Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 107 : Muuruxtuntaʼab Esteban

Tsikbal 107 : Muuruxtuntaʼab Esteban

LE MÁAK xolokbaloʼ Esteban. Utúul u j-kaambal Jesús jach chúukaʼan u yóol. ¡Ilawil baʼax ku beetaʼaltiʼ! Le máakoʼobaʼ táan u chʼiʼinchʼinkoʼob yéetel nukuch tuunich. ¿Baʼaxten jach tu pʼektoʼob Esteban ka tu muuruxtuntoʼob? Koʼox ilik.

Táan u muuruxtuntaʼal Esteban

Dioseʼ táan u yáantik Esteban u beet nukuch milagroʼob. Le j-kʼiinoʼoboʼ maʼ utstutʼaanoʼobiʼ, le oʼolal tu pʼektoʼob Esteban tumen ku kaʼansik u jaajil tiʼe máakoʼoboʼ. Baʼaleʼ Dioseʼ tu tsʼáaj yaʼab naʼat tiʼ Esteban utiaʼal u yeʼesik maʼ jaaj baʼax ku kaʼansik le máakoʼobaʼ. Lelaʼ tu beetaj u maas kʼuuxil le j-kʼiinoʼoboʼ, ka túun tu machoʼob Esteban yéetel tu taasoʼob máakoʼob u yaʼaloʼob baʼaloʼob maʼ jaajtak tu yoʼolaliʼ.

Le nojoch j-kʼiin túunoʼ tu kʼáatajtiʼ: ¿Jaaj wa le baʼax kiaʼalik le máakoʼobaʼ? Estebaneʼ tu núukaj yéetel le baʼaxoʼob tsʼíibtaʼan teʼ Bibliaoʼ. Utiaʼal u tsʼoʼokbal u tsikbal túuneʼ tiaʼalaj: Úuchileʼ, kʼasaʼan máakoʼob pʼekt u profetaʼob Dios. Teʼex xaneʼ beyeʼexoʼ. Ta kíimseʼex Jesús, u palitsil Dios, yéetel maʼ a beeteʼex baʼax u kʼáat Diosiʼ.

¡Lelaʼ tu jach kʼuuxbesaj le j-kʼiinoʼoboʼ! Ka joʼopʼ tak u kʼuʼukʼux ku kojoʼob. Estebaneʼ tu jawaj u yich kaʼaneʼ, ka tiaʼalaj: ¡Ileʼex! Táan in wilik Jesús waʼalakbal tu x-noʼoj Dios teʼ kaʼanoʼ, le máakoʼobaʼ tu makaj u xiknoʼob utiaʼal maʼ u yuʼubkoʼob baʼax kiaʼalik Esteban, ka tsʼoʼokeʼ ka tu jíiltaj u jóoʼsoʼob paach kaaj.

Teʼ túunoʼ tu pʼataj u nookʼoʼob kanáantbi tumen Saulo. ¿Táan wa wilik Saulo? Le máakoʼob túunaʼ joʼopʼ u chʼiʼinchʼinkoʼob Esteban. Esteban túuneʼ xolaj jeʼex a wilik teʼ dibujoaʼ, ka payalchiʼinaj tiʼ Dios: Jéeoba, maʼ castigarkoʼob yoʼolal le baʼax ku beetkoʼobaʼ. Estebaneʼ u yojel jujuntúul tiʼe máaxoʼob chʼiʼinchʼinkoʼ tusaʼanoʼob tumen le j-kʼiinoʼoboʼ. Ku tsʼoʼokol túuneʼ ka kíim Esteban.

Ken beetaʼaktech wa baʼax kʼaaseʼ, ¿ka sutik wa u jeel? ¿Ka kʼáat óoltik wa ka xiʼik kʼaasil tiʼe máax beetik techoʼ? Mix Esteban, mix Jesús beet beyoʼ. Letiʼobeʼ tu yeʼesaj u yutsiloʼob tak tiʼe máaxoʼob pʼektoʼoboʼ. Bey xan kʼaʼabéet k-beetkeʼexoʼ.

Baʼaxoʼob (Hechos) 6:8-15; 7:1-60.



Kʼáatchiʼob

  • ¿Máax Esteban, yéetel baʼax ku yáantaʼal kaʼach u beet tumen Dios?
  • ¿Baʼax tiaʼalaj Esteban tu beetaj u maas kʼuuxil le j-kʼiinoʼoboʼ?
  • ¿Baʼax beetaʼab tiʼ Esteban le ka jíiltaʼab jóoʼsbil paach kaajeʼ?
  • ¿Máax le táankelem xiʼipal ka wilik teʼ dibujo kanáantik le nookʼoʼoboʼ?
  • Táanil tiʼ u kíimil Estebaneʼ, ¿baʼax tu kʼáataj tiʼ Jéeoba?
  • Wa yaan baʼax kʼaas ku beetaʼal toʼoneʼ, ¿bix jeʼel u páajtal k-beetik jeʼex tu beetaj Estebaneʼ?

Uláakʼ kʼáatchiʼob

  • Xokaʼak u libroi Baʼaxoʼob 6:8-15.

    ¿Baʼaxoʼob tsʼoʼok u meyaj tiʼ u nuuktakil le religionoʼob utiaʼal u yilik u xuʼulskoʼob u kʼaʼaytaj le j-jaajkunajoʼoboʼ? (Bxob. 6:9, 11, 13.)

  • Xokaʼak u libroi Baʼaxoʼob 7:1-60.

    ¿Baʼax áant Esteban u tsol tubeel le maʼalob péektsil tu táan le Sanedrinoʼ, yéetel baʼax k-kanik tiʼ le baʼax tu beetoʼ? (Bxob. 7:51-53; Rom. 15:4; 2 Tim. 3:14-17; 1 Ped. 3:15.)

    ¿Baʼax modosi kʼaʼabéet k-eʼesik tiʼ le máaxoʼob maʼatech u kʼamkoʼob le maʼalob péektsil k-biskoʼ? (Bxob. 7:58-60; Mat. 5:44; Luc. 23:33, 34.)