Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 70: Jonás yéetel utúul nojoch kay

Tsikbal 70: Jonás yéetel utúul nojoch kay

ILAWIL le máak ku búululoʼ. Tiaʼan ich talmileʼ, ¿máasaʼ? ¡Yaan u lukʼaʼal tumen le nojoch kayoʼ! ¿A wojel wa máaxiʼ? U kʼaabaʼeʼ Jonás. Koʼox ilik bix úuchik u yokskuba ich talmiloʼob.

Jonaseʼ u profeta Jéeoba. Maʼ jach úuch kíimik Eliseo le profetaeʼ, Jéeobaeʼ tiaʼalaj tiʼ Jonás: Xeen tu noj kaajil Nínive, in kʼáat ka waʼal tiʼ u kajnáaliloʼob tsʼoʼok u jach yaʼabtal u beetkoʼob baʼaloʼob kʼaastak.

Jonás yéetel utúul nojoch kay

Baʼaleʼ Jonaseʼ maʼ u kʼáat biniʼ. Ka túun naʼak tiʼ upʼéel cheem ku bin táanxel tuʼux. Jéeobaeʼ maʼ utstutʼaan úuchik u púutsʼul Jonasiʼ. Le oʼolaleʼ tu beetaj u taal upʼéel kʼaʼamkach iikʼ. Jach táaj kʼaʼamchajeʼ ka káaj u búulul le cheemoʼ. Le máaxoʼob nuʼuktik le cheemoʼ jach jaʼakʼ u yóoloʼob, ka joʼopʼ u payalchiʼob tiʼ u diosoʼob.

Ka túun tiaʼalaj Jonás tiʼob: Teneʼ in Dioseʼ Jéeoba, le máax beetmi kaʼan yéetel Luʼumoʼ. Táan in púutsʼul yoʼolal maʼ in beetik baʼax u yaʼalmajten. Le máakoʼob túunoʼ tu kʼáatoʼob tiʼ: ¿Baʼax unaj k-beetiktech utiaʼal ka jéetsʼek le kʼáaʼnáabaʼ?

Jonaseʼ tu núukaj: Puleneʼex ichil le kʼáaʼnáaboʼ, le kʼáaʼnáab túunoʼ yaan u jéetsʼel. Baʼaleʼ le máakoʼoboʼ maʼ u kʼáatoʼob kaʼach u puloʼobiʼ, le ka joʼopʼ u maas woʼoltkuba le jaʼoʼ, ka yanji u pulkoʼob Jonás ichil. Le kʼaʼamkach iikʼ túunoʼ jéetsʼi, ka xan jéetsʼ le kʼáaʼnáaboʼ.

Ka kʼuch Jonás tu maas taamil le jaʼoʼ, luʼukʼ tumen utúul nojoch kay. Baʼaleʼ Jonaseʼ maʼ kíimi. Tu máansaj óoxpʼéel kʼiin yéetel óoxpʼéel áakʼab tu jobnel le kayoʼ. Jonaseʼ jach yaachaj tu yóol tumen maʼ bin tuʼux túuxtaʼab tumen Jéeobaiʼ. ¿A wojel wa baʼax tu beetaj?

Jonaseʼ payalchiʼinaj tiʼ Jéeoba utiaʼal ka áantaʼak. Jéeoba túuneʼ tu beetaj u xeʼebel Jonás tumen le kay tu jáal le kʼáaʼnáaboʼ. Jonás túuneʼ jóokʼ u bimbal tu kaajil Nínive. Lelaʼ, ku kaʼansiktoʼon u kʼaʼabéetil k-beetik tuláakal baʼax kiaʼaliktoʼon Jéeoba, ¿máasaʼ?

U libroi Jonás yaan teʼ Bibliaoʼ



Kʼáatchiʼob

  • ¿Máax Jonás, yéetel baʼax aʼalaʼabtiʼ tumen Jéeoba ka u beete?
  • ¿Baʼax tu beetaj Jonás ka túuxtaʼab tumen Jéeoba tu kaajil Nínive?
  • ¿Baʼax tiaʼalaj Jonás ka u beet le máaxoʼob nuʼuktik le cheem utiaʼal ka jéetsʼek le kʼaʼamkach iikʼoʼ?
  • Jeʼex a wilik teʼ dibujooʼ, ¿baʼax úuch ka kʼuch Jonás tu maas taamil le jaʼoʼ?
  • ¿Jaypʼéel kʼiin tu máansaj Jonás tu jobnel le nuxiʼi kayoʼ, yéetel baʼax tu beetaj le tiaʼanoʼoʼ?
  • ¿Tuʼux bin Jonás ka tsʼoʼok u jóokʼol tu jobnel le kayoʼ, yéetel baʼax ku kaʼansiktoʼon lelaʼ?

Uláakʼ kʼáatchiʼob

  • Xokaʼak Jonás 1:1-17.

    Jeʼex tsʼoʼok k-ilkoʼ, ¿baʼax tuukulil yanji tiʼ Jonás ka túuxtaʼab kʼaʼaytaj tu kaajil Nínive? (Jon. 1:2, 3; Pro. 3:7; Ecl. 8:12.)

  • Xokaʼak Jonás 2:1, 2, 10.

    Le baʼax úuch tiʼ Jonasoʼ, ¿bix u yeʼesiktoʼon jach ku núukaʼal k-payalchiʼob tumen Jéeoba? (Sal. 22:24; 34:6; 1 Juan 5:14.)

  • Xokaʼak Jonás 3:1-10.

    Kex Jonás maʼ tu yóotaj u beet baʼax yáax aʼalaʼabtiʼeʼ, ¿bix u líiʼsik k-óol k-ojéeltik maʼ luʼsaʼab u beet u profetai tumen Jéeobaiʼ? (Sal. 103:14; 1 Ped. 5:10.)

    Le baʼax tu tuklaj Jonás ka túuxtaʼab kʼaʼaytaj tu kaajil Níniveoʼ, ¿bix u yáantkoʼon utiaʼal maʼ k-jáan tuklik maʼ ken u kʼex u kuxtal le máakoʼob k-bisiktiʼob le maʼalob péektsiloʼ? (Jon. 3:6-9; Ecl. 11:6; Bxob. 13:48.)