Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 3

¿Bix jeʼel u yutskíintaʼal le problemaʼoboʼ?

¿Bix jeʼel u yutskíintaʼal le problemaʼoboʼ?

«Yáax táanileʼ, jach yaabiltabaʼex ta baatsileʼex, tumen le yaabilajoʼ ku tupik yaʼabkach kʼebanoʼob.» (1 Pedro 4:8)

Le máaxoʼob táant u tsʼoʼokol u beeloʼoboʼ yaʼab problemaʼob ken u aktáantoʼob. Lelaʼ maʼ xaaneʼ jeʼel u yúuchleʼ tumen jelaʼan bix u tuukuloʼob, bix u yuʼubikubaʼob yéetel bix líiʼsaʼaniloʼob. Yaan hora xaneʼ le problemaʼoboʼ yaanal máaxoʼob beetik u yantal wa yoʼolal uláakʼ baʼaloʼob ku yúuchul.

Yaan horaeʼ ken yanak problemaʼob tiʼ máakeʼ ku beetik bey mix baʼal uchaʼaneʼ, baʼaleʼ le Bibliaoʼ ku yaʼalikeʼ unaj u yutskíintaʼal (Mateo 5:23, 24). Wa ka tsʼáaik ichil a kuxtal le baʼax ku yaʼalik le Bibliaoʼ yaan u páajtal a wutskíintikoʼob.

 1 TSIKBALTEʼEX LE BAʼAX UCHAʼANOʼ

LE BIBLIAOʼ KU YAʼALIK: «Yaan junsúutuk utiaʼal tʼaan» (Eclesiastés 3:1, 7). Jóoʼseʼex tiempo utiaʼal a tʼaaneʼex tiʼ le problemaoʼ. Aʼal tiʼ a núup bix a wuʼuyikaba yéetel baʼax ka tuklik. Aʼal «u jaajil» tiʼ a núup (Efesoiloʼob 4:25). Kex jach yaachajaʼan a wóoleʼ, maʼ a baʼateʼel. A tʼaan yéetel yaabilajeʼ yaan u yáantkech utiaʼal maʼ a sakach tʼaan (Proverbios 15:4; 26:20).

Kex maʼ de acuerdoech yéetel baʼax ku yaʼalik a núupeʼ, eʼes utsil, yaabilaj yéetel tsiikil (Colosasiloʼob 4:6). Ilawil a séeb utskíintkeʼex le problemaoʼ yéetel maʼ u jáawal a tʼankabaʼex (Efesoiloʼob 4:26).

BEET LELAʼ:

  • Kaxt junpʼéel maʼalob súutukil utiaʼal a tsikbaltikeʼex le baʼax ku yúuchloʼ

  • Wa a núup táan u tʼaaneʼ, jach chʼenxikinte, maʼ a jáan tʼaan. Jeʼeliliʼ u yantal u súutukil a tʼaaneʼ

 2 CHʼENXIKINTABAʼEX YÉETEL ILAWIL A NAʼATKABAʼEX

LE BIBLIAOʼ KU YAʼALIK: «Eʼeseʼex nojoch yaabilaj ta baatsileʼex [...]. Eʼeseʼex tsiikil xan ta baatsileʼex; lelaʼ teʼex unaj a yáax eʼeskeʼex tiʼ u maasil» (Romailoʼob 12:10). Jach chʼenxikint maʼalob baʼax ku yaʼalik a núup. Yéetel ‹kabal óolaleʼ› «yaabiltabaʼex jeʼex sukuʼuntsiloʼobeʼ», tsʼoʼoleʼ ilawil a naʼatik bix u tuukul (1 Pedro 3:8; Santiago 1:19). Maʼ chéen unaj u beetik máak bey táan u yuʼubik baʼax ku yaʼalaʼaleʼ. Wa ku béeytaleʼ pʼat baʼax ka beetik utiaʼal a jach chʼenxikintik a núup, wa kʼáattiʼ wa jeʼel u páajtal a tsikbaleʼex tuláakʼ súutukileʼ. Ilawil a núup bey juntúul a amigoeʼ maʼ bey juntúul a enemigoeʼ, beyoʼ maʼ ken a chaʼa ‹a jíitaʼal tumen a pʼujaʼanil› (Eclesiastés 7:9).

BEET LELAʼ:

  • Kex maʼ de acuerdoech yéetel baʼax ku yaʼalik a núupeʼ, chʼenxikinte yéetel maʼ a pechkaba chéen tiʼ baʼax ka waʼalik

  • Ilawil a naʼatik baʼax taak u yaʼaliktech. Jach uʼuy bix u tʼaan yéetel jach pakt bix yanil

3 ILAWIL A BEETKEʼEX LE BAʼAX TA CHʼAʼTUKLEʼEXOʼ

LE BIBLIAOʼ KU YAʼALIK: ‹Le máax ku tsʼáaik yóol meyajeʼ ku bin utsil tiʼ, baʼaleʼ le máax chéen ku tʼaaneʼ ku yóotsiltal› (Proverbios 14:23). Maʼ chéen unaj a wilkeʼex baʼax ken a beeteʼexiʼ, unaj a beetkeʼex jeʼex ta chʼaʼtukleʼexoʼ. Utiaʼal lelaʼ jach tsʼáa a wóoleʼexiʼ, beyoʼ yaan u binteʼex utsil (Proverbios 10:4). Wa ka múul meyajeʼexeʼ yaan u yantalteʼex kiʼimak óolal (Eclesiastés 4:9).

BEETEʼEX LELAʼ:

  • Aʼaleʼex baʼax ken u beet cada juntúul utiaʼal ka utsak le baʼax ku yúuchloʼ

  • Cada wa baʼax kʼiineʼ ilawileʼex wa táan a beetkeʼex le baʼax ta waʼaleʼexoʼ