Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 2: Upʼéel jatsʼuts kúuchil

Tsikbal 2: Upʼéel jatsʼuts kúuchil

¡ILAWIL le Luʼumaʼ! ¡Jach jatsʼuts tuláakal! Il le xíiwoʼoboʼ, le cheʼoboʼ, le looloʼoboʼ, yéetel le baʼalcheʼoboʼ. ¿Táan wa wilik le elefante yéetel le leónoʼoboʼ?

Baʼalcheʼob yanoʼob tu jardinil Edén

¿Bix úuchik u yantal le jatsʼuts kúuchilaʼ? Koʼox ilik bix úuchik u jatsʼutskíintaʼal le Luʼum tumen Dios utiaʼal u tsʼáatoʼoneʼexaʼ.

Yáaxeʼ, Dioseʼ tu beetaj u jóokʼol suʼuk utiaʼal u pixik le luʼumaʼ. Tu beetaj xan u jejeláasi mejen xíiwoʼob, mejen cheʼob yéetel nukuch cheʼob. Leloʼobaʼ ku jatsʼutskíintkoʼob le Luʼumaʼ. Baʼaleʼ, maʼ chéen le u beelaloʼobiʼ. Yaʼab tiʼobeʼ ku tsʼáaiktoʼon xan kiʼikiʼ janalbeʼen ichoʼob.

Ku tsʼoʼoleʼ, Dioseʼ tu beetaj kayoʼob utiaʼal ka kuxlakoʼob ichil le jaʼoʼ, tu beetaj xan chʼíichʼoʼob utiaʼal xikʼnal. Tu beetaj peekʼoʼob, miisoʼob yéetel tsíiminoʼob; baʼalcheʼob nuuktak yéetel mejentak. ¿Yaan wa baʼalcheʼob naatsʼ ta wotoch? ¡Bukaʼaj utsil Dios úuchik u beetik tuláakal utiaʼal u tsʼáatoʼoneʼex!

Tu tsʼookeʼ, Dioseʼ tu jatsʼutskíintaj u xóotʼ tiʼe Luʼumaʼ. Tu tsʼáaj u kʼaabaʼt jardín tiʼ Edén. Tuláakal jach maʼalob yéetel jach jatsʼuts kaʼachi. Dioseʼ u kʼáat kaʼach ka pʼáatak tuláakal le Luʼum jeʼex le jatsʼuts kúuchil tu beetoʼ.

Baʼaleʼ, ilawil le dibujo tu kaʼatéenoʼ. ¿A wojel wa baʼax tu yilaj Dios ku binetik kaʼach teʼ jatsʼuts kúuchilaʼ? Koʼox ilik.

Génesis 1:11-25; 2:8, 9.



Kʼáatchiʼob

  • ¿Bix úuchik u jatsʼutskíintaʼal le Luʼum tumen Dios utiaʼal u tsʼáatoʼoneʼexaʼ?
  • Dioseʼ yaʼab baʼalcheʼob tu beetaj, ¿yaan wa kʼajaʼantech u kʼaabaʼiʼ? (Ile dibujooʼ.)
  • ¿Baʼaxten jach jatsʼuts kaʼach le jardín tiʼ Edenoʼ?
  • ¿Bix kaʼach u kʼáat Dios ka pʼáatak tuláakal le Luʼumaʼ?

Uláakʼ kʼáatchiʼob

  • Xokaʼak Génesis 1:11-25.

    ¿Baʼax tu beetaj Dios tu óoxpʼéel kʼiinil káajak u beetik le baʼaloʼoboʼ? (Gén. 1:12.)

    ¿Baʼax úuch tu kampʼéel kʼiinil káajak u beetaʼal baʼaloʼob? (Gén. 1:16.)

    ¿Baʼax baʼalcheʼiloʼob beetaʼab tumen Dios tu cinco kʼiin yéetel tu seis kʼiin káajak u beetik baʼaloʼob? (Gén. 1:20, 21, 25.)

  • Xokaʼak Génesis 2:8, 9.

    ¿Baʼax kaʼapʼéel cheʼi tu tsʼáaj Dios tu chúumuk le jatsʼuts kúuchiloʼ, yéetel baʼax u kʼáat yaʼaloʼob?