Santiago 2:1-26

2  In sukuʼuneʼex, teʼex a tsʼaamaj a fejeʼex tiʼ k-kiʼichkelem Yuumtsil Jesucristoeʼ, ¿máasaʼ maʼ táan a yéeyikeʼex tiʼ máaxoʼob ken a weʼeseʼex a wutsileʼexiʼ?  Tumen wa le tuʼux muchʼukbaleʼex ku yokol juntúul máak chuup u kʼab yéetel anilloʼob de oro yéetel u búukintmaj junpʼéel jatsʼuts nookʼ, baʼaleʼ ku yokol xan juntúul máak óotsil yéetel éekʼ u nookʼeʼ,  ¿maas wa maʼalob a wilkeʼex le máax u búukintmaj le jatsʼuts nookʼoʼ, yéetel ka waʼalikeʼextiʼ: «Techeʼ kulen teʼ jach maʼalob kúuchilaʼ», baʼaleʼ tiʼ le óotsiloʼ ka waʼalikeʼex: «Techeʼ pʼáatkech waʼatal teʼelaʼ», wa: «Techeʼ kulen tu tséel le kʼáancheʼ tuʼux kin tʼalkúuntik in wookoʼ»?  Wa bey a beetkeʼexoʼ, ¿maʼ wa túun tsʼoʼok u kʼastal bix a juzgartikeʼex a wéet máakileʼex yéetel táan a weʼeskeʼex utsil chéen tiʼ junjaats máakoʼob ichileʼexiʼ?  Uʼuyeʼex lelaʼ, in yaabilaj sukuʼuneʼex. ¿Maʼ wa Dios yéey le máaxoʼob óotsiloʼob tu táan u máakiloʼob yóokʼol kaab utiaʼal ka ayikʼalchajkoʼob yéetel fe bey xan utiaʼal ka u kʼamoʼob le Reino u yaʼalmaj u tsʼáaik tiʼ le máaxoʼob yaabiltmiloʼ?  Baʼaleʼ teʼexeʼ tsʼoʼok a mixbaʼalkúuntikeʼex le máak óotsiloʼ. ¿Maʼ wa letiʼe ayikʼal máakoʼob loobiltikeʼex yéetel jíiltik u biseʼex tu táan le juezoʼoboʼ?  ¿Maʼ wa letiʼob kʼaakʼastʼantik u kiʼichkelem kʼaabaʼ le máax tʼaneʼexoʼ?  Le oʼolaleʼ wa ka tsʼoʼokbeskeʼex le nojoch ley* jeʼex u yaʼalik le tsʼíibaʼ: «Kʼaʼabéet a yaabiltik a wéet máakil jeʼel bix a yaabiltikabaeʼ», jach maʼalob baʼax ka beetkeʼex.  Baʼaleʼ wa maʼ tu xuʼulul a weʼeskeʼex utsil chéen tiʼ junjaats máakoʼobeʼ táan a kʼebantaleʼex, yéetel yaan u yeʼesaʼal kʼasaʼan máakeʼex tumen le leyoʼ. 10  Tumen wa yaan máax ku tsʼoʼokbesik tuláakal baʼax ku yaʼalik le Leyoʼ, baʼaleʼ ku kʼuchul tʼóochpajal tiʼ junpʼéeleʼ, ku kʼebantal tiʼ tuláakal le Leyoʼ. 11  Tumen le máax aʼal: «Maʼ unaj a lúubul tiʼ adulteriooʼ»,* tu yaʼalaj xan: «Maʼ unaj a kíimsik máakiʼ». Bey túunoʼ wa maʼ ta lúubul tiʼ adulterio baʼaleʼ ka kíimsik máakeʼ, tsʼoʼok a kʼebantal tu táan ley. 12  Seguernak a tʼaaneʼex yéetel a kuxtaleʼex jeʼex u beetik le máaxoʼob kun juzgartbiloʼob tumen u leyil le jáalkʼabiloʼ. 