Romanos 9:1-33

9  Teneʼ táan in waʼalik u jaajil tumen u disipuloen Cristo; maