Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 54: Le máak maas yanchaj u muukʼoʼ

Tsikbal 54: Le máak maas yanchaj u muukʼoʼ

¿A WOJEL wa bix u kʼaabaʼ le máak maas yanchajaʼan u muukʼ way yóokʼol kaabeʼ? Utúul juez u kʼaabaʼ Sansón. Jéeoba beet u sen yantal u muukʼ. Le maʼiliʼ síijik Sansonoʼ aʼalaʼab tiʼ u mama tumen Jéeoba: Maʼ tu xáantaleʼ yaan u yantal utúul a xibil paal. Letiʼ kun salvartik Israel tu kʼab le filisteoʼoboʼ.

Sansoneʼ táan u baʼateʼel yéetel utúul león

Le filisteoʼoboʼ máakoʼob jach kʼasaʼantakoʼob kajaʼanoʼob Canaán. Jach yaʼab u soldadoʼob, yéetel ku baʼatelkoʼob le israelitaʼoboʼ. Utéenjeak ka bin Sansón tuʼux kajaʼan le filisteoʼoboʼ, jóokʼ utúul nojoch león chʼaʼapachtik. Baʼaleʼ, Sansoneʼ chéen yéetel u kʼaboʼob tu kíimsaj le leónoʼ. Yéetel tu kíimsaj xan yaʼabach filisteoʼob.

Ka tsʼoʼokeʼ, Sansoneʼ jach utschaj tu yich utúul koʼolel u kʼaabaʼ Dalila. Cada utúul tiʼ u nuuktakil le filisteoʼoboʼ, tiaʼalaj u tsʼáaikoʼob 1.100 u xéexetʼal plata tiʼ Dalila wa kiaʼaliktiʼob baʼax beetik u jach yantal u muukʼ Sansón. Dalilaeʼ u kʼáat le taakʼinoʼ. Letiʼeʼ maʼ u yaabilmaj Sansoniʼ mix u kaajal Dios. Le beetik maʼ jáaw u sen kʼáatik tiʼ Sansón baʼax beetik u jach yantal u muukʼiʼ.

Dalila yéetel Sansón

Dalila túuneʼ tu beetaj u yaʼalaʼal tiʼ tumen Sansón baʼaxten jach yaan u muukʼ. Sansoneʼ tiaʼalaj: Mix juntéen kʼosaʼan u tsoʼotsel in pool. Maʼiliʼ síijkeneʼ Dioseʼ tu yéeyen utiaʼal in meyajt bey utúul nazareoeʼ. Wa ka kʼoʼosok u tsoʼotsel in pooleʼ, jeʼel u minaʼantal in muukʼeʼ.

Le ka tu yuʼubaj Dalila lelaʼ, ka tu beetaj u chital Sansón tu yookeʼ ka tu beetaj u wenel. Ka tsʼoʼok túuneʼ tu beetaj u yokol utúul máak kʼosik u tsoʼotsel u pool. Le ka aaj Sansoneʼ, tsʼoʼok u pʼáatal minaʼan u muukʼ. Le filisteoʼob túunoʼ ookoʼobeʼ ka tu machoʼob, yéetel tu jóoʼsoʼob u yich Sansón, ka túun tu palitsiltoʼob.

Sansoneʼ ku jutik le columna'obo'

Upʼéel u kʼiinileʼ le filisteoʼoboʼ tu beetoʼob upʼéel nojoch kʼiimbesaj utiaʼal u adorarkoʼob Dagón, u diosoʼob, ka túun tu jóoʼsoʼob Sansón teʼ cárcel utiaʼal u pʼaʼastoʼoboʼ. Baʼaleʼ tiʼe kʼiinoʼob jeʼeloʼ, u tsoʼotsel u pool Sansoneʼ tsʼoʼok u chan chowaktal tu kaʼatéen. Sansón túuneʼ tiaʼalaj tiʼe chan xiʼipal machmai u kʼab biskoʼ: Chaʼa in machik le columnaʼob kuchmai le nojoch najaʼ. Sansón túuneʼ payalchiʼinaj ka tsʼaʼabak u muukʼ tumen Jéeoba, ka tsʼoʼokeʼ tu machaj le columnaʼoboʼ. Ka tu yawtaj: Chaʼa in kíimil paʼteʼ yéetel le filisteoʼobaʼ. Yaan 3.000 filisteoʼob teʼ kʼiimbesajoʼ, le ka tu túulchʼintaj Sansón u columnailoʼob le nojoch najoʼ, tuláakal júutlaʼaji, ka tu kíimsaj tuláakal le kʼasaʼan máakoʼoboʼ.

Jueces, capítulo 13 tak 16.



Kʼáatchiʼob

  • ¿Bix u kʼaabaʼ le máak maas yanchajaʼan u muukʼ way yóokʼol kaabeʼ, yéetel máax beet u jach yantal u muukʼ?
  • Jeʼex a wilik teʼ dibujooʼ, ¿baʼax tu beetaj Sansón tiʼ utúul león?
  • Jeʼex a wilik teʼ dibujooʼ, ¿baʼax ku tsikbaltik Sansón tiʼ Dalila, yéetel baʼaxten lúub tu kʼab le filisteoʼoboʼ?
  • ¿Bix úuchik u beetik Sansón u kíimil 3.000 filisteoʼob le kʼiin ka kíim xanoʼ?

Uláakʼ kʼáatchiʼob

  • Xokaʼak Jueces 13:1-14.

    Le baʼax tu beetoʼob Manoa yéetel u yatanoʼ, ¿baʼax ku kaʼansik tiʼ le taatatsiloʼoboʼ? (Jue. 13:8; Sal. 127:3; Efe. 6:4.)

  • Xokaʼak Jueces 14:5-9 yéetel 15:9-16.

    Le ka tu kíimsaj Sansón utúul león, bey xan le ka tu tʼokaj le túumben suumoʼob ikil kʼaxaʼaniloʼ yéetel le ka meyajnajtiʼ u kamaʼach utúul burro utiaʼal u kíimsik 1.000 máakoʼobeʼ, ¿baʼax ku yeʼesik yoʼolal u kiliʼich muukʼ Jéeoba?

    Bejlaʼeʼ, ¿bix u yáantkoʼon xan le kiliʼich muukʼoʼ? (Jue. 14:6; 15:14; Zac. 4:6; Bxob. 4:31.)

  • Xokaʼak Jueces 16:18-31.

    ¿Baʼax úuch tiʼ Sansón úuchik u biskuba yéetel máakoʼob maʼatech u meyajkoʼob Dios, yéetel baʼax k-kanik tiʼ leloʼ? (Jue. 16:18, 19; 1 Cor. 15:33.)