Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 83: U baʼpakʼiloʼob Jerusalén

Tsikbal 83: U baʼpakʼiloʼob Jerusalén
Máakoʼob táan u beetkoʼob u baʼpakʼil Jerusalén

¡ILAWIL bix le meyaj ku beetik le máakoʼobaʼ! Le israelitaʼoboʼ táan u beetkoʼob u baʼpakʼil Jerusalén. Tsʼoʼok u máan ciento cincuentai dos jaʼaboʼob xuʼulsaʼak tiʼ u kaajil Jerusalén tumen Nabucodonosor, le ka tu nikaj u baʼpakʼiloʼob yéetel ka tu tóokaj u joonailoʼobeʼ. Le ka jóokʼ le israelitaʼob Babiloniaoʼ maʼ tu jáan líiʼsoʼob u baʼpakʼiloʼob Jerusaleniʼ.

¿Bix a tuklik tu yuʼubilubaʼob tu yáamil le jaʼaboʼob minaʼan le baʼpakʼoʼoboʼ? Tu yuʼububaʼob maʼ kanáantaʼanoʼobiʼ tumen jach maʼ talam jeʼel u yokol le máaxoʼob pʼekmiloʼoboʼ. Baʼaleʼ beooraaʼ, jeʼex k-ilkoʼ Nehemíaseʼ táan u yáantik le máakoʼob u jel beetoʼob u baʼpakʼil le kaajoʼ. ¿A wojel wa máax Nehemías?

Nehemíaseʼ utúul israelita kajaʼan kaʼach Susa, le tuʼux kajaʼan Mardoqueo yéetel Estereʼ. Letiʼeʼ tiʼ ku meyaj tu palacio le reyoʼ, le oʼolaleʼ jach tu bisuba wal maʼalob yéetel Mardoqueo bey xan yéetel Estereʼ. Baʼaleʼ le Bibliaoʼ maʼatech u yaʼalik wa meyajnaj Nehemías tiʼ Asuero, u yíicham Ester. Letiʼeʼ meyajnaj tiʼ rey Artajerjes.

Kʼaʼajaktecheʼ, Artajerjeseʼ letiʼe utsul rey tsʼáaj taakʼin tiʼ Esdras u bis tu kaajil Jerusalén utiaʼal u yutskíintaʼal u templo Jéeobaeʼ. Baʼaleʼ Esdraseʼ maʼ tu líiʼsaj u baʼpakʼiloʼob le noj kaajoʼ. Koʼox ilik baʼax oʼolal taal Nehemías u beete.

Tsʼoʼok u máan trece jaʼaboʼob tsʼaʼabak le taakʼin tiʼ Esdras tumen Artajerjes utiaʼal u yutskíintik le templooʼ. Beooraaʼ Nehemíaseʼ letiʼ pichik vino u yukʼ le reyoʼ, letiʼ kanáantik maʼ u tsʼaʼabal venenoiʼ. Lelaʼ upʼéel jach nojoch meyaj.

Upʼéel u kʼiinileʼ, Anani, u láakʼtsil Nehemías, yéetel uláakʼ israelitaʼobeʼ bin u xíimbaltoʼob Nehemías. Letiʼobeʼ tu tsikbaltoʼob tiʼ Nehemías baʼax talmiloʼob yaan tiʼe israelitaʼoboʼ, tiaʼaloʼob xan maʼ utskíintaʼak u baʼpakʼiloʼob Jerusaleniʼ. Lelaʼ jach tu beetaj u yaatal u yóol Nehemíaseʼ, ka túun payalchiʼinaj tiʼ Jéeoba.

Upʼéel u kʼiinil túuneʼ le reyoʼ tu yilaj jach lubaʼan u yóol Nehemías, ka tu kʼáatajtiʼ: ¿Baʼaxten lubaʼan a wóol? Nehemíaseʼ tu núukaj: Tumen in kaajaleʼ láaj niikil u baʼpakʼiloʼob. Le rey túunoʼ tu kʼáatajtiʼ: ¿Bix jeʼel u páajtal in wáantkecheʼ?

Nehemíase’ táan u nu’uktik le meyajo’

Nehemíaseʼ tu kaʼa núukaj: Chaʼa in bin Jerusalén in jel líiʼs u baʼpakʼiloʼob. Rey Artajerjes túuneʼ tiaʼalajtiʼ ka xiʼik, yéetel tu yáantaj xan u kaxt u cheʼi utiaʼal u beetaʼal le meyajoʼ. Maʼ úuch túun kʼuchuk Nehemías Jerusaleneʼ, ka tu tsikbaltaj tiʼe kaaj baʼax u tukulmaj u beetkoʼ. Letiʼobeʼ utschajtutʼaanoʼob, ka tiaʼaloʼob: Koʼoneʼex káajsik le meyajoʼ.

