Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 67: Josafateʼ ku kʼubik yóol tiʼ Jéeoba

Tsikbal 67: Josafateʼ ku kʼubik yóol tiʼ Jéeoba

¿A WOJEL wa máax le máakoʼobaʼ yéetel baʼax ku beetkoʼob? Táan u binoʼob baʼateʼel; le máakoʼob ku binoʼob táaniloʼ, táan u kʼaayoʼob. Maʼ xaaneʼ ka kʼáatik baʼaxten le ku kʼaayoʼoboʼ, minaʼan u táatsʼ máaskaboʼob mix u lóomteʼob utiaʼal u baʼateloʼob. Koʼox ilik.

Le israelitaʼoboʼ táan u binoʼob baʼateʼel

U reyil le kaʼapʼéel chʼiʼibaloʼob tiʼ Israeloʼ, Josafat. Kuxlaj tu kʼiiniloʼob Acab yéetel Jezabel, u reyiloʼob le diez chʼiʼibaloʼob yaan xamanoʼ. Baʼaleʼ Josafateʼ utúul utsul rey, Asá u taataeʼ, uts xan. Bey túunoʼ, tu kʼiiniloʼob táan u gobernar Josafateʼ le kaʼapʼéel chʼiʼibaloʼob yaan noojoloʼ tu máansoʼob upʼéel maʼalob kuxtal.

Baʼaleʼ, beooraaʼ yaan baʼax beet u sajaktal le máakoʼoboʼ. Le j-bisaj tʼaanoʼoboʼ tiaʼaloʼob tiʼ Josafat: Táan u taal yaʼabach soldadoʼob tiʼ u luʼumiloʼob Moab, Amón yéetel u witsil Seir baʼateʼel ta wéetel. Yaʼab israelitaʼobeʼ tu muchʼubaʼob Jerusalén utiaʼal ku kʼáatoʼob ka áantaʼakoʼob tumen Jéeoba. Binoʼob teʼ templooʼ, teʼ túunoʼ Josafateʼ payalchiʼinaji: K-Dios Jéeoba, maʼ in wojel baʼax ken in beetiʼ. Jach maʼ k-tsaʼaya tsʼáanchaʼat le yaʼabach soldadoʼobaʼ. Áantoʼoniʼ.

Jéeobaeʼ tu chʼenxikintaj, ka tu túuxtaj utúul u palitsil aʼalik tiʼe kaajoʼ: Le baʼateloʼ maʼ tiaʼaleʼexiʼ, u tiaʼal Dios. Teʼexeʼ maʼatan a baʼateleʼex. Chéen ileʼex bix kun baʼateʼel Jéeoba ta woʼolaleʼex.

Ka sáaschaj tuláakʼ kʼiineʼ, Josafateʼ tiaʼalaj tiʼe kaajoʼ: ¡Kʼub a wóoleʼex tiʼ Jéeoba! Ku tsʼoʼoleʼ ka tu tsʼáaj máakoʼob kʼaay táanil tiʼe soldadoʼoboʼ, ka joʼopʼ u bin u kʼaykoʼob kʼaayoʼob tiʼ Jéeoba. ¿A wojel wa baʼax úuch le ka jóokʼ u bimbaloʼob teʼ baʼateloʼ? Jéeobaeʼ tu beetaj u paklan kíimskuba le máaxoʼob taal baʼatelkoʼoboʼ. ¡Le ka kʼuch le israelitaʼoboʼ, le máaxoʼob pʼekmiloʼoboʼ, tsʼoʼok u láaj kíimskubaʼob!

Josafateʼ tu yeʼesaj jach yaan u naʼat úuchik u kʼubik yóol tiʼ Jéeoba, ¿máasaʼ? Wa k-beetik beyoʼ, k-eʼesik xan jach yaan k-naʼat.

1 Reyes 22:41-53; 2 Crónicas 20:1-30.


Kʼáatchiʼob

  • ¿Máax Josafat, yéetel baʼax kʼiiniloʼob ka kuxlaji?
  • ¿Baʼax beet u sajaktal le israelitaʼoboʼ, yéetel baʼax tu beetaj yaʼab tiʼ letiʼobiʼ?
  • ¿Bix úuchik u núukik Jéeoba u payalchiʼ Josafat?
  • Táanil tiʼ u káajal le baʼateloʼ, ¿baʼax tu beetaj Jéeoba?
  • ¿Baʼax k-kanik tiʼ Josafat?

Uláakʼ kʼáatchiʼob

  • Xokaʼak 2 Crónicas 20:1-30.

    ¿Bix úuchik u yeʼesik Josafat baʼax kʼaʼabéet u beetik le máaxoʼob meyajtik Jéeoba ken u aktáantoʼob talmiloʼoboʼ? (2 Cró. 20:12; Sal. 25:15; 62:1.)

    Úucheʼ yaan máaxoʼob meyajnaj tiʼ Jéeoba utiaʼal u tʼaan yéetel u kaajal, bejlaʼeʼ, ¿máax ku meyaj tiʼ? (2 Cró. 20:14, 15; Mat. 24:45-47; Juan 15:15.)

    Ken u káajs «u baʼatelil u nojoch kʼiinil» Jéeobaeʼ, ¿baʼax ken k-beeteʼex jeʼex tu beetiloʼob Josafateʼ? (2 Cró. 20:15, 17; 32:8; Apo. 16:14, 16.)

    Le j-táanilkunsajoʼob yéetel le misioneroʼoboʼ, ¿bix u yáantajoʼob utiaʼal ka kʼuchuk tuláakal tuʼux le maʼalob péektsil jeʼex tu beetaj le levitaʼoboʼ? (2 Cró. 20:19; Rom. 10:13-15; 2 Tim. 4:2.)