Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 43: Beetaʼab joʼolpóopil Josué

Tsikbal 43: Beetaʼab joʼolpóopil Josué

MOISESEʼ taak u yokol tu luʼumil Canaán yéetel le israelitaʼoboʼ. Le oʼolaleʼ tiaʼalaj: Jéeoba, chaʼa in kʼáatal tu áalkab jaʼi Jordán, yoʼolal in wilik le maʼalob luʼumoʼ. Baʼaleʼ Jéeobaeʼ tiaʼalaj: ¡Mak a chiʼ! ¡Maʼ suut a waʼal leloʼ! ¿A wojel wa baʼaxten tiaʼalaj Jéeoba leloʼ?

Yoʼolal le baʼax úuch ka jatsʼaʼab le tuunich tumen Moiseseʼ. Kʼaʼajaktecheʼ: Moisés yéetel Aaroneʼ maʼ tu nojbeʼenkúuntoʼob Jéeobaiʼ. Maʼ tiaʼaloʼob tiʼe kaaj wa Jéeoba jóoʼs le jaʼ teʼ tuunichoʼ. Le oʼolal Jéeobaeʼ tiaʼalaj maʼ táan u chaʼik u yookloʼob tu luʼumil Canaán.

Bey túunoʼ, maʼ úuch kíimik Aaroneʼ, Jéeobaeʼ tiaʼalaj tiʼ Moisés: Tʼan Josueiʼ ka tsʼáa tu táan Eleazar le j-kʼiinoʼ yéetel tu táan le kaajoʼ. Teʼeloʼ, aʼal tu táan tuláakaleʼ Josué u túumben joʼolpóopil Israel. Moiseseʼ tu beetaj jach jeʼex aʼalaʼabik tiʼ tumen Jéeobaoʼ, jeʼex a wilik teʼ dibujooʼ.

Moisés táan u yaʼalik Josué u joʼolpóopil le kaajoʼ

Jéeoba túuneʼ tiaʼalaj tiʼ Josué: Muʼukʼaʼanchajak a wóol yéetel maʼ chʼaʼik saajkil. Yaan a nuʼuktik le israelitaʼoboʼ yéetel yaan a wokskoʼob tu luʼumil Canaán, le in waʼalmaj in tsʼáaikteʼexeʼ, teen xaneʼ yaan in wantal ta wéetel.

Ka tsʼoʼokeʼ, Jéeobaeʼ tiaʼalaj tiʼ Moisés ka naʼakak tu maas kaʼanlil u witsil Nebo tu luʼumil Moab. Teʼeloʼ, píitmáan u paakat Moisés tak tu áalkab jaʼi le Jordanoʼ, ka chíikpaj yilik u jatsʼuts luʼumil Canaán. Jéeobaeʼ tiaʼalaj: Lelaʼ letiʼe luʼum in waʼalmaj in tsʼáaik tiʼ u paalal Abraham, Isaac yéetel Jacobeʼ. Tsʼoʼok in chaʼik a wilik, baʼaleʼ maʼ táan in chaʼik a wookliʼiʼ.

Tu yóokʼol u witsil Neboeʼ, tiʼ kíim Moisesiʼ. Yaan kaʼach 120 jaʼaboʼob tiʼ. Láayliʼ toj yóol yéetel sáasil u paakat kaʼacheʼ. Le kaaj túunoʼ jach okʼom óolchaji, tuláakloʼobeʼ tu sen oʼtoʼob Moisés. Baʼaleʼ, kaʼa kiʼimakchaj u yóoloʼob tumen beooraaʼ Josué u túumben joʼolpóopoʼob.

Números 27:12-23; Deuteronomio 3:23-29; 31:1-8, 14-23; 32:45-52; 34:1-12.



Kʼáatchiʼob

  • ¿Máax le kaʼatúul máakoʼob waʼalakbaloʼob tu tséel Moisés ka wilik teʼ dibujooʼ?
  • ¿Baʼax tiaʼalaj Jéeoba tiʼ Josué?
  • ¿Baʼaxten naʼak Moisés tu maas kaʼanlil u witsil Nebo, yéetel baʼax aʼalaʼabtiʼ tumen Jéeoba?
  • ¿Jaypʼéel jaʼab yaan tiʼ Moisés ka kíimij?
  • ¿Baʼax beet u okʼom óolchajal le kaajoʼ, yéetel baʼax beet u kaʼa kiʼimaktal u yóol?

Uláakʼ kʼáatchiʼob

  • Xokaʼak Números 27:12-23.

    ¿Baʼax nojoch meyajil tsʼaʼab tiʼ Josué tumen Jéeoba, yéetel bejlaʼeʼ baʼax eʼesik Jéeoba xan áantik u kaajal? (Núm. 27:15-19; Bxob. 20:28; Heb. 13:7.)

  • Xokaʼak Deuteronomio 3:23-29.

    ¿Baʼaxten Jéeobaeʼ maʼ tu chaʼaj u yokol Moisés yéetel Aarón teʼ luʼum u yaʼalmaj u tsʼáaiktiʼobeʼ, yéetel baʼax k-kanik tiʼ lelaʼ? (Deu. 3:25-27; Núm. 20:12, 13.)

  • Xokaʼak Deuteronomio 31:1-8, 14-23.

    Le táan u náatsʼal u kʼiinil u kíimil Moiseseʼ, ¿baʼax tiaʼalaj tiʼe israelitaʼob eʼes tu kʼamaj yéetel kabal óolal u tsolnuʼukoʼob Jéeoba? (Deu. 31:6-8, 23.)

  • Xokaʼak Deuteronomio 32:45-52.

    ¿Baʼax utsiloʼob ku taasiktoʼon k-tsʼoʼokbesik u Tʼaan Dios? (Deu. 32:47; Lev. 18:5; Heb. 4:12.)

  • Xokaʼak Deuteronomio 34:1-12.

    Kex Moisés maʼ kʼuch u yil Dioseʼ, ¿baʼax kiaʼalik Deuteronomio 34:10 yoʼolal bix u biskuba kaʼach tu yéetel Dios? (Éxo. 33:11, 20; Núm. 12:8.)