Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 14: Ku yilaʼal bukaʼaj chúukaʼanil u yoksaj óolal Abraham

Tsikbal 14: Ku yilaʼal bukaʼaj chúukaʼanil u yoksaj óolal Abraham

¿TÁAN wa wilik baʼax ku beetik Abraham? U machmaj upʼéel cuchillo, bey u kaʼaj u kíims u paaleʼ. ¿Baʼaxten? Táanileʼ, koʼox ilik bix yanchajik u paal Sara yéetel Abraham.

Abrahameʼ nukaʼaj u kʼub Isaac tiʼ Dios

Kʼaʼajaktecheʼ, Dioseʼ tiaʼalajtiʼob yaan u yantal utúul u chaambaloʼob. Baʼaleʼ leloʼ bey jach maʼatan u béeytaleʼ, tumen Abraham yéetel Saraeʼ tsʼoʼok u jach chʼíijloʼob. Baʼaleʼ, Abrahameʼ u yojel Dioseʼ jeʼel u páajtal u beetik tak baʼaloʼob bey maʼ tu béeytaloʼobeʼ. Le oʼolaleʼ, ¿baʼax úuchi?

Ku tsʼoʼokol u yaʼalik Dios yaan u yantal utúul u paaloʼobeʼ, máan upʼéel túulis jaʼab. Le ka túun tu tsʼáaj 100 jaʼaboʼob tiʼ Abraham yéetel 90 tiʼ Saraeʼ yanchaj utúul u chaambaloʼob. Isaac tu tsʼáajiloʼob u kʼaabaʼ. ¡Dioseʼ tu béeykuntaj le baʼax u yaʼalmoʼ!

Ka nojochchaj Isaaqueʼ, Jéeobaeʼ tu yilaj wa chúukaʼan u yoksaj óolal Abraham. Tiaʼalajtiʼ: ¡Abraham! Abrahameʼ ka tu núukaj: ¡Jeʼelenaʼ! Dios túuneʼ tiaʼalajtiʼ: Chʼaʼa a juntúuliliʼ paaloʼ, xeen teʼ wits ken in weʼestechoʼ. Le ken kʼuchkecheʼeʼ, tiʼ ken a kíims Isaac a kʼub ten bey siibaleʼ.

¡Lelaʼ tu beetaj u jach okʼom óoltal Abraham, tumen u jach yaabilmaj Isaac! Kʼaʼajak xan techeʼ Dioseʼ u yaʼalmaj yaan u kajtal u paalal Abraham tu luʼumil Canaán. Chéen baʼaleʼ, ¿bix kun úuchul wa tsʼoʼok u kíimil Isaac? Abrahameʼ kex maʼ tu naʼateʼ, tu beetaj le baʼax aʼalaʼabtiʼ tumen Diosoʼ.

Le ka kʼuch teʼ witsoʼ Abrahameʼ tu kʼaxaj Isaac, ka tu naʼaksaj yóokʼol le multun u beetmoʼ. Ku tsʼoʼoleʼ ka tu jóoʼsaj le cuchillo utiaʼal u kíimskoʼ. Baʼaleʼ, jach u kaʼaj u kíimseʼ, ka tʼanaʼab tumen utúul u ángel Dios, ka aʼalaʼabtiʼ: ¡Abraham, Abraham! Letiʼ túuneʼ tu núukaj: ¡Jeʼelenaʼ!

Dioseʼ tiaʼalaj: Maʼ beetik loob tiʼ le xiʼipaloʼ. Tumen tsʼoʼok in wilik jach ka oksaj óoltiken, maʼ ta waʼalaj maʼatan a tsʼáaikten a juntúuliliʼ paaloʼ.

¡Bukaʼaj nojochil u oksaj óolal Abraham tiʼ Dios! Letiʼeʼ u yojel jach mix baʼal talam utiaʼal Jéeoba, u yojel xan Jéeobaeʼ jeʼel u páajtal u líiʼsik Isaac ichil le kimenoʼoboʼ. Baʼaleʼ, u jaajileʼ Jéeobaeʼ maʼ u kʼáat kaʼach ka kíimsaʼak Isaac tumen Abrahamiʼ, le oʼolaleʼ tu beetaj u tʼiʼilil utúul taman tu kʼab le kabal cheʼob yaan naatsʼ tiʼoboʼ, Jéeoba túuneʼ tiaʼalaj tiʼ Abraham letiʼe taman ken u kíimsoʼ, maʼ Isaaquiʼ.

Génesis 21:1-7; 22:1-18.



Kʼáatchiʼob

  • ¿Baʼax tiaʼalaj Dios ken u tsʼáa tiʼ Abraham, yéetel bix úuchik u béeykuntik?
  • Jeʼex u yilaʼal teʼ dibujooʼ, ¿baʼax tiaʼalaj Dios ka u beet Abraham utiaʼal u yilik wa jach chúukaʼan u yoksaj óolal?
  • ¿Baʼax tu beetaj Abraham kex maʼ tu naʼatik kaʼach baʼax oʼolal ku kʼáataʼal tiʼ tumen Dios?
  • ¿Baʼax úuch ka tu jóoʼsaj Abraham le cuchillo utiaʼal u kíimsik u paaloʼ?
  • ¿Bukaʼaj nojchil kaʼach u oksaj óolal Abraham tiʼ Dios?
  • ¿Baʼax tu tsʼáaj Jéeoba utiaʼal u kʼub Abraham, yéetel bix úuchik u tsʼáaik?

Uláakʼ kʼáatchiʼob

  • Xokaʼak Génesis 21:1-7.

    ¿Baʼaxten tu ocho kʼiinil síijik u paal Abraham ka tu súutkʼuptaj? (Gén. 17:10-12; 21:4.)

  • Xokaʼak Génesis 22:1-18.

    ¿Bix úuchik u yeʼesik Isaac ku yuʼubik u tʼaan Abraham, u taata, yéetel bix úuchik u chíikbesik upʼéel baʼal maas nojoch ku taal u kʼiin? (Gén. 22:7-9; 1 Cor. 5:7; Fili. 2:8, 9.)