Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 94: U yaabilma le mejen paalaloʼ

Tsikbal 94: U yaabilma le mejen paalaloʼ

ILAWIL Jesús u méekʼmaj le chan xiʼipalaʼ. Jeʼex a wilkoʼ Jesuseʼ u yaabilma le mejen paalaloʼ. Le máaxoʼob jach paktikoʼ, u apóstoloʼob. ¿A wojel wa baʼax ku yaʼalaʼaltiʼob tumen Jesús?

Jesús yéetel u apóstoloʼobeʼ táant u suutoʼob tiʼ upʼéel xíimbal jach náacheʼ. Teʼ bejoʼ le apóstoloʼoboʼ táan kaʼach u taal u baʼateʼel tʼaanoʼob. Le beetik ka kʼuchoʼobeʼ kʼáataʼabtiʼob tumen Jesús: ¿Baʼax ku taal a baʼateltʼantkeʼex? Jesuseʼ u yojel baʼax ku taal u baʼateltikoʼob. Baʼaleʼ tu kʼáatajtiʼob yoʼolal u yuʼubik baʼax ken u yaʼaloʼob.

Jesús yéetel le mejen paalaloʼoboʼ

Le apóstoloʼoboʼ maʼ tu núukoʼobiʼ, tumen teʼ bejoʼ táan u taal u baʼateltʼankoʼob máax tiʼ letiʼob u maas nojchil. Yanoʼobeʼ u kʼáat u beetubaʼob maas nojchil tiʼ u chuukanoʼob. ¿Bix túun kun kaʼansbiltiʼob tumen Jesús maʼ maʼalob u tsʼíiboltik máak u beetkuba maas nojchiliʼ?

Letiʼeʼ tu tʼanaj le chan xiʼipalaʼ ka tu tsʼáaj táanil tiʼob. Ka túun tiaʼalaj tiʼ u j-kaambaloʼob: Lelaʼ letiʼe baʼax in kʼáat ka jach ojéelteʼexaʼ: Wa maʼ ta kʼexik a tuukuleʼex yéetel ka beetabaʼex jeʼex mejen paalaleʼ, maʼatan a wookleʼex tu reino Dios. Le máax maas nojoch ichil le reinooʼ letiʼe ku beetkuba bey jeʼex le chan xiʼipalaʼ. ¿A wojel wa baʼaxten tiaʼalaj leloʼ?

Tumen paalal jach mejentakeʼ, maʼatech u tuklik u beetkubaʼob maas nojchil tiʼ u maasil. Le oʼolal le apóstoloʼoboʼ kʼaʼabéet u tuukuloʼob jeʼex mejen paalaleʼ, yéetel maʼ u baʼateltik u beetkubaʼob maas nojchil.

Jesuseʼ yaʼab u téenel tu yeʼesaj jach u yaabilmaj le mejen paalaloʼoboʼ. Maʼ jach úuch u beet Jesús lelaʼaʼ, ka taasaʼab jujuntúul mejen paalal tu yiknal. Le apóstoloʼob túunoʼ tu yóotaj u náachkuntoʼob. Baʼaleʼ, Jesuseʼ tiaʼalajtiʼob: Chaʼex u taal le mejen paalal tin wiknaloʼ, maʼ náachkuntkeʼexoʼob, tumen u reino Dioseʼ utiaʼal máakoʼob bey jeʼex letiʼoboʼ. Ka túun tu méekʼaj le mejen paalaloʼ yéetel tu kʼáat óoltaj xan ka xiʼik utsil tiʼob. ¿Máasaʼ ku taasiktoʼon kiʼimak óolal k-ojéeltik jach yaabiltaʼan le mejen paalal tumen Jesusoʼ?

San Mateo 18:1-4; 19:13-15; San Marcos 9:33-37; 10:13-16.



Kʼáatchiʼob

  • Le táan u suutoʼob Jesús tiʼ upʼéel xíimbal jach náach tsʼoʼok u beetkoʼobeʼ, ¿baʼax ku taal u baʼateltʼantik u apóstoloʼob?
  • ¿Baʼaxten Jesuseʼ tu tʼanaj utúul chan xiʼipal u tsʼáaj táanil tiʼe apóstoloʼoboʼ?
  • ¿Tiʼ baʼax kʼaʼabéet u beetkuba le apóstoloʼob jeʼex le mejen paalaloʼoboʼ?
  • Maʼ jach úuch u beet Jesús lelaʼaʼ, ¿bix tu yeʼesil u yaabilmaj le mejen paalaloʼ?

Uláakʼ kʼáatchiʼob

  • Xokaʼak San Mateo 18:1-4.

    ¿Baʼaxten meyajnaj kettʼaanoʼob tiʼ Jesús utiaʼal u kaʼansaj? (Mat. 13:34, 36; Mar. 4:33, 34.)

  • Xokaʼak San Mateo 19:13-15.

    ¿Baʼax modosi yaan tiʼe mejen paalal unaj u yantaltoʼon utiaʼal ka k-kʼam utsiloʼob tiʼ u Reino Diosoʼ? (Sal. 25:9; 138:6; 1 Cor. 14:20.)

  • Xokaʼak San Marcos 9:33-37.

    ¿Baʼax tu kaʼansaj Jesús tiʼ u j-kaambaloʼob kʼaʼabéet u beetik le máax taak u beetkuba maas nojchileʼ? (Mar. 9:35; Mat. 20:25, 26; Gál. 6:3; Fili. 2:5-8.)

  • Xokaʼak San Marcos 10:13-16.

    ¿Utstutʼaan wa Jesús u náatsʼal máak tu yiknal, yéetel baʼax jeʼel u kanik le nuxiboʼob tiʼ letiʼoʼ? (Mar. 6:30-34; Fili. 2:1-4; 1 Tim. 4:12.)