13  Tumen máax maʼatech u chʼaʼik óotsilileʼ maʼ xan kun chʼaʼabil óotsilil tiʼ ken juzgartaʼak. Tumen u chʼaʼabal óotsilileʼ maas nojoch baʼal tiʼ u juzgartaʼal máak. 14  In sukuʼuneʼex, wa yaan máax ku yaʼalik yaan u fe, baʼaleʼ maʼ tu beetik utsil meyajoʼobeʼ, ¿baʼax utsil ku taasik? ¿Máasaʼ maʼ kun salvartbil tumen le fe yaantiʼoʼ? 15  Koʼox aʼalikeʼ, tiʼ juntúul sukuʼun wa juntúul kiikeʼ táan u bineltik le nookʼ yéetel le janal kʼaʼabéettiʼ utiaʼal le kʼiinoʼ, 16  baʼaleʼ juntúul ichileʼexeʼ ku yaʼaliktiʼ: «Xiʼiktech utsil, tepʼaba yéetel jaanen tubeel», baʼaleʼ maʼ ta tsʼáaikeʼex baʼax kʼaʼabéettiʼeʼ, ¿baʼax u biilal leloʼ? 17  Bey túun xanoʼ, le fe minaʼan utsil meyajoʼob tiʼoʼ kimen yanil. 18  Baʼaleʼ yaan máax jeʼel u yaʼalikeʼ: «Techeʼ yaan a fe, baʼaleʼ teneʼ kin beetik utsil meyajoʼob. Eʼesten a fe kex maʼ ta beetik utsil meyajoʼob, teen túuneʼ yaan in weʼesiktech in fe tu yoʼolal in wutsil meyajoʼob». 19  Techeʼ ka creertik chéen juntúul Dios yaan, ¿máasaʼ? Jach maʼalob baʼax ka beetik. Baʼaleʼ tak le demonioʼob creertikoʼ yéetel ku kikilankiloʼob tu yoʼolal u saajkiloʼob. 20  Baʼaleʼ, teech wíinik minaʼan a naʼat, ¿maʼ wa a wojleʼ le fe minaʼan utsil meyajoʼob tiʼoʼ mix baʼal u biilal? 21  ¿Maʼ wa aʼalaʼab toj u kuxtal k-taata Abrahán tu yoʼolal utsil meyajoʼob le ka tu tsʼáaj Isaak, u hijo, yóokʼol le altar utiaʼal u kʼuboʼ? 22  Jeʼex a wilkeʼexoʼ, kex yaan u fejeʼ tu beetaj xan utsil meyajoʼob, bey túunoʼ u fejeʼ jach chúukaʼanchaj tu yoʼolal le utsil meyajoʼob tu beetoʼ. 23  Béeychaj túun le baʼax ku yaʼalik le Kiliʼich Tsʼíibaʼ: «Abrahaneʼ tu tsʼáaj u fe tiʼ Jéeobaeʼ ka ilaʼab bey juntúul máak toj u kuxtaleʼ», ka túun kʼuch aʼalbiltiʼeʼ «u amigo Jéeoba». 24  Jeʼex a wilkeʼexoʼ, máakeʼ ku yaʼalaʼal toj u kuxtal tu yoʼolal utsil meyajoʼob, maʼ chéen tu yoʼolal fejiʼ. 25  Bey túun xanoʼ, Rahab, le koʼolel chéen bey u máanoʼ, ¿maʼ wa aʼalaʼab toj u kuxtal tu yoʼolal utsil meyajoʼob le ka tsʼoʼok u utsul kʼamik tu yotoch le j-bisaj tʼaanoʼob, yéetel le ka tu túuxtoʼob tiʼ yaanal bejoʼ? 26  U jaajileʼ, jeʼex junpʼéel wíinklil minaʼan u muukʼ* kimen yanileʼ, le fe xan minaʼan utsil meyajoʼob tiʼoʼ, kimen yanil.

Tsolajiloʼob

Lit.: «u ley le reyoʼ».
Lelaʼ letiʼ ken núupkʼebanchajak juntúul xiib wa juntúul koʼolel tsʼokaʼan u beel.
Gr.: néuma. Ilaʼak Tipʼ. 7B.