Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 86: Upʼéel eekʼ nuʼuktik le máakoʼoboʼ

Tsikbal 86: Upʼéel eekʼ nuʼuktik le máakoʼoboʼ
Astrologoʼob

¿TÁAN wa wilik le eekʼ jach nojoch u juul tuchʼubtaʼan tumen utúul tiʼe máakoʼobaʼ? Lelaʼ tu kaʼa iloʼob le ka jóokʼoʼob tu kaajil Jerusalenoʼ. Le máakoʼobaʼ Lakʼin u taaloʼob, u yojel u naʼatoʼob xan bix u péek le eekʼoʼoboʼ. Ku tuklikoʼobeʼ maʼ chéen yiknal wa máax ku bisaʼaloʼob tumen le eekʼaʼ.

Le máakoʼobaʼ ka kʼuchoʼob Jerusaleneʼ tu kʼáatoʼob: ¿Tuʼux yaan le chan xiʼipal ken u beetuba reyil tiʼe judíoʼoboʼ? Le judíoʼoboʼ láayliʼ letiʼe israelitaʼoboʼ. Letiʼobeʼ tiaʼaloʼob xan: Lakʼin t-yáax ilaj u eekʼeʼ, ka taaloʼon chintal tu táan.

Ka tu yojéeltaj Herodes, u reyil Jerusaleneʼ, jach péeknaj u yóol. Tumen sajak kaʼach u luʼsaʼal u reino tumen uláakʼ rey. Le beetik tu kʼáataj tiʼ u nuuktakil le j-kʼiinoʼoboʼ: ¿Tuʼux kun síijil le rey aʼalaʼan kun taaloʼ? Letiʼobeʼ tu núukoʼob: Le tsʼíiboʼoboʼ kiaʼalikeʼ tu kaajil Belén.

Herodes túuneʼ tiaʼalaj tiʼe máakoʼob Lakʼin u taaloʼoboʼ: Xeen a kaxteʼex le chan xiʼipaloʼ. Ken a kaxteʼex túuneʼ ka tsʼáakeʼex in wojéelt tuʼux yaan. Tumen in kʼáat xan bin chintal tu táan. ¡Baʼaleʼ Herodeseʼ u kʼáat kaʼach u kíims le chan xiʼipaloʼ!

Le eekʼ túunoʼ tu nuʼuktaj le máakoʼob tak tu kaajil Belenoʼ, jach le tuʼux yaan le chan xiʼipaloʼ tiʼ jeʼeliʼ. Ka ook túun le máakoʼob ichil le najoʼ, tu yiloʼob María yéetel chan Jesús. Letiʼobeʼ tu síijoʼob yaʼab baʼaloʼob tiʼ Jesús. Ka tsʼoʼokeʼ Jéeobaeʼ tiaʼalajtiʼob ich upʼéel wayakʼ maʼ u suutoʼob yiknal Herodes. Le oʼolal tu chʼaʼajoʼob yaanal bej utiaʼal u suutoʼob tu luʼumoʼob.

Ka tu yojéeltaj Herodes tsʼoʼok u bin le máakoʼoboʼ, jach kʼuuxilnaji. Ka tu túuxtaj kíimsbil tuláakal le chaambaloʼob, le yaan kaʼapʼéel jaʼab tiʼoboʼ yéetel le maas mejentakoʼob yanoʼob tu kaajil Belenoʼ. Baʼaleʼ, táanil tiʼ leloʼ Jéeobaeʼ tu tsʼáaj u yojéelt José ich upʼéel wayakʼ, José túuneʼ bin Egipto yéetel u familia. Ka máan kʼiineʼ, Joseiʼ tu yojéeltaj tsʼoʼok u kíimil Herodeseʼ, ka suunajoʼob yéetel Jesús tu kaajil Nazaret. Teʼeloʼ tiʼ túun nojochchaj Jesusiʼ.

¿Máax a tuklik beet u chíikpajal le eekʼoʼ? Kʼaʼajaktecheʼ, yáax Jerusalén bin le máakoʼob ka tsʼoʼok u yilkoʼob le eekʼoʼ. Satanás, u Kʼaasilbaʼaleʼ, u kʼáat kaʼach u kíims u Paal Dios, u yojel xaneʼ Herodes, u reyil Jerusaleneʼ, yaan xan u taaktal u kíimsik Jesús. Le beetikeʼ máax maas wa maʼ Satanás beet u chíikpajal le eekʼoʼ.

San Mateo 2:1-23; Miqueas 5:2.



Kʼáatchiʼob

  • ¿Máax le máakoʼob ka wilik teʼ dibujooʼ, yéetel baʼaxten utúuleʼ u tuchʼubmaj le eekʼ jach nojoch u juuloʼ?
  • ¿Baʼaxten jach péeknaj u yóol rey Herodes, yéetel baʼax tu beetaj?
  • ¿Tuʼux bisaʼab le máakoʼob tumen le eekʼ ku juuloʼ, baʼaleʼ baʼaxten tu chʼaʼajoʼob yaanal bej utiaʼal u suut tu luʼumoʼob?
  • ¿Baʼax tiaʼalaj Herodes ka beetaʼak, yéetel baʼaxten?
  • ¿Baʼax tiaʼalaj Jéeoba tiʼ José?
  • ¿Máax beet u chíikpajal le eekʼoʼ, yéetel baʼaxten?

Uláakʼ kʼáatchiʼ

  • Xokaʼak San Mateo 2:1-23.

    ¿Jaypʼéel jaʼab yaan tiʼ Jesús yéetel tuʼux kajaʼan kaʼach ka xíimbaltaʼab tumen le máaxoʼob ile eekʼeʼ? (Mat. 2:1, 11, 16.)