Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Tsikbal 34: Upʼéel túumben janal

Tsikbal 34: Upʼéel túumben janal

¿A WOJEL wa baʼax ku molik le máakoʼob teʼ luʼumoʼ? Bey bat jach pʼayachtakeʼ. Saktak yéetel jaaytak bey mejen leʼ xíiweʼ. Baʼaleʼ, maʼ bat jach pʼayachtakiʼ, upʼéel baʼal ku páajtal u jaantaʼal.

Le israelitaʼoboʼ táan u molikoʼob maná

Tsʼoʼok u máan óoliʼ upʼéel mes jóokʼok le israelitaʼob Egiptooʼ. Tiʼ yanoʼob teʼ x-tokoy luʼumoʼ. Teʼeloʼ chéen upʼíit baʼal ku yantal utiaʼal jaantbiliʼ, le oʼolaleʼ joʼopʼ u yaʼalikoʼob: Maas maʼalob ka u kíimsoʼon kaʼach Jéeoba tu luʼumil Egipto. Teʼeloʼ k-jaantik kaʼach tuláakal le baʼax k-kʼáateʼ.

Jéeoba túuneʼ tiaʼalaj: In kaʼaj in beet u kʼáaxal janal. Bey úuchik u beetik. Ka sáaschaj tuláakʼ kʼiineʼ, le israelitaʼoboʼ tu yiloʼob le baʼax sak kʼaaxaloʼ, ka tiaʼaloʼob: ¿Baʼax túun lelaʼ?

Moiseseʼ tiaʼalaj: Lelaʼ letiʼe janal tsʼoʼok u tsʼáaik Jéeoba utiaʼal a jaanteʼexaʼ. Le máakoʼob túunoʼ tu tsʼáajoʼob u kʼaabaʼteʼ, MANÁ. Le manaoʼ bey kiʼikiʼ waaj beetaʼan yéetel kaabeʼ.

Moisés túuneʼ tiaʼalaj tiʼ le máakoʼoboʼ: Moleʼex le bukaʼaj u pʼiis a jaantkeʼexeʼ. Sáamsamal túun ken sáaschajkeʼ ku jóokʼol u moloʼob. Le ken chokochajak kʼiineʼ, le maná ku pʼáatal teʼ luʼumoʼ ku yíibil.

Moiseseʼ tiaʼalaj xan: Mix máak ka u líiʼs maná utiaʼal uláakʼ kʼiin. Baʼaleʼ, yanoʼobeʼ maʼ tu yuʼuboʼob tʼaaniʼ. ¿A wojel wa baʼax túun úuchi? ¡Ka sáaschaj tuláakʼ kʼiineʼ le maná u líiʼsmoʼoboʼ chuup yéetel x-nookʼol yéetel tuʼuchajaʼan xan!

Baʼaleʼ, Jéeobaeʼ tiaʼaleʼ tu seis kʼiin tiʼe semanaoʼ ka u moloʼob kaʼa jaats tiʼ le maná suuk u molkoʼoboʼ. Jéeobaeʼ tiaʼalaj xan tiʼob ka u líiʼsoʼob upʼíit utiaʼal uláakʼ kʼiiniʼ, tumen maʼ ken u beet u kʼáaxal maná tu siete kʼiin. ¡Le ka tu líiʼsoʼob le maná utiaʼal u siete kʼiinoʼ, maʼ yanchaj u x-nooʼliliʼ mix xan tuʼuchajiʼ! Lelaʼ ¡uláakʼ milagro!

Le israelitaʼoboʼ tu jaantoʼob maná tuláakal le jaʼaboʼob tu máansoʼob teʼ x-tokoy luʼumoʼ.

Éxodo 16:1-36; Números 11:7-9; Josué 5:10-12.



Kʼáatchiʼob

  • Teʼ dibujooʼ, ¿táan wa wilik baʼax ku molik le máakoʼoboʼ, yéetel bix tsʼaʼabik u kʼaabaʼ?
  • ¿Bix tiaʼalaj Moisés kʼaʼabéet u molaʼal le manaoʼ?
  • Tu seis kʼiineʼ, ¿baʼax tiaʼalaj Jéeoba ka u beet le kaajoʼ, yéetel baʼaxten?
  • ¿Baʼax milagroi tu beetaj Jéeoba le ka tu líiʼsoʼob le maná utiaʼal u siete kʼiinoʼ?
  • ¿Jaypʼéel jaʼab tu tséentaj u kaajal Jéeoba yéetel maná?

Uláakʼ kʼáatchiʼob

  • Xokaʼak Éxodo 16:1-36 yéetel Números 11:7-9.

    ¿Baʼax kiaʼalik Éxodo 16:8 yoʼolal u kʼaʼabéetil k-uʼuyik u tʼaan le máaxoʼob tsʼaʼan utiaʼal nuʼuktik u kaajal Diosoʼ? (Heb. 13:17.)

    Le tiaʼan kaʼach le israelitaʼob teʼ x-tokoy luʼumoʼ, ¿bix úuchik u kʼaʼajsaʼaltiʼob sáamsamal kʼaʼabéet u yáantaj Jéeoba tiʼob? (Éxo. 16:14-16, 35; Deu. 8:2, 3.)

    ¿Baʼax yéetel tu ketaj Jesús le manaoʼ, yéetel baʼax utsiloʼob ku tsʼáaiktoʼon le «waaj kaʼan u taaloʼ»? (Juan 6:31-35, 40.)

  • Xokaʼak Josué 5:10-12.

    Le israelitaʼoboʼ, ¿jaypʼéel jaʼaboʼob tu jaantoʼob maná? ¿Bix úuchik u meyaj le maná utiaʼal u yilaʼal wa chúukaʼan u yóoloʼoboʼ? Yéetel ¿baʼax xan jeʼel u páajtal k-kanik tiʼ le tsikbalilaʼ? (Éxo. 16:35; Núm. 11:4-6; 1 Cor. 10:10, 11.)