Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 33: U kʼáatmáambaloʼob ich le Chak kʼáaʼnáaboʼ

Tsikbal 33: U kʼáatmáambaloʼob ich le Chak kʼáaʼnáaboʼ

¡ILAWIL le baʼax ku yúuchloʼ! Moiseseʼ u tichʼmaj u xóolteʼ tu tojil le Chak kʼáaʼnáaboʼ. Le máaxoʼob kiʼimak u yóoloʼob yanoʼob tu yiknaloʼ, israelitaʼob. Baʼaleʼ, Faraón yéetel u soldadoʼobeʼ táan u búululoʼob. Koʼox ilik bix úuchik.

U soldadoiloʼob Egiptoeʼ táan u búululoʼob

Jeʼex tsʼoʼok k-kanikeʼ, ka tsʼoʼok le u diez noj yajiloʼ, Faraoneʼ tiaʼalaj tiʼ le israelitaʼob ka jóoʼkoʼob tiʼ u kaajil Egiptooʼ. Jóokʼ seiscientos mil xiiboʼob bey xan yaʼabach koʼoleloʼob yéetel mejen paalal. Tuláakal xan le máaxoʼob oksaj óolt Jéeobaoʼ, jóokʼoʼob yéetel le israelitaʼoboʼ. Tuláakal le jóokʼoʼob Egiptooʼ tu bisoʼob u tamanoʼob, u chivoʼob yéetel u wakaxoʼob.

Maʼiliʼ jóokʼok le israelitaʼoboʼ, tu kʼáatoʼob tiʼe egipcioʼob ka tsʼaʼabaktiʼob nookʼoʼob yéetel baʼaloʼob beetaʼanoʼob yéetel oro bey xan yéetel plata. Le egipcioʼoboʼ jach sajakchajaʼanoʼob tu yoʼolal u tsʼook noj yajil taal tu yóoʼloʼoboʼ. Le oʼolaleʼ, tu tsʼáajoʼob tuláakal le baʼax kʼáataʼabtiʼob tumen le israelitaʼoboʼ.

Tsʼeʼetsʼek kʼiinoʼob tsʼoʼokokeʼ, ka kʼuchoʼob tu jáal le Chak kʼáaʼnáaboʼ. Teʼeloʼ tiʼ jeʼeloʼobiʼ. Ku tsʼoʼoleʼ, Faraón yéetel u soldadoʼobeʼ káaj u yaatal tu yóoloʼob úuchik u chaʼikoʼob u bin le israelitaʼoboʼ. Ka joʼopʼ u yaʼalikoʼob: ¡T-chaʼaj u bin k-palitsiloʼob!

Faraón túuneʼ tu kaʼa kʼexaj u tuukul. Tu séebaʼanil ka tu muchʼaj u carroiloʼob u baʼateʼel yéetel xan u soldadoʼob. Ka túun káaj u bin u chukpachtoʼob yéetel 600 u maas maʼalobtakil u carroiloʼob u baʼateʼel bey xan yéetel u maasil le carroʼob yaan Egiptooʼ.

Le ka tu yilaj le israelitaʼob táan u taal Faraón yéetel u soldadoʼobeʼ, jach sajakchajoʼob tumen minaʼan tuʼux u púutsʼloʼob. Tiʼ utséeleʼ tiaʼan le Chak kʼáaʼnáaboʼ, tuláakʼ utséeloʼ tiʼ ku taal le egipcioʼoboʼ. Baʼaleʼ, Jéeobaeʼ tu tsʼáaj upʼéel múuyal chúumuk tiʼ u kaajal yéetel tiʼ le egipcioʼoboʼ. Le oʼolaleʼ, le egipcioʼoboʼ maʼ tu páajtal kaʼach u yilkoʼob le israelitaʼob utiaʼal ka u kíimsoʼoboʼ.

Jéeoba túuneʼ tiaʼalaj tiʼ Moisés ka u tichʼ u xóolteʼ tu tojil le Chak kʼáaʼnáaboʼ. Le ka tu beetaj Moisés leloʼ, Jéeobaeʼ tu beetaj u máan upʼéel kʼaʼamkach iikʼ. U jaʼi le kʼáaʼnáab túunoʼ tu jatsubaj, yéetel tu kaʼa tséelileʼ suunaj bey pakʼeʼ.

Bey túunoʼ le israelitaʼoboʼ káaj u binoʼob tu chúumuk le kʼáaʼnáab tu yóokʼol le tikin luʼumoʼ. Jach xáanchaj ka kʼáat máan tuláakal le yaʼabach máakoʼob yéetel u yaalakʼoʼob teʼ tuláakʼ utséel le kʼáaʼnáaboʼ. Ka tsʼoʼokeʼ, le egipcioʼoboʼ páajchaj u yilkoʼob tu kaʼatéen le israelitaʼoboʼ, ka ookoʼob túun ich le kʼáaʼnáab utiaʼal u chukpachtoʼoboʼ.

