Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 100: Tiaʼan Jesús teʼ jardinoʼ

Tsikbal 100: Tiaʼan Jesús teʼ jardinoʼ

KA JÓOKʼ Jesús yéetel u apóstoloʼob teʼ tuʼux tu muchʼubaʼobeʼ, binoʼob tu jardinil Getsemaní. Yaʼab u téenel tsʼoʼok u taaloʼob teʼ kúuchilaʼ. Jesuseʼ tiaʼalajtiʼob maʼ u weenloʼob, ka payalchiʼinakoʼob; ka chan náachchajtiʼobeʼ, chinlajeʼ ka joʼopʼ u payalchiʼ.

Maʼ sen sáameʼeʼ, ka suunaj Jesús yiknal u apóstoloʼob. ¿Baʼax ka tuklik ku beetkoʼob? ¡Táan u weenloʼob! Óoxtéen aʼalaʼabtiʼob tumen Jesús ka u yil maʼ u weenloʼob, baʼaleʼ jeʼel jaytéen ka suunakeʼ ku yilik táan u weenloʼob. U tsʼook ka suunaj Jesuseʼ tiaʼalajtiʼob: ¿Láayliʼ wa táan a weenleʼex kex tsʼoʼok u kʼuchul u yorai in kʼubaʼal tiʼe máaxoʼob pʼekmilenoʼ?

Teʼ súutuk jeʼeloʼ uʼuyaʼab u juum u taal yaʼabach máakoʼob. ¡Ilawile! ¡Le máakoʼobaʼ u chʼaʼamoʼob u táatsʼ máaskaboʼob yéetel cheʼob ka taaloʼob! Tu taasoʼob xan tajcheʼob tʼabaʼantak. Ka náatsʼoʼobeʼ jóokʼ utúul ichiloʼobeʼ, ka taal yiknal Jesuseʼ ka tu tsʼuʼutsʼaj jeʼex a wilik teʼ dibujoaʼ. Le máax tsʼuʼutsʼkaʼ Judas Iscariote. ¿Baʼaxten túun táan u tsʼuʼutsʼik?

Jesuseʼ táan u traicionartik Jesús

Jesuseʼ tiaʼalajtiʼ: Judas, ¿yéetel wa upʼéel tsʼuʼutsʼ ka kʼubiken? Le úuchik u tsʼuʼutsʼkoʼ yaan baʼax tu chíikbesaj. Letiʼ beet u kʼaj óoltaʼal Jesús tumen le máakoʼob u yéet taal Judasoʼ. Le beetikeʼ, le máaxoʼob pʼekmil Jesusoʼ náatsʼoʼob u machoʼob. Baʼaleʼ Pedroeʼ maʼ tu chéen ilaj u bisaʼal Jesusiʼ. Tu jíilpaytaj u táatsʼ máaskabeʼ ka tu chʼakaj u x-noʼoj xikin utúul tiʼe máakoʼob yaan naatsʼ tiʼoʼ. Baʼaleʼ Jesuseʼ tu péetsʼkʼabtaj u xikin le máakoʼ ka tu tsʼakaj.

Jesús túuneʼ tiaʼalaj tiʼ Pedro: Sut a táatsʼ máaskab tu kúuchil. A tuklikeʼ, ¿maʼ wa tu páajtal in kʼáatik tiʼ in Taata yaʼabach ángeloʼob utiaʼal ku yáantenoʼob? ¡Jeʼel kaʼach u páajtal u kʼáatkeʼ! Baʼaleʼ Jesuseʼ maʼ tu beetiʼ. Tumen u yojel tsʼoʼok u kʼuchul u kʼiinil u machaʼal tumen le máaxoʼob pʼekmiloʼ. Letiʼeʼ tu chaʼaj u bisaʼal. Koʼox kanik baʼax kun úuchul tiʼ Jesús.

San Mateo 26:36-56; San Lucas 22:39-53; San Juan 18:1-12.



Kʼáatchiʼob

  • ¿Tuʼux bin Jesús yéetel u apóstoloʼob ka jóokʼoʼob teʼ tuʼux tu muchʼubaʼobeʼ, yéetel baʼax tiaʼalaj tiʼ u apóstoloʼob ka u beetoʼob?
  • ¿Ka suunaj Jesús yiknal u apóstoloʼobeʼ baʼax tu yilaj ku beetkoʼob, yéetel jaytéen úuch beyoʼ?
  • Jeʼex a wilik teʼ dibujooʼ, ¿máaxoʼob le tsʼoʼok u kʼuchloʼob teʼ jardinoʼ, yéetel baʼax ku beetik Judas?
  • ¿Baʼaxten tsʼuʼutsʼaʼab Jesús tumen Judas, yéetel baʼax tu beetaj Pedro?
  • ¿Baʼax tiaʼalaj Jesús tiʼ Pedro, baʼaleʼ baʼaxten Jesuseʼ maʼ tu kʼáataj tiʼ Dios ka túuxtaʼak ángeloʼob utiaʼal áantkiʼ?

Uláakʼ kʼáatchiʼob

  • Xokaʼak San Mateo 26:36-56.

    Le bix úuchik u tsol xikintik Jesús u j-kaambaloʼoboʼ, ¿baʼaxten jach maʼalob xan ka u beet le nuxiboʼob beyoʼ? (Mat. 20:25-28; 26:40, 41; Gál. 5:17; Efe. 4:29, 31, 32.)

    ¿Bix u yilik kaʼach Jesús u chʼaʼik máak u nuʼukulil baʼateʼel utiaʼal u kíimsik u yéet máakil? (Mat. 26:52; Luc. 6:27, 28; Juan 18:36.)

  • Xokaʼak San Lucas 22:39-53.

    Le ka taal utúul ángel utiaʼal líiʼsik u yóol Jesuseʼ, ¿u kʼáat wa u yaʼal táan kaʼach u minaʼantal u oksaj óolal? Tsolaʼak (Luc. 22:41-43; Isa. 49:8; Mat. 4:10, 11; Heb. 5:7).

  • Xokaʼak San Juan 18:1-12.

    ¿Bix úuchik u kanáantik Jesús u j-kaambaloʼob tiʼ le máaxoʼob pʼekmiloʼoboʼ, yéetel baʼax k-kanik tiʼ leloʼ? (Juan 10:11, 12; 18:1, 6-9; Heb. 13:6; Sant. 2:25.)