Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 45: Táan u kʼáatmáanoʼob ich u áalkab jaʼi Jordán

Tsikbal 45: Táan u kʼáatmáanoʼob ich u áalkab jaʼi Jordán

¡ILAWILE! ¡Le israelitaʼoboʼ táan u kʼáatmáanoʼob ich u áalkab jaʼi Jordán! Baʼaleʼ ¿tuʼux tsʼoʼok u jaʼi? Teʼ kʼiinoʼob jeʼeloʼ ku sen kʼáaxal jaʼ, maʼ sáam kaʼacheʼ jach chuup le áalkab jaʼoʼ. ¡Baʼaleʼ tuʼux tsʼoʼok tuláakal le jaʼoʼ! ¡Le israelitaʼoboʼ táan u kʼáatmáanoʼob yóokʼol tikin luʼum jeʼex tu beetiloʼob teʼ Chak kʼáaʼnáabeʼ! ¿Tuʼux tsʼoʼok tuláakal le jaʼoʼ? Koʼox ilik.

Israelitaʼob táan u kʼáatmáanskoʼob u áalkab jaʼi Jordán

Le ka kʼuch u kʼiinil utiaʼal u kʼáatal le israelitaʼob tu áalkab jaʼi Jordaneʼ, Jéeobaeʼ tiaʼalaj tiʼ Josué ka u yaʼal tiʼ le kaaj beyaʼ: Le j-kʼiinoʼoboʼ kʼaʼabéet u kuchkoʼob u baʼascheʼi le nuptʼaan ka xiʼikoʼob táanil tiʼ toʼonoʼ. Le ken tʼúubuk u yookoʼob ich u jaʼi le Jordanoʼ, le jaʼoʼ yaan u xuʼulul u yáalkab.

Bey túunoʼ, le j-kʼiinoʼoboʼ tu kuchoʼob u baʼascheʼi le nuptʼaanoʼ ka joʼopʼ u binoʼob táanil tiʼe máakoʼoboʼ. Ka kʼuch le j-kʼiinoʼob teʼ Jordanoʼ, ookoʼob ich u jaʼi. Le áalkab jaʼoʼ jach chich u yéemel, tsʼoʼoleʼ jach taam. ¡Baʼaleʼ jach le ku tʼúubul u yook le j-kʼiinoʼoboʼ, le jaʼoʼ xuʼul u yáalkab! ¡Upʼéel milagro! Jéeobaeʼ tu kʼalaj u beel tuʼux ku yáalkab le jaʼoʼ. ¡Le áalkab jaʼ túunoʼ tiji!

Le j-kʼiinoʼob kuchmai u baʼascheʼi le nuptʼaanoʼ binoʼob waʼatal tu chúumuk le tikin áalkab jaʼoʼ. ¿Táan wa wilkoʼob teʼ dibujoaʼ? ¡Le tiaʼan le j-kʼiinoʼob teʼeloʼ, le israelitaʼoboʼ káaj u kʼáatmáanoʼob ich u áalkab jaʼi Jordán yóokʼol le tuʼux tikinoʼ!

Ka tsʼoʼok u láaj kʼáatmáanoʼobeʼ, Jéeobaeʼ tiaʼalaj tiʼ Josué ka u yaʼal tiʼ doce máakoʼob muʼukʼaʼantak: Xeeneʼex teʼ tuʼux waʼalakbal le j-kʼiinoʼob kuchmai u baʼascheʼi le nuptʼaanoʼ. Chʼaʼex doce tuunicheʼ ka biseʼex teʼ tuʼux ken a máanseʼex le áakʼaboʼ. Beyoʼ, tuláakʼ kʼiin ken kʼáataʼakteʼex tumen a paalaleʼex baʼax u kʼáat yaʼal le tuunichoʼobaʼ, kʼaʼabéet a waʼalikeʼextiʼob le ka kʼáatmáansaʼab u baʼascheʼi u nuptʼaan Dios teʼ Jordanoʼ, u jaʼileʼ tiji. ¡Le tuunichoʼob túunoʼ yaan u kʼaʼajsikteʼex le baʼax úuchaʼ! Josué xaneʼ tu mulkíintaj doce tuunich le tuʼux waʼalakbal kaʼach le j-kʼiinoʼoboʼ.

Josué

Ka tsʼoʼok túuneʼ, Josueiʼ tiaʼalaj tiʼe j-kʼiinoʼob kuchmai u baʼascheʼi le nuptʼaanoʼ: Jóoʼkeʼex teʼ Jordanoʼ. Le ka jóokʼoʼobeʼ, le Jordanoʼ káaj u yáalkab u jaʼi tu kaʼatéen.

Josué 3:1-17; 4:1-18.



Kʼáatchiʼob

  • ¿Baʼax tu beetaj Jéeoba utiaʼal ka béeyak u kʼáatmáan le israelitaʼob tu áalkab jaʼi le Jordanoʼ?
  • Le israelitaʼoboʼ, ¿bix úuchik u yeʼeskoʼob u oksaj óolaloʼob le ka kʼáatmáanoʼob tu áalkab jaʼi le Jordanoʼ?
  • ¿Baʼaxten Jéeobaeʼ tiaʼalaj tiʼ Josué ka u chʼaʼob doce u tuunichil le áalkab jaʼoʼ?
  • ¿Baʼax úuch ka jóokʼ le j-kʼiinoʼob tu jaʼi le Jordanoʼ?

Uláakʼ kʼáatchiʼob

  • Xokaʼak Josué 3:1-17.

    Jeʼex u yeʼesik le tsikbalilaʼ, ¿baʼax unaj k-beetik utiaʼal ka u yáantoʼon Jéeoba yéetel utiaʼal ku pul u yutsil t-óokʼol? (Jos. 3:13, 15; Pro. 3:5; Sant. 2:22, 26.)

    ¿Bix kaʼach yanil u áalkab jaʼi le Jordán ka kʼáatmáan le israelitaʼob utiaʼal ka kʼuchkoʼob teʼ Luʼum Aʼalaʼan u tsʼaʼabaltiʼoboʼ, yéetel bix úuchik u nojbeʼenkúuntik u kʼaabaʼ Jéeoba lelaʼ? (Jos. 3:15; 4:18; Sal. 66:5-7.)

  • Xokaʼak Josué 4:1-18.

    ¿Baʼax u beelal le doce tuunichoʼob tu chʼaʼob tu jaʼi le Jordán tu muchʼkíintoʼob Gilgaloʼ? (Jos. 4:4-7.)