Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 110 : Timoteoeʼ u yéet kʼaʼaytaj Pablo

Tsikbal 110 : Timoteoeʼ u yéet kʼaʼaytaj Pablo

LE XIʼIPAL ka wilik yaan yiknal Pablooʼ, Timoteo. Timoteoeʼ tiʼ kajaʼan Listra yéetel u láakʼtsiloʼobeʼ. U mamaeʼ Eunice u kʼaabaʼ, u abuelaeʼ Loida.

U óoxtéen u taal Pablo xíimbal tu kaajil Listraaʼ. Óoliʼ u jaʼab yáax taalak Pablo yéetel Bernabé kʼaʼaytaj wayeʼ. Beooraaʼ Pabloeʼ taal yéetel Silas, u yéet kʼaʼaytaj.

Timoteo yéetel Pablo

¿A wojel wa baʼax kiaʼalik Pablo tiʼ Timoteo? Táan u kʼáatiktiʼ wa jeʼel u bin tu yéeteloʼob kʼaʼaytaj tuláakʼ kaajoʼobeʼ.

Timoteoeʼ tu núukaj: Jeʼel in bin ta wéeteleʼexeʼ. Le oʼolaleʼ maʼ xáanchajeʼ Timoteoeʼ tu pʼataj u láakʼtsilileʼ ka bin tu paachoʼob Pablo yéetel Silas. Baʼaleʼ táanil tiʼ k-kanik tuʼux kaajiloʼob binoʼobeʼ, koʼox kanik baʼax sen úuch tiʼ Pablo. Tsʼoʼok u máan diecisiete jaʼab chíikpajak Jesús tiʼ tu bejil Damasco.

¡Kʼaʼajaktecheʼ, Pabloeʼ bin kaʼach Damasco utiaʼal u beet u kʼalaʼal u j-kaambaloʼob Jesús, beoora túunaʼ Pabloeʼ utúul u j-kaambal xan Jesús! Maʼ xáanchajeʼ Pabloeʼ joʼopʼ u kaxtaʼal utiaʼal kíimsbil tumen le máaxoʼob pʼekmiloʼ, baʼaleʼ áantaʼab ka púutsʼuk tumen uláakʼ j-kaambaloʼob. Tsʼaʼab ichil upʼéel xaakeʼ ka jalkʼesaʼab tu paach u baʼpakʼil le noj kaajoʼ.

Ka tsʼoʼok lelaʼ, Pabloeʼ bin tu kaajil Antioquía kʼaʼaytaj. Teʼ kaajaʼ tiʼ yáax aʼalaʼab cristianoi tiʼe j-kaambaloʼoboʼ. Ku tsʼoʼokol túuneʼ Pablo yéetel Bernabeiʼ aʼalaʼabtiʼob ka xiʼikoʼob kʼaʼaytaj Antioquía tak teʼ náanach luʼumiloʼoboʼ. Upʼéel tiʼe noj kaajoʼob tu xíimbaltoʼoboʼ, Listra, u kaajal Timoteo.

Beooraaʼ, óoliʼ wal upʼéel jaʼab tsʼoʼok u máaneʼ, Pabloeʼ tiaʼan tu kaajil Listraeʼ, u kaʼatéen u taal xíimbalaʼaʼ. Le ka bin Timoteo tu paachoʼob Pablo yéetel Silaseʼ, ¿a wojel wa tuʼux binoʼob? Koʼox ilik teʼ mapaoʼ.

Yáaxeʼ, binoʼob Iconio, maʼ jach náach yaniliʼ; u kaʼapʼéel noj kaaj tu xíimbaltoʼobeʼ, Antioquía. Ku tsʼoʼoleʼ binoʼob Troas, ka máanoʼob tak Filipos, Tesalónica yéetel Berea. ¿Táan wa wilik Atenas teʼ mapaoʼ? Teʼ kaajaʼ kʼaʼaytajnaj xan Pabloiʼ. Ka tsʼoʼokeʼ u jaʼab ka tak táankoch kʼaʼaytnajoʼob Corinto. Tu tsʼoʼokbaleʼ jeʼeloʼob u súutuk Efeso. Ka túun suunajoʼob Cesarea tiʼ cheem, ku tsʼoʼoleʼ ka binoʼob Antioquía, teʼ túunoʼ tiʼ pʼáat Pabloiʼ.

