Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 30: U kúul chan cheʼ ku tóochʼ u kʼáakʼil

Tsikbal 30: U kúul chan cheʼ ku tóochʼ u kʼáakʼil

MOISESEʼ tsʼoʼok u kʼuchul tak tu witsil Horeb u kaxt xíiw utiaʼal u tamanoʼob. Teʼ túunaʼ tu yilaj u kúul chan cheʼ ku tóochʼ u kʼáakʼil, ¡baʼaleʼ maʼ tu jáabal!

Moisés tu táan le cheʼ ku tóochʼbal u kʼáakʼiloʼ

Moiseseʼ ¡jach jelaʼan tu yilij le baʼalaʼ!, ka tiaʼalaj: In kaʼaj in jach ile. Le ka náatsʼeʼ, ichil le chan cheʼoʼ jóokʼ upʼéel tʼaan aʼaliktiʼ: Maʼ u maastal a náatsʼal. Luʼs a xanab, tumen le luʼum ka peʼechaʼtikaʼ kiliʼich. Dios ku tʼaan kaʼach yéetel u chiʼ utúul ángel, le oʼolaleʼ Moiseseʼ tu pixaj u yich.

Dios túuneʼ tiaʼalaj: Tsʼoʼok in wilik u muʼyaj in kaajal tu luʼumil Egipto. In kaʼaj in jóoʼsoʼob, le oʼolaleʼ kin túuxkech a jóoʼsoʼob teʼ kaajoʼ. Beooraaʼ Jéeobaeʼ u kaʼaj u bis kaʼach u kaajal tu jatsʼuts luʼumil Canaán.

Baʼaleʼ, Moiseseʼ tiaʼalaj: Teneʼ mix máaken. ¿Bix kun páajtal in beetik leloʼ? Wa kin bineʼ yaan u yaʼalkoʼobten: ¿Máax túuxtech? ¿Baʼax túun ken in waʼaltiʼob?

Dios túuneʼ tu núukaj: Lelaʼ letiʼe baʼax ken a waʼaltiʼobaʼ: JÉEOBA u Dios Abraham, u Dios Isaac, u Dios Jacob túuxten ta wiknaleʼex. Jéeoba xaneʼ tiaʼalaj: Lelaʼ in kʼaabaʼ utiaʼal mantatsʼ.

Moiseseʼ tu núukaj: Baʼaleʼ, ¿kux túun wa maʼ tu oksaj óolkenoʼob ken in waʼaltiʼob wa tech túuxtmilen?

Dioseʼ tu kʼáatajtiʼ: ¿Baʼax le yaan ta kʼaboʼ?

Moiseseʼ tu núukaj: Upʼéel xóolteʼ.

Dioseʼ tiaʼalajtiʼ: Pul teʼ luʼumoʼ. Le ka tu puleʼ, le xóolteoʼ suunaj kaanil. Ku tsʼoʼoleʼ, Jéeobaeʼ tu beetaj uláakʼ milagro u yil Moisés. Tiaʼalajtiʼ: Oks a kʼab ichil a nookʼ. Moiseseʼ tu beetaj, le ka tu jóoʼsaj u kʼabeʼ, ¡sak jeʼex le batoʼ! Bey yaan kaʼach lepra tiʼeʼ. Jéeoba túuneʼ tu tsʼáaj tiʼ Moisés u páajtalil u beetik u yóoxpʼéel milagro. Ka tsʼoʼokeʼ tiaʼalajtiʼ: Le milagroʼobaʼ letiʼ kun beetik u oksaj óoltik le israelitaʼob teen túuxmilechoʼ.

Ka tsʼoʼokeʼ, Moiseseʼ suunaj tu yotocheʼ, ka tiaʼalaj tiʼ Jetro: Beet uts a chaʼik in bin Egipto yoʼolal in wilik bix yanil in láakʼoʼob. Jetro túuneʼ tu chaʼaj u bin Moisés; ka túun suunaj tu kaajil Egipto.

Éxodo 3:1-22; 4:1-20.



Kʼáatchiʼob

  • ¿Bix u kʼaabaʼ le wits ka wilik teʼ dibujooʼ?
  • ¿Baʼax le baʼal jelaʼan tu yilaj Moisés ka bin u kaxt xíiw utiaʼal u tamanoʼob teʼ witsoʼ?
  • ¿Baʼax tiaʼalaj le tʼaan jóokʼ ich le chan cheʼoʼ, yéetel máax tiʼ u taal kaʼachi?
  • ¿Baʼax tu yaʼalaj Moisés ka aʼalaʼab tiʼ tumen Dios ka u jóoʼs u kaajal tu luʼumil Egipto?
  • ¿Baʼax aʼalaʼab tiʼ Moisés tumen Dios ken u yaʼal wa ku kʼáataʼaltiʼ máax túuxtej?
  • ¿Baʼax kaʼach ken u beet Moisés utiaʼal u yeʼesik Dios túuxtmij?

Uláakʼ kʼáatchiʼob

  • Xokaʼak Éxodo 3:1-22.

    Wa k-uʼuyik bey maʼ tu páajtal k-beetik upʼéel meyaj ku tsʼaʼabaltoʼon teʼ múuchʼuliloʼ, ¿baʼaxten k-ojéeltik le bix úuchik u yáantaʼal Moisesoʼ ku líiʼsik k-óol utiaʼal xan k-páaʼtik u yáantkoʼon Jéeoba? (Éxo. 3:11, 13; 2 Cor. 3:5, 6.)

  • Xokaʼak Éxodo 4:1-20.

    1) ¿Bix úuchik u kʼexik u tuukul Moisés tu yáamil le 40 jaʼaboʼob tiaʼan Madianoʼ, yéetel baʼax ku kanik le máaxoʼob u kʼáatoʼob ka tsʼaʼabaktiʼob uláakʼ meyajoʼob ichil le múuchʼuliloʼ? (Éxo. 2:11, 12; 4:10, 13; Miq. 6:8; 1 Tim. 3:1, 6, 10.)

    2) Wa k-tsolnuʼuktaʼal tumen u kaajal Jéeobaeʼ, ¿bix jeʼel u yáantkoʼon le baʼax úuch tiʼ Moisesoʼ? (Éxo. 4:12-14; Sal. 103:14; Heb. 12:4-11.)