Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 113: Pabloeʼ tiaʼan Romaeʼ

Tsikbal 113: Pabloeʼ tiaʼan Romaeʼ

ILAWIL le cadenaʼob yéetel kʼaxaʼanil u kʼab Pablooʼ, ilawil xan le soldado romano kanáantkoʼ. Pabloeʼ tiʼ kʼalaʼan Romaeʼ. Táan u páaʼtik u yaʼalaʼal tumen u jalaʼachil Roma baʼax kun beetbil tu yéetel. Le kʼalaʼan kaʼach Pablooʼ, ku chaʼabal u bin xíimbaltbil.

Óoxpʼéel kʼiin kʼuchuk Pablo tu kaajil Romaeʼ, ka tu túuxtaj tʼambil u nojchiloʼob le judíoʼob ka taalakoʼob tu yiknaloʼ. Le beetik taal yaʼab tiʼe judíoʼob kajaʼanoʼob Romaoʼ. Pabloeʼ tu tsikbaltajtiʼob baʼaloʼob yaan yil yéetel Jesús bey xan yéetel u reino Dios. Yanoʼobeʼ tu oksaj óoltoʼobeʼ ka tu beetubaʼob cristianoi, baʼaleʼ uláakʼoʼobeʼ maʼ oksaj óolnajoʼobiʼ.

Pabloeʼ kʼalaʼan cárcel

Pabloeʼ tu tsikbaltaj xan u reino Dios tiʼe soldadoʼob kanáantkoʼ. Le kaʼapʼéel jaʼab kʼalaʼan Pablo Romaoʼ tu yilaj u kʼaʼaytaj tiʼ tuláakal le máaxoʼob páajchaj u tʼaan yéeteloʼoboʼ. Úuchik u beetik Pablo beyaʼ, tak yiknal u láakʼtsilil le jalaʼach kʼuch u tsikbalil le Reinooʼ, yaan tiʼ letiʼobeʼ kʼuch u beetubaʼob cristianoi.

Baʼaleʼ, ¿máax le uʼulab ku tsʼíiboʼ? ¿A wojel wa máax? Timoteo. Letiʼeʼ kʼalaʼab xan kaʼach ikil u kʼaʼaytik u Reino Dios, baʼaleʼ tsʼoʼok u chaʼabal. Tsʼoʼok u taal u yáant Pablo. ¿A wojel wa baʼax ku tsʼíibtik? Koʼox ilik.

¿Kʼajaʼan wa tech le noj kaajoʼob Filipos yéetel Efeso t-ilaj teʼ tsikbalil 110? Teʼ kaajoʼobaʼ áantajnaj Pablo utiaʼal ka yanak múuchʼuliloʼobiʼ. Beooraaʼ Pabloeʼ kʼalaʼan, táan u beetik tsʼíibil juʼunoʼob utiaʼal u túuxt tiʼe cristianoʼob kajaʼanoʼob teʼ kaajoʼobaʼ. Le tsʼíibil juʼunoʼobaʼ tiaʼanoʼob ichil le Bibliaoʼ u kʼaabaʼobeʼ, Tiʼ Efesoiloʼob yéetel Tiʼ Filiposiloʼob. Beoora túunaʼ, Pabloeʼ táan u tsolik tiʼ Timoteo baʼax ken u tsʼíibt tiʼ u yéet cristianoiloʼob kajaʼanoʼob Filipos.

Le cristianoʼobaʼ tsʼoʼok u jach yeʼesik u yutsiloʼob tiʼ Pablo. Yaan baʼax tu síioʼob tiʼ Pablo taasaʼab tiʼ tumen Epafrodito, le beetik táan u tsʼáaik u nib óolalil tiʼob. Baʼaleʼ Epafroditoeʼ jach kʼojaʼanchaji, óolak kíimik. Beoora túunaʼ tsʼoʼok u yutstal, maʼ kun xáantal ken suunak tu kaajal. Letiʼ xan kun bisik u tsʼíibil juʼun Pablo yéetel Timoteo ken suunak Filipos.

Teʼ cárcel xan yaan Pablo ka tu beetaj uláakʼ kaʼapʼéel tsʼíibil juʼunoʼob yaan ichil le Bibliaoʼ. Upʼéeleʼ utiaʼal le cristianoʼob yaan Colosasoʼ. ¿A wojel wa bix u kʼaabaʼ? U kʼaabaʼeʼ, Tiʼ Colosailoʼob. Uláakʼoʼ utiaʼal Filemón, utúul máak jach ku biskuba yéetel Pablo kajaʼan Colosas. Le tsʼíibil juʼunaʼ táan u tʼaan tiʼ Onésimo, u j-meyaj Filemón.

Onésimoeʼ púutsʼ tiʼ Filemoneʼ ka bin Roma. Maʼ k-ojel bix úuchik u yojéeltik tiʼ kʼalaʼan Pablo teʼ kaajaʼ, baʼaleʼ bin u xíimbalteʼ ka tsikbaltaʼab tiʼ tumen Pablo u maʼalob péektsilil le Reinooʼ. Onésimoeʼ maʼ xáanchaj ka tu beetuba cristianoiliʼ. Beoora túunaʼ, Onésimoeʼ yaachaj tu yóol úuchik u púutsʼul. Le oʼolaleʼ, ¿a wojel wa baʼax kiaʼalik Pablo tiʼ Filemón teʼ tsʼíibil juʼunoʼ?

