Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 63: Rey Salomoneʼ jach yaan u naʼat

Tsikbal 63: Rey Salomoneʼ jach yaan u naʼat

SALOMONEʼ utúul chan táankelem paal ka kʼuch u beetubaj reyil. Letiʼeʼ u yaabilma Jéeoba, maʼ tu pʼataj le maʼalob tsolxikin tsʼaʼab tiʼ tumen David, u taataoʼ. Tiʼ Jéeobaeʼ lúub utsil Salomón, le oʼolaleʼ upʼéel áakʼabeʼ tiaʼalajtiʼ ich upʼéel wayakʼ: Salomón, ¿baʼax a kʼáat ka in tsʼáatech?

Salomoneʼ tu núukaj: Jéeoba in Dios, teneʼ jach paalen, maʼ in wojel bix kʼaʼabéet in gobernariʼ. Le oʼolaleʼ tsʼáaten naʼat utiaʼal in maʼalob nuʼuktik a kaajal.

Tiʼ Jéeobaeʼ lúub utsil le baʼax tu kʼáataj Salomonoʼ. Le beetik tiaʼalajtiʼ: Tumen ta kʼáatajten naʼat, maʼ ta kʼáataj upʼéel chowak kuxtal mix ayikʼalileʼ, yaan in tsʼáaiktech yaʼabach naʼat, jeʼex maʼ yanak tiʼ mix máak way yóokʼol Luʼumeʼ. Baʼaleʼ maʼ chéen leloʼ, yaan xan in tsʼáaiktech tak le baʼaloʼob maʼ ta kʼáatoʼ, yaan in tsʼáaiktech ayikʼalil yéetel nojbeʼenil.

Maʼ jach úuch túuneʼ, taal yiknal Salomón kaʼatúul koʼoleloʼob yaan upʼéel nojoch talmil tiʼob. Utúul túuneʼ tu tsolaj baʼax uchaʼantiʼob: Teen yéetel le koʼolelaʼ kajaʼanoʼon tiʼ upʼéeliliʼ naj, teneʼ yanchaj utúul in chaambal, tu kaʼapʼéel kʼiineʼ le koʼolelaʼ yanchaj xan u chaambal. Upʼéel áakʼab túuneʼ u chaambal le koʼolelaʼ kíimi. Baʼaleʼ táan in weneleʼ ka tu tsʼáaj tin tséel le chaambal kimenoʼ ka tu chʼaʼaj in tiaʼaloʼ. Le ka aajeneʼ tin wilaj le chaambal yaan tin tséeloʼ maʼ in tiaʼaliʼ.

Uláakʼ utúul koʼoleloʼ ka tu yuʼubaj lelaʼ, ka tiaʼalaj: ¡Maʼ jaajiʼ! ¡Le chaambal kuxaʼanoʼ in tiaʼal, le kimenoʼ u tiaʼal le koʼolelaʼ! Le yáax utúul koʼolel túunoʼ tu núukaj: ¡Maʼatech! ¡Le kimenoʼ a tiaʼal, le kuxaʼanoʼ in tiaʼal! Bey úuchik u baʼateʼel tʼaan le koʼoleloʼobaʼ. ¿Baʼax túun ken u beet Salomón?

Letiʼeʼ tu yaʼalaj ka taasaʼaktiʼ upʼéel táatsʼ máaskab, le ka taasaʼabtiʼeʼ tiaʼalaj: Jóoʼseʼex kaʼabúuj tiʼe chaambal kuxaʼanoʼ, ka tsʼaʼex jumbúuj tiʼ le koʼoleloʼobaʼ.

U mama túun le chaambaloʼ tu kʼaʼam aʼalaj: ¡Maʼ kíimskeʼex le chaambaloʼ! ¡Tsʼaʼex tiʼ letiʼ! Baʼaleʼ uláakʼ utúuloʼ tiaʼalaj: Maʼ u tsʼaʼabal tiʼ mix utúul, búuj xotteʼex.