Bey túunoʼ Timoteoeʼ yaʼabach kaaj tu xíimbaltaj táan u yáantik Pablo u kʼaʼayt u péektsilil le reinooʼ yéetel tu káajsoʼob múuchʼuliloʼob teʼ kaajoʼoboʼ. Ken nojochchajkecheʼ, ¿yaan wa u chúukpajal a wóol a meyajt Dios jeʼex tu beetaj Timoteooʼ?

Baʼaxoʼob (Hechos) 9:19-30; 11:19-26; capítuloʼob 13 tak 17; 18:1-22.

Junpʼéel mapa

1. Roma; 2. Malta; 3. Berea; 4. Tesalónica; 5. Corinto; 6. Filipos; 7. Atenas; 8. Creta; 9. Troas; 10. Efeso; 11. Mileto; 12. Colosas; 13. Antioquía; 14. Iconio; 15. Listra; 16. Chipre; 17. Antioquía; 18. Cesarea; 19. Jope; 20. Damasco; 21. Jerusalén; 22. Nojoch Kʼáaʼnáab (Mediterráneo)



Kʼáatchiʼob

  • ¿Máax le xiʼipal ka wilik teʼ dibujooʼ, tuʼux kajaʼan, yéetel bix u kʼaabaʼ u mama yéetel u abuela?
  • ¿Baʼax tu núukaj Timoteo ka kʼáataʼab tiʼ tumen Pablo wa jeʼel u bin kʼaʼaytaj tu yéeteloʼob teʼ náanach kaajoʼoboʼ?
  • ¿Tuʼux kaajil yáax aʼalaʼab cristianoi tiʼ u j-kaambaloʼob Jesús?
  • Ka lukʼoʼob Antioquíaeʼ, ¿máakalmáak le noj kaajoʼob tu xíimbaltoʼob Pablo, Silas yéetel Timoteoʼ?
  • ¿Bix úuchik u yáantaʼal Pablo tumen Timoteo teʼ kʼaʼaytajoʼ, yéetel baʼax tiʼ kʼaʼabéet u tuukul le táankelem paalaloʼob bejlaʼoʼ?

Uláakʼ kʼáatchiʼob

  • Xokaʼak u libroi Baʼaxoʼob 9:19-30.

    ¿Bix úuchik u kanáantkuba Pablo ka joʼopʼ u chʼaʼapachtaʼal ikil u tsikbaltik le maʼalob péektsiloʼ? (Bxob. 9:22-25, 29, 30; Mat. 10:16.)

  • Xokaʼak u libroi Baʼaxoʼob 11:19-26.

    Le tsikbal yaan tu libroi Baʼaxoʼob 11:19-21, 26, ¿bix u yeʼesik Jéeoba nuʼuktik le kʼaʼaytaj yéetel u kiliʼich muukʼoʼ?

  • Xokaʼak u libroi Baʼaxoʼob 13:13-16, 42-52.

    ¿Bix u yeʼesik u libroi Baʼaxoʼob 13:51, 52 maʼ lúuʼsaʼab u yóol le j-kaambaloʼob tumen le chʼaʼapachtajiloʼ? (Mat. 10:14; Bxob. 18:6; 1 Ped. 4:14.)

  • Xokaʼak u libroi Baʼaxoʼob 14:1-6, 19-28.

    Utiaʼal maʼ k-sen chiʼichnaktal le táan k-áantik utúul máak káajal ku beetik u kaambaleʼ, ¿bix jeʼel u yáantkoʼon le tʼaan «tu kʼubéentajoʼob tiʼ Yuumtsil [wa Jéeoba]»? (Bxob. 14:21-23; 20:32; Juan 6:44.)

  • Xokaʼak u libroi Baʼaxoʼob 16:1-5.

    Úuchik u súutkʼuptkuba Timoteoeʼ, ¿bix u yeʼesik u kʼaʼabéetil u beetaʼal «tuláakal le baʼaloʼob[…] tu yoʼolal le maʼalob péektsiloʼ»? (Bxob. 16:3; 1 Cor. 9:23; 1 Tes. 2:8.)

  • Xokaʼak u libroi Baʼaxoʼob 18:1-11, 18-22.

    ¿Bix u yeʼesik u libroi Baʼaxoʼob 18:9, 10 Jesús nuʼuktik le kʼaʼaytajoʼ, yéetel bix u líiʼsik k-óol k-ojéeltik? (Mat. 28:20.)