Santiago 5:1-20

5  Uʼuyeʼex lelaʼ, ayikʼal máakeʼex; okʼolneneʼex yéetel awatneneʼex tu yoʼolal le yaayaj óolaloʼob kun taal ta wóokʼoleʼexoʼ.  Le ayikʼalil yaanteʼexoʼ tsʼoʼok u tuʼutal, yéetel a nookʼeʼexeʼ tsʼoʼok u jaantaʼal tumen kʼamas.  A oroʼex yéetel a plataʼexeʼ tsʼoʼok u yiitsintkubaʼob; u yiitsoʼobeʼ yaan u yeʼesik yaan a siʼipileʼex yéetel yaan u jaantik a bakʼeleʼex. Le baʼaxoʼob a muchʼkíintmeʼexoʼ yaan u pʼáatal bey junpʼéel kʼáakʼ teʼ tu tsʼook kʼiinoʼoboʼ.  ¡Ileʼex! Tak beoraaʼ maʼ xuʼuluk u yawat tʼaan le boʼol a pʼaxmeʼex tiʼ le máaxoʼob joochnajoʼob ta kooleʼexoʼ; u yawat xan le jochnáaloʼob ku kʼáatkoʼob áantajoʼ tsʼoʼok u kʼuchul tu xikin Jéeoba, le máax gobernartik u soldadoiloʼob kaʼanoʼ.  Teʼexeʼ kuxaʼaneʼex chéen utiaʼal a kaxtikeʼex koʼokoj baʼaloʼob yéetel utiaʼal a kiʼimakkúuntik a wóoleʼex way Luʼumeʼ. Tsʼoʼok a polokkíintik a puksiʼikʼaleʼex tak utiaʼal u kʼiinil le kíimsajoʼ.  Tsʼoʼok xan a waʼalikeʼex kʼasaʼan le máax utsoʼ, yéetel tsʼoʼok tak a kíimskeʼex. Letiʼeʼ maʼ tu tokikuba tiʼ teʼex.  Le oʼolaleʼ, sukuʼuneʼex, chúukpajak a wóoleʼex páaʼtaj, tak teʼ kʼiinoʼob way yaan* Yuumtsiloʼ. ¡Ileʼex! Le kolnáaloʼ láayliʼ táan u páaʼtik u yantal u kiʼichkelem ich le luʼumoʼ. Letiʼeʼ chúukaʼan u yóol u páaʼte, tak ken kʼáaxak le yáax cháakoʼ bey xan le pachal jaʼoʼ.  Teʼex xaneʼ chúukpajak a wóoleʼex; muʼukʼaʼankúunteʼex u yóol a puksiʼikʼaleʼex, tumen tsʼoʼok u náatsʼal le kʼiinoʼob way yaan Cristooʼ.  Sukuʼuneʼex, maʼ a kʼuuxileʼex ta baatsileʼex, wa maʼeʼ bik juzgartaʼakeʼex. ¡Ileʼex! Le Juezoʼ tiʼ waʼalakbal aktáan tiʼ le joonajoʼ. 10  Sukuʼuneʼex, kaanbalneneʼex tiʼ bix úuchik u muʼyajtik baʼal kʼaas le profetaʼob tʼaanajoʼob tu kʼaabaʼ Jéeobaoʼ, yéetel tiʼ bix úuchik u chúukpajal u yóoloʼob. 11  ¡Ileʼex! Kiʼimak u yóol le máaxoʼob ku chúukpajal u yóoloʼob muʼyajoʼ. Teʼexeʼ a wuʼuymeʼex u yaʼalaʼal bix chúukpajik u yóol Job, yéetel tsʼoʼok a wilkeʼex baʼax utsil tsʼaʼabtiʼ tumen Jéeoba; Jéeobaeʼ jach nojoch u yaabilaj yéetel ku chʼaʼik óotsilil. 12  Chéen baʼaleʼ, in sukuʼuneʼex, baʼax maas unaj a beetkeʼexeʼ u xuʼulul a jurareʼex tu yoʼolal kaʼan wa tu yoʼolal Luʼum bey xan tu yoʼolal jeʼel baʼalakeʼ. Baʼaleʼ ken a waʼaleʼex yaan a beetkeʼex junpʼéel baʼaleʼ, beeteʼex; wa ka waʼalikeʼex maʼataneʼ, maʼ a beetkeʼex; utiaʼal beyoʼ maʼ a juzgartaʼaleʼex. 13  ¿Yaan wa máax ichileʼex táan u muʼyajtik talamiloʼob? U tsʼáa u yóol orar. ¿Yaan wa máax kiʼimak u yóol? U kʼay salmoʼob. 14  ¿Yaan wa máax kʼojaʼan ichileʼex? U tʼan u ancianoiloʼob le múuchʼuliloʼ, utiaʼal ka orarnakoʼob tu yoʼolal táan u jiʼikʼabtikoʼob yéetel aceite tu kʼaabaʼ Jéeoba. 15  Le oración ku beetaʼal yéetel fejoʼ yaan u tsʼakik le máax kʼojaʼanoʼ,* yéetel yaan u líiʼsaʼal tumen Jéeoba. Wa kʼebanchajaʼan xaneʼ yaan u perdonartaʼal. 16  Le oʼolaleʼ, cada juntúul tiʼ teʼexeʼ u yaʼal tuláakal u kʼebanoʼob, yéetel orarneneʼex ta baatsileʼex utiaʼal ka tsʼaʼakakeʼex. U kʼáat óolal le máax toj u kuxtaloʼ jach yaan u muukʼ yéetel ku beetik uts. 17  Elías kaʼacheʼ juntúul máak jeʼex toʼoneʼ; kex beyoʼ tu sen kʼáat óoltaj ich oración maʼ u kʼáaxal jaʼ, ka tsʼoʼokeʼ ichil óoxpʼéel jaʼab yéetel seis meseseʼ maʼ kʼáax jaʼ yóokʼol le luʼumoʼ. 18  Tsʼoʼoleʼ, le ka orarnaj tu kaʼatéenoʼ kʼáax jaʼ; le luʼum túunoʼ tu tsʼáaj u yich. 19  In sukuʼuneʼex, wa yaan máax ichileʼex ku náachkuntaʼal tiʼ le jaajoʼ, yéetel ku beetaʼal u suut tumen wa máaxeʼ, 20  ojéelteʼexeʼ jeʼel máaxak ka u beet u suut juntúul j-kʼeban máak utiaʼal ka u pʼat le baʼax kʼaas ku beetkoʼ, yaan u tokik u kuxtal* tiʼ le kíimiloʼ yéetel yaan u yáantaj utiaʼal ka pʼoʼobok* yaʼab kʼebanoʼob.

Tsolajiloʼob

Gr.: parousía. Ilaʼak Tipʼ. 5.
Lit.: «kaʼanaʼanoʼ».
Wa: «alma». Gr.: sikjé. Ilaʼak Tipʼ. 7A.
Lit.: «pixik».