27:57-60
Yaan u kaʼa kuxkíintaʼal táanil tiʼ u kʼastal u wíinklil Salmo 16:10 Beetaʼanoʼob 2:24, 27
Dioseʼ yaan u tsʼáaik tu x-noʼoj Salmo 110:1 Beetaʼanoʼob 7:56

← Ilawil le xook ku tʼaan tiʼ lelaʼ