Ka tu yilaj le máaxoʼob pʼekmil le israelitaʼob táan u bin u kaʼantal le baʼpakʼoʼ, ka tiaʼaloʼob: Koʼoneʼex kíimskeʼexoʼob yoʼolal k-jeʼelsik le meyajoʼ. Ka tu yuʼubaj Nehemíaseʼ tu tsʼáaj u táatsʼ máaskaboʼob yéetel u lóomteʼob le j-meyajoʼoboʼ, ka tiaʼalajtiʼob: Maʼ chʼaʼikeʼex saajkil tiʼob. Baʼatelnakeʼex yoʼolal a láakʼtsileʼex, a paalaleʼex, a watneʼex, bey xan yoʼolal a wotocheʼex.

Le israelitaʼoboʼ maʼ tu chʼaʼajoʼob saajkiliʼ. Bul kʼiin yéetel bul áakʼab u líiʼsmuba yéetel u nuʼukulil u baʼateloʼob, bey túunoʼ maʼ tu pʼataj u meyajoʼobiʼ. Le oʼolaleʼ, chéen ich cincuentai dos kʼiinoʼob ka tu tsʼoʼoksoʼob le baʼpakʼoʼoboʼ. Beoora túunaʼ ku yuʼubkubaʼob kanáantaʼanoʼob. Nehemías yéetel Esdraseʼ tu kaʼansoʼob tiʼe kaaj baʼax u kʼáat Diosoʼ, le israelitaʼob túunoʼ jach kiʼimakchaj u yóoloʼob.

Baʼaleʼ kex tsʼoʼok u suut le israelitaʼob Jerusalenoʼ láayliʼ tiaʼanoʼob yáanal u kʼab u reyil Persiaeʼ. Baʼaleʼ Jéeobaeʼ u yaʼalmaj yaan u túuxtik u jeel máax kun gobernarkoʼob utiaʼal ku taas jeetsʼelil teʼ kaajoʼ. ¿Máax túuniʼ? ¿Bix ken u taas jeetsʼelil teʼ Luʼumaʼ? Máan cuatrocientos cincuenta jaʼaboʼob maʼ ojéelaʼan mix baʼal tiʼ le reyaʼ. Ku tsʼoʼokol túuneʼ síij utúul chaambal jach nojoch baʼax kun kʼuchul u beete. Baʼaleʼ lelaʼ, yaanal tsikbalil.

Nehemías capítuloʼob 1 tak 6.



Kʼáatchiʼob

  • ¿Bix kaʼach tu yuʼubiluba le israelitaʼob le minaʼan u baʼpakʼiloʼob u kaajil Jerusalenoʼ?
  • ¿Máax Nehemías?
  • ¿Baʼax u meyaj Nehemías, yéetel baʼaxten jach nojoch meyaj?
  • ¿Baʼax tu yojéeltaj Nehemías beet u jach yaatal u yóol, yéetel baʼax tu beetaj?
  • ¿Bix úuchik u yeʼesik u yutsil rey Artajerjes tiʼ Nehemías?
  • ¿Baʼax tu beetaj Nehemías utiaʼal maʼ u waʼakuntaʼal le meyaj tumen le máaxoʼob pʼekmiloʼoboʼ?

Uláakʼ kʼáatchiʼob

  • Xokaʼak Nehemías 1:4-6 yéetel 2:1-20.

    ¿Bix úuchik u kaxtik Nehemías u yáantaj Jéeoba? (Neh. 2:4, 5; Rom. 12:12; 1 Ped. 4:7.)

  • Xokaʼak Nehemías 3:3-5.

    ¿Baʼax jeʼel u kanik le nuxiboʼob yéetel le j-áantaj meeyjiloʼob tiʼ le meyaj tu beetaj le tecoailoʼob yéetel tiʼ le baʼax tu beetaj u nuukiloʼoboʼ? (Neh. 3:5, 27; 2 Tes. 3:7-10; 1 Ped. 5:5.)

  • Xokaʼak Nehemías 4:1-23.

    ¿Baʼax líiʼs u yóol le israelitaʼob utiaʼal maʼ u pʼatikoʼob le meyaj kex táan kaʼach u chʼaʼapachtaʼaloʼoboʼ? (Neh. 4:6, 8, 9; Sal. 50:15; Isa. 65:13, 14.)

    Bejlaʼeʼ, ¿bix xan u líiʼsik k-óol le baʼax tu beetaj le israelitaʼoboʼ?

  • Xokaʼak Nehemías 6:15.

    Tumen maʼ tu chukaj kaʼapʼéel mes ka tsʼoʼok u líiʼsaʼal u baʼpakʼiloʼob Jerusaleneʼ, ¿baʼax tu yeʼesaj jeʼel u páajtal u beetik le oksaj óolaloʼ? (Sal. 56:3, 4; Mat. 17:20; 19:26.)