Ka ookoʼobeʼ, Dioseʼ tu beetaj u lukʼul u ruedasi u carroʼob. Jach jaʼakʼ u yóol le egipcioʼoboʼ, ka káaj u yaʼalkoʼob: ¡Koʼoneʼex púutsʼul! Jéeoba ku baʼateʼel yoʼolal le israelitaʼoboʼ. Baʼaleʼ, tsʼoʼok u pʼáatal mix baʼal jeʼel u páajtal u beetkoʼobeʼ.

Jéeoba túuneʼ tiaʼalaj tiʼ Moisés ka u tichʼ u xóolteʼ tu tojil le Chak kʼáaʼnáaboʼ, jeʼex ta wilij teʼ dibujoeʼ. Le jaʼ túun jaatsaleʼ káaj upʼéeliliʼichajal, ka tu bulaj le egipcioʼob paʼteʼ yéetel u carroʼoboʼ. Tuláakal le soldadoʼoboʼ tsʼoʼok kaʼach u yookloʼob ichil le kʼáaʼnáaboʼ. Le oʼolaleʼ, ¡láaj kíimoʼob!

¡Bukaʼaj wal úuchik u kiʼimaktal u yóol u kaajal Dios úuchik u salvartaʼaloʼobeʼ! Le xiiboʼoboʼ kʼaaynajoʼob utiaʼal u tsʼáaikoʼob nib óolal tiʼ Jéeoba, táan u kʼaykoʼob: Jéeobaeʼ tsʼoʼok u tsʼáanchaʼatik yaʼab máakoʼob. Tsʼoʼok u bulik ichil le kʼáaʼnáab le tsíimnoʼoboʼ, bey xan le máaxoʼob natʼmailoʼoboʼ. María, u kiik Moiseseʼ, tu jóoʼsaj u pandereta, uláakʼ koʼoleloʼob xanoʼ bey xan tu beetiloʼob. Ka káaj u yóoʼtoʼob yéetel táan xan u kʼayikoʼob: Jéeobaeʼ tsʼoʼok u tsʼáanchaʼatik yaʼab máakoʼob. Tsʼoʼok u bulik ichil le kʼáaʼnáab le tsíimnoʼoboʼ, bey xan le máaxoʼob natʼmailoʼoboʼ.

Éxodo, capítulo 12 tak 15.



Kʼáatchiʼob

  • ¿Jaytúul tuláakal le israelitaʼob jóokʼoʼob Egiptooʼ, yéetel tak máaxoʼob jóokʼ tu yéeteloʼob?
  • ¿Bix tu yuʼubiluba Faraón ka tsʼoʼok u chaʼik u jóokʼol le israelitaʼoboʼ, yéetel baʼax tu beetaj?
  • ¿Baʼax tu beetaj Jéeoba utiaʼal maʼ u kíimsaʼal le israelitaʼob tumen le egipcioʼoboʼ?
  • ¿Baʼax úuch ka tu tichʼaj u xóolteʼ Moisés tu tojil le Chak kʼáaʼnáaboʼ, yéetel baʼax tu beetaj le israelitaʼoboʼ?
  • ¿Baʼax úuch ka ook le egipcioʼob u chukpachtoʼob le israelitaʼob ich le kʼáaʼnáaboʼ?
  • ¿Bix úuchik u yeʼesik le israelitaʼob kiʼimak yóoloʼob yéetel ku tsʼáaikoʼob u nib óolalil tiʼ Jéeoba úuchik u salvartaʼaloʼoboʼ?

Uláakʼ kʼáatchiʼob

  • Xokaʼak Éxodo 12:33-36.

    Tuláakal le jaʼaboʼob meyajnaj le israelitaʼob tu luʼumil Egiptooʼ, ¿bix úuchik u beetik Jéeoba u boʼotaʼaltiʼob tumen le egipcioʼoboʼ? (Éxo. 3:21, 22; 12:35, 36.)

  • Xokaʼak Éxodo 14:1-31.

    Tumen tsʼoʼok u náatsʼal u kʼiinil u baʼatelil Armagedoneʼ, ¿bix u líiʼsaʼal u yóol le máaxoʼob meyajtik Jéeoba tumen le baʼax tu tsʼíibtaj Moisés tu libroi Éxodo 14:13, 14? (2 Cró. 20:17; Sal. 91:8.)

  • Xokaʼak Éxodo 15:1-8, 20, 21.

    Le máaxoʼob meyajtik Jéeobaoʼ, ¿baʼaxten kʼaʼanan ku kʼayoʼob kʼaayoʼob tiʼ? (Éxo. 15:1, 2; Sal. 105:2, 3; Apo. 15:3, 4.)

    Jeʼex úuchik u kiʼikiʼtʼantaʼal Jéeoba tumen María yéetel uláakʼ koʼoleloʼob ka tsʼoʼok u kʼáatmáanoʼob teʼ Chak kʼáaʼnáabeʼ, ¿bix xan kʼaʼabéet u beetaʼal tumen le kiikoʼob teʼ kʼiinoʼobaʼ? (Éxo. 15:20, 21; Sal. 68:11.)