Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 103 : Ichil upʼéel naj kʼalaʼan

Tsikbal 103 : Ichil upʼéel naj kʼalaʼan

KA LUKʼ Pedro yéetel Juan tu muknal Jesuseʼ, Maríaeʼ pʼáatiʼiʼ, ka joʼopʼ u yokʼol. ¡Ka chʼeenebnaj ich le muknaloʼ kaʼatúul ángel tu yiliʼiʼ! Letiʼobeʼ tu kʼáatoʼob tiʼ María: ¿Baʼaxten ka wokʼol?

María túuneʼ tu núukaj: Tumen tsʼoʼok u bisaʼal in Yuumtsil, ku tsʼoʼoleʼ maʼ in wojel tuʼux tsʼaʼabiʼ. Ka tu sutubaeʼ tiaʼan utúul máak paachil tiʼeʼ. Le máakoʼ tu kʼáatajtiʼ: ¿Máax ka kaxtik?

Maríaeʼ tu tuklaj letiʼe jardinerooʼ, yéetel tu tuklaj letiʼ bis u wíinklil Jesuseʼ. Le beetik tiaʼalajtiʼ: Wa teech biseʼ, aʼalten tuʼux ta tsʼáaj. Baʼaleʼ le máakaʼ, Jesús. Chéen yaanal u wíinklil, le oʼolal maʼ kʼaj óoltaʼab tumen Maríaiʼ. Baʼaleʼ úuchik u tʼaʼanal tu kʼaabaʼ tumen Jesuseʼ, ka tu kʼaj óoltaj. Ka bin áalkabil u yaʼal tiʼe j-kaambaloʼoboʼ: ¡Tsʼoʼok in wilik Yuumtsil!

Láayliʼ tiʼe kʼiin xanoʼ, táan u bin kaʼatúul j-kaambaloʼob tu kaajil Emauseʼ, ka joʼopʼ u bin u xíimbal utúul máak yéeteloʼob. Le j-kaambaloʼoboʼ okʼom óolchajaʼanoʼob úuchik u kíimil Jesús. Baʼaleʼ le táan u binoʼoboʼ le máakoʼ táan u bin u tsoliktiʼob yaʼab tiʼe baʼaxoʼob tsʼíibtaʼan teʼ Bibliaoʼ, lelaʼ tu beetaj u kaʼa líikʼil u yóoloʼob. Le ka jeʼel le j-kaambaloʼob jaanloʼ tu kʼaj óoltoʼobeʼ, Jesús le máak ku bin tu yéeteloʼoboʼ. Baʼaleʼ saʼat tu táan yichoʼob, letiʼob túuneʼ suunajoʼob Jerusalén u yaʼaloʼob tiʼe apóstoloʼoboʼ.

Tiʼe súutuk xanoʼ Jesuseʼ tu chíikbesuba tiʼ Pedro. U maasiloʼoboʼ jach kiʼimakchaj yóoloʼob ka tu yojéeltoʼob. Ka kʼuch túun le kaʼatúul j-kaambaloʼob Jerusaleneʼ tiaʼaloʼob tiʼe apóstoloʼob tsʼoʼok u chíikbeskuba Jesús tiʼob teʼ bejoʼ. Le táan u tsikbalkoʼob lelaʼ, ¿a wojel wa baʼax beet u jaʼakʼal u yóoloʼob?

Ilawil le dibujoaʼ. Jesuseʼ chíikpaj ichil le naj kex kʼalaʼan u joonailoʼoboʼ. ¡Lelaʼ tu beetaj u kiʼimaktal u yóol le j-kaambaloʼoboʼ! ¡Tiʼe kʼiin jeʼeloʼ jach yanchaj kiʼimak óolal! ¿Jaytéen tsʼoʼok u chíikbeskuba Jesús? ¿Tsʼoʼok wa cinco u téenel?

Jesuseʼ tu chíikbesuba tiʼ u disipuloʼob

Le ka tu chíikbesuba Jesús tiʼobeʼ minaʼan apóstol Tomasiʼ. Le beetik le j-kaambaloʼoboʼ tu tsikbaltoʼob tiʼ Tomás: ¡Tsʼoʼok k-ilik Yuumtsil! Baʼaleʼ, letiʼeʼ tiaʼalaj kʼaʼabéet u yilik utiaʼal ku oksaj óolte. Tsʼoʼok u máan ocho kʼiinoʼob, le j-kaambaloʼoboʼ u kʼalmubaʼob tu kaʼatéen teʼ najeʼ, beooraaʼ tiaʼan xan Tomasiʼ. Chéen ka tu kaʼa chíikbesuba Jesús tu táanoʼob. Beoora túunaʼ Tomaseʼ tu oksaj óoltaj.

San Juan 20:11-29; San Lucas 24:13-43.



Kʼáatchiʼob

  • ¿Baʼax tiaʼalaj María tiʼ utúul máak tu tuklaj letiʼe jardinerooʼ, baʼaleʼ bix úuchik u kʼaj óoltik Jesús?
  • ¿Baʼax úuch tiʼ kaʼatúul j-kaambaloʼob táan u binoʼob tu chan kaajil Emaús?
  • ¿Baʼax úuch ka tiaʼalaj le kaʼatúul j-kaambaloʼob tiʼ le apóstoloʼob tsʼoʼok u yilkoʼob Jesusoʼ?
  • ¿Jaytéen tsʼoʼok u chíikbeskuba Jesús tiʼ u j-tsaypachoʼob?
  • ¿Baʼax tiaʼalaj Tomás ka tu yojéeltaj tsʼoʼok u chíikbeskuba Jesús tiʼ le j-kaambaloʼoboʼ, baʼaleʼ baʼax úuch ka máan ocho kʼiinoʼob?

Uláakʼ kʼáatchiʼob

  • Xokaʼak San Juan 20:11-29.

    Tu tsʼíibil San Juan 20:23, ¿táan wa u yaʼalik Jesús tsʼaʼan tiʼ wíinik u páajtalil u saʼasik kʼebanoʼob? Tsolaʼak (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2).

  • Xokaʼak San Lucas 24:13-43.

    ¿Bix jeʼel k-jeʼekʼabtik k-puksiʼikʼal utiaʼal ku kʼam le kaʼansajoʼob ku taal teʼ Bibliaoʼ? (Luc. 24:32, 33; Esd. 7:10; Mat. 5:3; Bxob. 16:14; Heb. 5:11-14.)