Tito 2:1-15

2  Baʼaleʼ techeʼ seguernak a kaʼansik le baʼaxoʼob yaan yil yéetel le maʼalob kaʼansajoʼ.  Le nojoch máakoʼoboʼ kʼaʼabéet u tsʼáaikoʼob u pʼiis tuláakal baʼax ku beetkoʼob, kʼaʼabéet yiijchajaʼan u tuukuloʼob, unaj u yantaltiʼob junpʼéel maʼalob tuukul, muʼukʼaʼan u fejoʼob, nojoch u yaabilajoʼob, yéetel jach chúukaʼan u yóoloʼob.  Bey xan le koʼoleloʼob tsʼoʼok u yantal u jaʼabiloʼoboʼ kʼaʼabéet u kuxtaloʼob ich kiliʼichil, maʼ unaj u líiʼsaj tʼaanoʼobiʼ mix u sen ukʼikoʼob vinoiʼ, yéetel kʼaʼabéet u kaʼanskoʼob baʼax maʼalob,  utiaʼal beyoʼ ka u beetoʼob u kʼaʼajal u yiikʼ le koʼoleloʼob maas x-lóoʼbayanoʼoboʼ utiaʼal ka u yaabilt u yíichamoʼob, ka u yaabilt u paalaloʼob,  ka yanak junpʼéel maʼalob tuukul tiʼob, maʼ u yéekʼtal u kuxtaloʼob, ka u beet u meeyjil u yotochoʼob, ka yanaktiʼob utsul modos, ka u tsʼáaubaʼob yáanal u páajtalil u yíichamoʼob, utiaʼal beyoʼ maʼ u yaʼalaʼal baʼaloʼob kʼaastak tiʼ u tʼaan Dios.  Seguernak xan a sen aʼalik tiʼ le maas táankelmoʼob ka yanak junpʼéel maʼalob tuukul tiʼoboʼ.  Tiʼ tuláakal baʼax ka beetkeʼ, eʼes bix jeʼel u páajtal u beetaʼal baʼaloʼob maʼalobtakeʼ. Le ken a kaʼans le baʼaloʼob maʼalobtakoʼ eʼes yiijchajaʼan a tuukul,  yéetel meyajnaktech maʼalob tʼaanoʼob maʼ tu tsʼáaikoʼob tuʼux u yaʼalaʼal wa maʼ maʼalob baʼax ka waʼalikiʼ, utiaʼal beyoʼ le máaxoʼob yanoʼob t-contraoʼ ka u chʼaʼob suʼtal yéetel maʼ u yantal baʼax kʼaas u yaʼaloʼob t-oʼolal.  Le palitsiloʼoboʼ unaj u tsʼáaikubaʼob yáanal u páajtalil u tsʼuuliloʼob tiʼ tuláakal baʼal, unaj u yilkoʼob u lúubloʼob utsil tiʼob, maʼ unaj u kʼakʼatnúuktikoʼob u tʼaanoʼobiʼ, 10  yéetel maʼ unaj u yoklikoʼobiʼ, baʼaxeʼ unaj u yeʼeskoʼob jeʼel u páajtal u kʼubik u yóol máak tiʼobeʼ, utiaʼal beyoʼ tiʼ tuláakal baʼax ku beetkoʼobeʼ ka u jatsʼutskíintoʼob u kaʼansaj Dios, le k-Salvadoroʼ. 11  Tumen Dioseʼ tsʼoʼok u chíikbesik u nojoch utsil, yéetel lelaʼ táan u taasik salvación tiʼ tuláakal u jejeláasil máakoʼob. 12  Le baʼax xan tu beetaj Diosaʼ ku kaʼansiktoʼon bix jeʼel k-náachkuntikba tiʼ baʼaloʼob kʼaastak yéetel tiʼ luʼumkabil tsʼíibolaloʼobeʼ, bix jeʼel u yantaltoʼon junpʼéel toj kuxtal yéetel junpʼéel maʼalob tuukuleʼ, yéetel bix jeʼel k-kʼubik óol k-meyajt Dios teʼ yóokʼol kaab* yaan bejlaʼaʼ. 13  Lelaʼ kʼaʼabéet k-beetik mientras k-páaʼtik u yúuchul le jatsʼuts baʼal aʼalaʼantoʼonoʼ, bey xan le táan k-páaʼtik u chíikpajal u nojbeʼenil le nojoch Diosoʼ yéetel u nojbeʼenil Cristo Jesús, le k-Salvadoroʼ, 14  le máax tu kʼububa t-oʼolal utiaʼal ka u tokoʼon tiʼ tuláakal u jejeláasil baʼal kʼaasoʼ, yéetel utiaʼal ka u limpiokíint junpʼéel kaaj utiaʼal ka u tiaʼalint chéen letiʼ; lelaʼ máakoʼob jach u kʼubmaj u yóoloʼob u beetoʼob baʼaloʼob maʼalobtak. 15  Seguernak a kaʼansiktiʼob le baʼaloʼobaʼ, a sen aʼaliktiʼob yéetel a waʼalik u nuʼuk tiʼob yéetel le páajtalil tsʼaʼantechoʼ. Maʼ a chaʼik a mixbaʼalkúuntaʼal tumen mix máak.

Tsolajiloʼob

Ilaʼak Tipʼ. 16.