Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 42: Utúul x-burra ku tʼaan

Tsikbal 42: Utúul x-burra ku tʼaan

¿A WUʼUYMAJ wa u tʼaan utúul burro? Maʼ, kech waleʼ. Le baʼalcheʼoboʼ maʼatech u tʼaanoʼob. Baʼaleʼ, le Bibliaoʼ kiaʼalikeʼ, utúul x-burraeʼ tʼaanaji. Koʼox ilik bix úuchik.

Utúul ángel

Le israelitaʼoboʼ taʼaytak u yookloʼob tu luʼumil Canaán. Balac u reyil Moabeʼ, sajaktiʼob. Le oʼolaleʼ tu túuxtaj tʼambil utúul máak jach yaan u naʼat, u kʼaabaʼeʼ Balaam, utiaʼal ka taalak u loolobtʼant le israelitaʼoboʼ. Tiaʼalaj u tsʼáaik yaʼab taakʼin tiʼ; Balaam túuneʼ, tu natʼaj u x-burraeʼ, ka bin u yil Balac.

Jéeobaeʼ maʼ u kʼáat ka loolobtʼantaʼak u kaajal tumen Balaamiʼ. Le oʼolaleʼ, tu túuxtaj utúul ángel yéetel u táatsʼ máaskab waʼatal teʼ bej utiaʼal ka u jeʼels Balaamoʼ. Balaameʼ maʼ tu páajtal u yilik le ángeloʼ, baʼaleʼ u x-burraeʼ chíikaʼan yilik. Le x-burraoʼ joʼopʼ u yilik u náachkuntkuba tiʼe ángeloʼ, u tsʼoʼokeʼ ka chilaj teʼ yóoʼ bejoʼ. Balaameʼ jach kʼuuxchajeʼ, ka joʼopʼ u jaʼajatsʼik u x-burra yéetel upʼéel cheʼ.

Jéeoba túuneʼ tu beetaj u yuʼubaʼal u tʼaan le x-burra tumen Balaamoʼ. Ka kʼáataʼabtiʼ tumen le x-burraoʼ: ¿Baʼax tsʼoʼok in beetiktech utiaʼal ka sen jaʼajatsʼen?

Balaameʼ u natʼmaj utúul x-burra

Balaameʼ tu núukaj: Tsʼoʼok a taasken j-maʼ naʼatil. ¡Wa yanten upʼéel táatsʼ máaskabeʼ, tsʼoʼok kaʼach in kíimskecheʼ!

Le x-burraoʼ tu kʼáatajtiʼ: ¿In yáax beetmaj wa tech beyaʼ?

Balaameʼ tu núukaj: Maʼatech.

Ka tsʼoʼokeʼ, Jéeobaeʼ tu chaʼaj u yilik Balaam le ángel waʼalakbal tu chúumuk le bej yéetel u táatsʼ máaskaboʼ. Le ángeloʼ tiaʼalajtiʼ: ¿Baʼaxten ta jaʼajatsʼaj a x-burraoʼ? Tsʼoʼok in taal in kʼaltech le bejaʼ, tumen maʼ maʼalob ka xiʼikech a loolobtʼant Israeliʼ. Wa maʼ úuchik u náachkuntkech a x-burraeʼ, tsʼoʼok kaʼach in kíimskecheʼ, baʼaleʼ tiʼ a x-burraeʼ mix baʼal kaʼach ken in beettiʼ.

Balaam túuneʼ tiaʼalaj: Tsʼoʼok in kʼebantal. Maʼ in wojel wa tiaʼanech kaʼach teʼ bejaʼ. Le ángel túunoʼ tu chaʼaj u bin Balaam, baʼaleʼ Balaameʼ tu chʼaʼajoʼoltaj u bin u yil Balac. Ka tu kaʼa tsʼáajuba u loolobtʼant Israeleʼ, baʼaleʼ Jéeobaeʼ óoxtéen tu beetaj u kiʼikiʼtʼantik Israel.

Números 21:21-35; 22:1-40; 23:1-30; 24:1-25.



Kʼáatchiʼob

  • ¿Máax Balac, yéetel baʼaxten tu túuxtaj tʼambil Balaam?
  • ¿Baʼaxten chilaj yóoʼ bej u yaalakʼ x-buurra Balaam?
  • ¿Baʼax tu yuʼubaj Balaam u yaʼalik le x-buurraoʼ?
  • ¿Baʼax tiaʼalaj utúul ángel tiʼ Balaam?
  • ¿Baʼax úuch le ka tu yóotaj Balaam u loolobtʼant Israeloʼ?

Uláakʼ kʼáatchiʼob

  • Xokaʼak Números 21:21-35.

    ¿Baʼaxten Israeleʼ tu tsʼáanchaʼataj Sehón, u reyil le amorreoʼoboʼ, yéetel Og, u reyil Basán? (Núm. 21:21, 23, 33, 34.)

  • Xokaʼak Números 22:1-40.

    ¿Baʼax oʼolal u kʼáat kaʼach Balaam u looloʼobtʼant Israel, yéetel baʼax ku kaʼansiktoʼon lelaʼ? (Núm. 22:16, 17; Pro. 6:16, 18; 2 Ped. 2:15; Jud. 11.)

  • Xokaʼak Números 23:1-30.

    Kex yéetel u tʼaanoʼob Balaam ku yeʼesik bey utúul máak ku meyajtik Dioseʼ, ¿bix úuchik u chíikbesik maʼatan u beetkiʼ? (Núm. 23:3, 11-14; 1 Sam. 15:22.)

  • Xokaʼak Números 24:1-25.

    Le tsikbalil tsʼoʼok xokikaʼ, ¿bix u yáantkoʼon k-maas oksaj óolt yaan u béeykuntik tuláakal le baʼax u yaʼalmaj Jéeobaoʼ? (Núm. 24:10; Isa. 54:17.)