Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 76: Ku xuʼulsaʼal tiʼ u kaajil Jerusalén

Tsikbal 76: Ku xuʼulsaʼal tiʼ u kaajil Jerusalén

LE ISRAELITAʼOB jach maʼalob kaʼansaʼaniloʼoboʼ, tsʼoʼok u máan maas tiʼ diez jaʼaboʼob bisaʼakoʼob Babilonia tumen Nabucodonosor. ¡Beooraaʼ ilawile! Jerusaleneʼ táan u tóokaʼal, le israelitaʼob maʼ kíimoʼoboʼ bisaʼaboʼob Babilonia palitsiltbil.

Kʼaʼajaktecheʼ, lelaʼ letiʼe baʼax u yaʼalmaj le profetaʼob kun úuchultiʼob wa maʼ tu xuʼulsik u beetkoʼob baʼaloʼob kʼaastakoʼ. Baʼaleʼ le israelitaʼoboʼ maʼ tu yuʼuboʼob tʼaaniʼ. Maʼ tu xulaj u adorarkoʼob maʼ jaajil diosoʼobiʼ. Le oʼolal castigartaʼaboʼob. Lelaʼ k-kʼuchul ojéelteʼ, tumen Ezequieleʼ ku tsoliktoʼon le baʼaloʼob kʼaastak tu beetaj le israelitaʼoboʼ.

¿A wojel wa máax Ezequiel? Letiʼeʼ utúul tiʼe xiʼipalaloʼob bisaʼaboʼob Babilonia tumen Nabucodonosor, maas tiʼ diez jaʼaboʼob u bin u xuʼulsaʼal tiʼ Jerusalenoʼ. Letiʼe xan ka bisaʼaboʼob Daniel, Sadrak, Mesac yéetel Abed-negoeʼ.

Le tiaʼan Ezequiel Babiloniaoʼ, Jéeobaeʼ tu yeʼesajtiʼ le baʼaxoʼob kʼaastak ku sen beetaʼal teʼ templo yaan Jerusalenoʼ. Leloʼobaʼ yéetel upʼéel milagro eʼesaʼabiktiʼ. U jaajileʼ Ezequieleʼ maʼ bin tu kaajil Jerusaleniʼ, Jéeoba eʼestiʼ tuláakal le baʼaxoʼob ku sen beetaʼal teʼ templooʼ. ¡Le baʼaxoʼob tu yiloʼ jach táaj kʼaastak!

Jéeobaeʼ tiaʼalaj tiʼ Ezequiel: Ilawil le baʼaloʼob jach kʼaastak ku beetik le máakoʼob teʼ templooʼ. Ilawil u yoochel kaanoʼob yéetel uláakʼ baʼalcheʼob bonaʼanoʼob teʼ pakʼaʼ. ¡Ilawil le israelitaʼob táan u chintaloʼob tu táan le baʼaloʼobaʼ! Ezequiel túuneʼ tu tsʼíibtaj tuláakal le baʼaxoʼob tu yiloʼ.

Israelitaʼob palitsiltaʼanoʼob táan u jóokʼoloʼob tu kaajil Jerusalén

Jéeobaeʼ tu kʼáataj tiʼ Ezequiel: ¿Táan wa wilik baʼax ku mukul beetkoʼob le máaxoʼob nuʼuktik le israelitaʼoboʼ? Letiʼeʼ páajchaj xan u yilik leloʼ. Yaan 70 máakoʼob táan u chintaloʼob tu táan le maʼ jaajil diosoʼoboʼ. Yéetel táan u yaʼalikoʼob: Jéeobaeʼ maʼ tu yilkoʼoniʼ. Tsʼoʼok u náachtal tiʼe kaajaʼ.

Jéeoba túuneʼ tu yeʼesaj tiʼ Ezequiel jujuntúul koʼoleloʼob kulukbaloʼob yiknal u xaman joonai le templooʼ. Táan u chintaloʼob tu táan Tamuz, utúul maʼ jaajil diosiʼ. Ezequieleʼ, tu yilaj xan le máakoʼob tiaʼanoʼob tu yookbal u templo Jéeobaoʼ, yaan kex veinticinco u túulul. ¡Táan u chintaloʼob tu tojil lakʼin u adorartoʼob le Kʼiinoʼ!

Jéeobaeʼ tiaʼalaj xan tiʼ: Le máakoʼobaʼ maʼatech u yeʼeskoʼobten tsiikil. ¡Maʼ chéen wa tuʼux ku beetkoʼob baʼaloʼob kʼaastakiʼ, tin templo ku taal u beetoʼob! Le beetkeʼ Jéeobaeʼ tiaʼalaj: Yaan u muʼyajoʼob ken kʼuuxilnaken, tumen maʼ ken in chʼaʼaj óotsilil tiʼob ken xuʼulsaʼakoʼob.