Pabloeʼ táan u kʼáatik tiʼ Filemón ka u saʼas baʼax tu beetaj Onésimo. Pabloeʼ tu tsʼíibtaj: Táan in sutiktech, baʼaleʼ beooraaʼ maʼ chéen a j-meyajiʼ, letiʼeʼ a sukuʼun. Ka suunaj Onésimo Colosaseʼ tu bisaj le kaʼapʼéel tsʼíibil juʼunoʼoboʼ, upʼéeleʼ utiaʼal le colosailoʼoboʼ, uláakʼoʼ utiaʼal Filemón. ¡Chéen tukult bukaʼaj kiʼimakchajik u yóol Filemón ka tu yojéeltaj u j-meyajeʼ tsʼoʼok u beetkuba cristianoi xan!

Ka tsʼíibnaj Pablo tiʼe filiposiloʼob yéetel tiʼ Filemoneʼ, yaan jatsʼuts baʼaloʼob u tsikbal tiʼob. Pabloeʼ tiaʼalaj tiʼe filiposiloʼoboʼ: Táan in túuxtikteʼex Timoteo, baʼaleʼ maʼ tu xáantal ken xiʼiken in xíimbalteʼex. Tiʼ Filemoneʼ tu tsʼíibtaj: Kaxt upʼéel naj utiaʼal in kʼubéentkimba teʼeloʼ.

Ka chaʼab Pabloeʼ bin u xíimbalt u yéet sukuʼuniloʼob táantanxel kaajoʼob. Baʼaleʼ maʼ xáanchaj ka kʼaʼal Pablo tu kaʼatéen Romaiʼ. Pabloeʼ u yojel yaan u kíimsaʼal. Le beetik tu tsʼíibtaj tiʼ Timoteo ka séeb taalak tu yiknal, ka tiaʼalajtiʼ: Tsʼoʼok u chúukpajal in wóol in meyajt Dios, letiʼeʼ yaan u tsʼáaikten baʼax in náajalmaj. Maʼ úuch túun kíimik Pablo ka xuʼulsaʼab tu kaʼatéen tiʼ u kaajil Jerusaleniʼ, lelaʼ letiʼe romailoʼob beetoʼ.

Baʼaleʼ yaan uláakʼ baʼax ku tsolik le Bibliaoʼ. Apóstol Juaneʼ áantaʼab xan tumen Jéeoba u tsʼíibt u tsʼook u libroʼob, ichil leloʼobaʼ tiaʼan Apocalipsisiʼ. Lelaʼ ku tʼaan tiʼ baʼaxoʼob ku taal u kʼiin yúuchul. Koʼox kanik baʼaxoʼobiʼ.

Baʼaxoʼob (Hechos) 28:16-31; Tiʼ Filiposiloʼob 1:13; 2:19-30; 4:18-23; Tiʼ Hebreob 13:23; Tiʼ Filemón 1-25; Tiʼ Colosailoʼob 4:7-9; 2 tiʼ Timoteo 4:7-9.



Kʼáatchiʼob

  • Le kʼalaʼan Pablo tu kaajil Romaoʼ, ¿tiʼ máaxoʼob tu kʼaʼaytaj le maʼalob péektsiloʼ?
  • ¿Máax le uʼulab kulukbal yiknal le mesaoʼ, yéetel baʼax ku beetik utiaʼal u yáantik Pablo?
  • ¿Máax Epafrodito, yéetel baʼax tu bisaj ka suunaj Filipos?
  • ¿Baʼaxten Pabloeʼ tu beetaj upʼéel tsʼíibil juʼun utiaʼal u túuxt tiʼ Filemón?
  • Ka jáalkʼabtaʼab Pabloeʼ, ¿baʼax tu beetaj, yéetel baʼax úuchtiʼ?
  • ¿Máax meyajnaj tiʼ Jéeoba utiaʼal u tsʼíibtik u tsʼook u libroiloʼob le Bibliaoʼ, yéetel baʼax tiʼ ku tʼaan le libro Apocalipsisoʼ?

Uláakʼ kʼáatchiʼob

  • Xokaʼak u libroi Baʼaxoʼob 28:16-31 yéetel Tiʼ Filiposiloʼob 1:13.

    ¿Baʼax tu beetaj Pablo le kʼalaʼan tu kaajil Romaoʼ, yéetel tumen jach chúukpaj u yóoleʼ baʼax tu péeksaj u beet le cristianoʼoboʼ? (Bxob. 28:23, 30; Fili. 1:14.)

  • Xokaʼak Tiʼ Filiposiloʼob 2:19-30.

    ¿Baʼax jatsʼuts tʼaaniloʼob tu tsʼíibtaj Pablo tiʼ Timoteo bey xan tiʼ Epafrodito, yéetel bix xan jeʼel k-beetik jeʼex tu beetaj le apóstolaʼ? (Fili. 2:20, 22, 25, 29, 30; 1 Cor. 16:18; 1 Tes. 5:12, 13.)

  • Xokaʼak Tiʼ Filemón 1-25.

    ¿Baʼax tu kʼáat óoltaj Pablo tiʼ Filemón ka u beete, yéetel lelaʼ baʼax ku kaʼansik tiʼ le nuxiboʼob bejlaʼoʼ? (File. 9; 2 Cor. 8:8; Gál. 5:13.)

    U tʼaan Pablo Tiʼ Filemón 13, 14, ¿bix u yeʼesik ku tuukul tu yoʼolal le máaxoʼob yanoʼob ich le múuchʼuliloʼ? (1 Cor. 8:7, 13; 10:31-33.)

  • Xokaʼak 2 tiʼ Timoteo 4:7-9.

    Wa ku chúukpajal k-óol meyajt Jéeoba tak tu xuul jeʼex tu beetaj Pabloeʼ, ¿baʼaxten jeʼel u páajtal k-páaʼtik u yeʼesiktoʼon u yutsileʼ? (Mat. 24:13; Heb. 6:10.)