Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 80: Le israelitaʼoboʼ táan u jóoʼloʼob Babilonia

Tsikbal 80: Le israelitaʼoboʼ táan u jóoʼloʼob Babilonia

TSʼOʼOK u máan óoliʼ kaʼapʼéel jaʼab lúubuk Babilonia tu kʼab le medoʼob yéetel le persaʼoboʼ. ¡Beooraaʼ ilawil baʼax ku yúuchul! Le israelitaʼoboʼ táan u jóoʼloʼob Babilonia. ¿Bix úuchik? ¿Máax jóoʼskoʼob?

Ciro, u reyil Persia. Maʼiliʼ síijik Ciroeʼ, Jéeobaeʼ tiaʼalaj tiʼ profeta Isaías ka u tsʼíibt lelaʼ: Techeʼ yaan a beetik baʼax in kʼáat. Le joonaʼoboʼ yaan u pʼáatal jeʼekʼabil yoʼolal a chʼaʼik le noj kaajoʼ. Ciro túuneʼ tu beetaj jeʼex aʼalaʼabikoʼ. Le medoʼob yéetel le persaʼoboʼ áakʼab ka ookoʼob tu noj kaajil Babilonia tu joonailoʼob pʼataʼab jeʼekʼabiloʼ.

Baʼaleʼ Isaíaseʼ tiaʼalaj xan: Ciroeʼ yaan u yaʼalik ka jel beetaʼak u kaajil Jerusalén yéetel u temploi. ¿Bey wa úuchik u beetik Cirooʼ? Beyoʼ, tumen letiʼe tiaʼalaj tiʼe israelitaʼoboʼ: Xeeneʼex Jerusalén, jel beeteʼex u templo a Dioseʼexiʼ. Lelaʼ letiʼe baʼax ku bin u beet le israelitaʼoboʼ.

Israelitaʼob táan u jóoʼloʼob Babilonia

Baʼaleʼ maʼ tuláakal le israelitaʼob yanoʼob Babilonia kun páajtal u binoʼob tu kaajil Jerusalenoʼ, tumen jach náach u xíimbalil, 800kilómetros u náachil, yaʼab tiʼobeʼ maʼtu páajtal u xíimbalkoʼob tumen tsʼoʼok u chʼíijloʼob yéetel yaan xan kʼojaʼanoʼobiʼ. Yanoʼob xaneʼ yaan uláakʼ baʼax óolal maʼtu páajtal u binoʼob. Baʼaleʼ Ciroeʼ tiaʼalaj tiʼe máaxoʼob maʼkun binoʼoboʼ: Síiʼex plata, oro yéetel uláakʼ baʼaloʼob tiʼe máaxoʼob kun bin u yutskíintoʼob Jerusalén yéetel u temploiloʼ.

Le israelitaʼob túun suunajoʼob Jerusalenoʼ yaʼab baʼax siʼibtiʼob. Ciro xaneʼ tu tsʼáaj u bisoʼob le nukuch tazaʼob yéetel le copaʼob tu chʼaʼaj Nabucodonosor tu templo Jéeoba, le ka tu xuʼulsaj tiʼ Jerusaleneʼ. Jach yaʼab baʼaloʼob tu bisoʼob.

Kampʼéel mes joʼopʼok u bin le israelitaʼob ka kʼuchoʼob Jerusalenoʼ, jach le ka tu tsʼáaj setentajaʼaboʼob xuʼulsaʼak tiʼe noj kaaj yéetel minaʼanchajak u kajnáaliloʼoboʼ. Baʼaleʼ kex tsʼoʼok u suut le israelitaʼob tu luʼumiloʼoboʼ, yaan u yilkoʼob yaʼab talmiloʼob, jeʼex ken k-ilaʼ.

Isaías 44:28; 45:1-4; Esdras 1:1-11.



Kʼáatchiʼob

  • Jeʼex a wilik teʼ dibujooʼ, ¿baʼax ku beetik le israelitaʼoboʼ?
  • ¿Bix úuchik u beetik Ciro le baʼax aʼalaʼab tumen Jéeoba tsʼíibtaʼab tumen Isaíaseʼ?
  • Tiʼe israelitaʼob maʼ tu páajtal u suutoʼob Jerusalenoʼ, ¿baʼax aʼalaʼabtiʼob tumen Ciro?
  • ¿Baʼax tu tsʼáaj Ciro u bis le máakoʼob ku binoʼob Jerusalenoʼ?
  • ¿Jaypʼéel mes tu bisaj tiʼe israelitaʼob u kʼuchloʼob Jerusalenoʼ?
  • ¿Jaypʼéel jaʼab pʼáat mix máak kajaʼan Jerusalén?

Uláakʼ kʼáatchiʼob

  • Xokaʼak Isaías 44:28 yéetel 45:1-4.

    ¿Bix úuchik u yeʼesik Jéeoba jach yaan u béeytal le baʼax u yaʼalmaj yoʼolal Cirooʼ? (Isa. 55:10, 11; Rom. 4:17.)

    Le baʼax tu tsʼíibtaj Isaías yoʼolal Cirooʼ, ¿baʼax ku yeʼesik yoʼolal le páajtalil yaan tiʼ Jéeoba utiaʼal u yaʼalik baʼax ku taal u kʼiinoʼ? (Isa. 42:9; 45:21; 46:10, 11; 2 Ped. 1:20.)

  • Xokaʼak Esdras 1:1-11.

    Jeʼex tu beetaj le israelitaʼob maʼ páajchaj u suutoʼob Jerusaleneʼ, ¿bix xan kʼaʼabéet k-áantik le máaxoʼob jeʼel u páajtal u maas kʼubik u yóoloʼob u meyajtoʼob Jéeobaoʼ? (Esd. 1:4, 6; Rom. 12:13; Col. 4:12.)