Salomoneʼ ku yutskíintik upʼéel nojoch talmil

Salomón túuneʼ tiaʼalaj: ¡Maʼ kíimskeʼex le chaambaloʼ! Tsʼaʼex tiʼ le yáax koʼoleloʼ. Tumen letiʼ u mama le chaambaloʼ. ¿Bix úuchik u yojéeltik Salomón lelaʼ? Tumen le jach mamatsiloʼ u sen yaabilma u chaambal, utiaʼal maʼ u kíimsaʼaltiʼeʼ jeʼel tak u chaʼik u tsʼaʼabal tiʼ uláakʼ utúul koʼoleloʼ. Le ka tu yojéeltaj le máakoʼob bix úuchik u yutskíintik Salomón le nojoch talmilaʼ, kiʼimakchaj u yóoloʼob tumen jach yaan u naʼat u reyoʼob.

Tu kʼiiniloʼob táan u gobernar Salomoneʼ, Dioseʼ tu beetaj u bin utsil tiʼe kaajoʼ, tu beetaj u sen yantal trigo, cebada, uva, igo yéetel uláakʼ baʼaloʼob maʼalobtak utiaʼal jaantbil. Le máakoʼoboʼ tu búukintoʼob maʼalob nookʼoʼob yéetel kajlajoʼob tiʼ maʼalob najoʼob. Tuláakal máak yanchaj yaʼab baʼaloʼob maʼalobtak tiʼ.

1 Reyes 3:3-28; 4:29-34.



Kʼáatchiʼob

  • ¿Baʼax kʼáataʼab tiʼ Salomón tumen Jéeoba, yéetel baʼax tu núukaj?
  • ¿Baʼax xan tiaʼalaj u tsʼáaik Jéeoba tiʼ Salomón tumen jach lúub utsil tiʼ le baʼax tu kʼáatoʼ?
  • ¿Baʼax nojoch talamil yaan kaʼach tiʼ kaʼatúul koʼoleloʼob bin u yaʼaloʼob tiʼ Salomón?
  • Jeʼex u yeʼesik le dibujooʼ, ¿bix úuchik u yutskíintaʼal le talmil tumen Salomonoʼ?
  • ¿Bix úuchik u gobernar Salomón, yéetel baʼaxten?

Uláakʼ kʼáatchiʼob

  • Xokaʼak 1 Reyes 3:3-28.

    Le sukuʼunoʼob ku beetkoʼob nojoch meyaj ichil u kaajal Diosoʼ, ¿baʼax jeʼel u páajtal u kankoʼob tiʼ le tʼaanoʼob tu beetaj Salomón yéetel tuláakal u puksiʼikʼal tsʼíibtaʼan 1 Reyes 3:7? (Sal. 119:105; Pro. 3:5, 6.)

    ¿Baʼaxten maʼalob xan ka k-kʼáat tiʼ Dios ich payalchiʼ le baʼaloʼob tu kʼáataj Salomonoʼ? (1 Rey. 3:9, 11; Pro. 30:8, 9; 1 Juan 5:14.)

    Le bix úuchik u yutskíintik Salomón le talamil yanchaj tiʼe kaʼatúul koʼoleloʼobeʼ, ¿bix u yáantkoʼon k-naʼat bix kun gobernar Jesucristo, le maas nojoch Salomonoʼ? (1 Rey. 3:28; Isa. 9:6, 7; 11:2-4.)

  • Xokaʼak 1 Reyes 4:29-34.

    ¿Bix núukaʼabik tumen Jéeoba le payalchiʼ tu beetaj Salomón ka tu kʼáataj ka tsʼaʼabak upʼéel maʼalob puksiʼikʼal tiʼoʼ? (1 Rey. 4:29.)

    Le baʼax tu beetaj le máakoʼob utiaʼal u bin u yuʼuboʼob u tsikbal Salomonoʼ, ¿bix u yeʼesiktoʼon u kʼaʼananil k-xokik le Bibliaoʼ? (1 Rey. 4:29, 34; Juan 17:3; 2 Tim. 3:16.)