Tito 3:1-15

3  Seguernak a kʼaʼajsiktiʼob ka yanakoʼob yáanal u páajtalil le jalaʼachoʼob yéetel le autoridadoʼoboʼ, ka u yuʼuboʼob u tʼaanoʼob yéetel ka u listokíintubaʼob utiaʼal tuláakal maʼalob meyaj;  kʼaʼajstiʼob xaneʼ maʼ unaj u tʼaanoʼob kʼaas tiʼ mix máakiʼ, maʼ unaj u kaxtikoʼob baʼateliʼ, kʼaʼabéet uts u puksiʼikʼaloʼob* yéetel maʼ unaj u séeb kʼuuxiloʼob yéetel mix máakiʼ.  Tumen úuchjeakileʼ tak toʼon minaʼan k-naʼat, maʼatech k-uʼuyik tʼaan, tusaʼanoʼon, palitsiltaʼanoʼon tumen jejeláas tsʼíibolaloʼob yéetel chéen chʼiikiloʼon kaʼach k-kiʼimakkúunt k-óol; kuxaʼanoʼon ich kʼasaʼanil yéetel pʼekbail, pʼekbeʼen máakoʼon yéetel k-paklan pʼektikba kaʼachi.  Baʼaleʼ Dios, le k-Salvadoroʼ, le ka tu chíikbesaj u yutsil bey xan u yaabilaj tu yoʼolal wíinikeʼ,  (lelaʼ tu beetaj maʼ tumen wa yaan baʼaxoʼob maʼalobtak k-beetmiʼ, baʼaxeʼ tumen tu chʼaʼajtoʼon óotsilil) tu salvartoʼon úuchik u pʼoʼikoʼon utiaʼal u kuxkíintikoʼon yéetel tu salvartoʼon úuchik u túumbenkuntkoʼon yéetel u kiliʼich muukʼ.*  Dioseʼ tu yoʼolal Jesucristo k-Salvadoreʼ, tu wekaj t-óokʼol yaʼab tiʼ le kiliʼich muukʼaʼ,  utiaʼal beyoʼ ken tsʼoʼokok u yaʼalaʼal toj k-kuxtal yoʼolal u nojoch utsileʼ, ka kʼuchkoʼon k-tiaʼalint le baʼax aʼalaʼan u tsʼaʼabaltoʼon yaan yil yéetel le kuxtal minaʼan u xuul táan k-páaʼtikoʼ.  Le baʼaloʼobaʼ jach unaj u creertaʼal, yéetel in kʼáateʼ mantatsʼ ka a waʼal baʼaloʼob ku yeʼeskoʼob jach jaajtak le baʼaloʼobaʼ, utiaʼal beyoʼ le máaxoʼob tsʼoʼok u tsʼáaik u fejoʼob tiʼ Diosoʼ ka chʼíikikoʼob u beetoʼob maʼalob meyajoʼob. Le baʼaloʼobaʼ jach maʼalobtak utiaʼal le máakoʼoboʼ yéetel jeʼel u taasik utsil tiʼobeʼ.  Baʼaleʼ maʼ a woksikaba tiʼ sakachtʼaanoʼob, mix tiʼ u xakʼaltaʼal tiʼ baʼax chʼiʼibal u taal máak, mix tiʼ baʼateloʼob, mix xan tiʼ baʼateltʼaanoʼob yaan yil yéetel le Leyoʼ, tumen chéen kuneltakoʼob yéetel mix baʼal u biilaloʼob. 10  Wa juntúul máak maʼ tu xuʼulul u kaʼansik yaanal baʼaloʼob kex tsʼoʼok kaʼatéen a tsolxikintikeʼ, xuʼuluk a biskaba tu yéetel; 11  tumen a wojleʼ le máakoʼ tsʼoʼok u kʼéechel tiʼ le bejoʼ, táan u kʼebantal yéetel tsʼoʼok u náajmatik ka castigartaʼak. 12  Le ken in túuxt Ártemas wa Tíquico ta wiknaleʼ, beet tuláakal le ku páajtal utiaʼal a taal tin wiknal tu kaajil Nicópolis, tumen teʼeloʼ tiʼ tsʼoʼok in chʼaʼtuklik in máansik u kʼiiniloʼob keʼeliʼ. 13  Utiaʼal le viaje ken u beet Apolos yéetel Zenas, máax jach u kʼaj óol baʼax ku yaʼalik le Leyoʼ, jach ilawil a tsʼáaik tuláakal baʼax kʼaʼabéettiʼob. 14  Baʼaleʼ le k-sukuʼunoʼoboʼ unaj u kanik u beetoʼob maʼalob meyajoʼob utiaʼal ka yanak tuláakal le baʼaxoʼob jach kʼaʼabéettiʼoboʼ, utiaʼal beyoʼ ka yanak u yich u meyajoʼob. 15  Tuláakal le máaxoʼob yanoʼob tin wéeteloʼ ku túuxtikoʼobtech saludos. Tsʼáa xan in saludos tiʼ tuláakal le sukuʼunoʼob u yaabiltmoʼonoʼoboʼ. Ka eʼesaʼakteʼex nojoch utsil tiʼ tuláakleʼex.

Tsolajiloʼob

Wa: «maʼ ta chʼíikileʼex chéen tiʼ baʼax ka tuklikeʼex».
Wa: «espíritu santo». Ilaʼak Tipʼ. 16.