Chéen óoxpʼéel jaʼaboʼob u yeʼes Jéeoba tiʼ Ezequiel le baʼaloʼobaʼ, le israelitaʼoboʼ tu kʼuuxbesoʼob Nabucodonosor, letiʼ túuneʼ taal baʼateʼel yéeteloʼob. U jaʼab kaʼa tak táankoch túun káajak le baʼateʼeloʼ, le babilonioʼoboʼ tu nikoʼob u baʼpakʼil Jerusalén, ka tu tóokoʼob tuláakal le noj kaajoʼ. Yaʼab tiʼe israelitaʼob kíimoʼoboʼ yéetel yaʼab xan bisaʼaboʼob Babiloniaiʼ.

¿Baʼaxten tu chaʼaj Jéeoba u taal le nojoch xuʼulsajil tiʼe israelitaʼoboʼ? Tumen maʼ tu yuʼuboʼob u tʼaaniʼ mix xan tu beetoʼob baʼax u kʼáatiʼ. Lelaʼ ku yeʼesik u jach kʼaʼananil k-beetik tuláakal baʼax kiaʼaliktoʼon Dios.

Tu káajbaleʼ chaʼab u pʼáatal upʼíit máakoʼob tu luʼumil Israel. Rey Nabucodonosoreʼ tu tsʼáaj Gedalías, utúul judío kanáantkoʼob. Baʼaleʼ jujuntúul israelitaʼobeʼ tu kíimsoʼob Gedalías. Ka tsʼoʼokeʼ sajakchajoʼob u suut le babilonioʼob xuʼulsiktiʼob yoʼolal le baʼax tsʼoʼok u beetkoʼoboʼ. Le oʼolal tu beetoʼob u bin Jeremías tu yéeteloʼob tu kaajil Egipto.

Le baʼax úuchoʼ tu beetaj u pʼáatal minaʼan u kajnáalil Israel. Ich setenta jaʼaboʼob mix máak kajaʼan teʼ luʼumoʼ. Baʼaleʼ Jéeobaeʼ tiaʼalaj yaan u beetik u suut u kaajal ken tsʼoʼokok le setenta jaʼaboʼoboʼ. Baʼaleʼ maʼiliʼ úuchuk lelaʼ, ¿baʼax úuch tiʼ u kaajal Dios tu luʼumil Babilonia? Koʼox ilik.

2 Reyes 25:1-26; Jeremías 29:10; Ezequiel 1:1-3; 8:1-18.



Kʼáatchiʼob

  • ¿Baʼax ku yúuchul tiʼ u kaajil Jerusalén yéetel tiʼ le israelitaʼob ka wilik teʼ dibujooʼ?
  • ¿Máax Ezequiel, yéetel baʼaxoʼob eʼesaʼab tiʼ tumen Jéeoba?
  • ¿Baʼax tiaʼalaj Jéeoba ken u beet tumen maʼatech u yeʼesaʼal tsiikil tiʼ tumen le israelitaʼoboʼ?
  • ¿Baʼax tu beetaj rey Nabucodonosor ka tsʼoʼok u kʼuuxbesaʼal tumen le israelitaʼoboʼ?
  • ¿Baʼaxten tu chaʼaj Jéeoba u xuʼulsaʼal tiʼe israelitaʼoboʼ?
  • ¿Baʼaxten pʼáat mix máak kajaʼan Israel, yéetel jaypʼéel jaʼab xáanchaji?

Uláakʼ kʼáatchiʼob

  • Xokaʼak 2 Reyes 25:1-26.

    ¿Máax kaʼach Sedequías, baʼax úuch tiʼ, yéetel lelaʼ bix úuchik u béeytal upʼéel baʼax tsʼíibtaʼan teʼ Bibliaoʼ? (2 Rey. 25:5-7; Eze. 12:13-15.)

    ¿Máax aʼalaʼab tumen Jéeoba beet u maʼ uʼuyaj tʼaan Israel? (2 Rey. 25:9, 11, 12, 18, 19; 2 Cró. 36:14, 17.)

  • Xokaʼak Ezequiel 8:1-18.

    Le maʼ jaajil religionoʼoboʼ, ¿bix xan u beetkoʼob jeʼex tu beetil le israelitaʼob ka tu adorartoʼob le Kʼiinoʼ? (Eze. 8:16; Isa. 5:20, 21; Juan 3:19-21; 2 Tim. 4:3.)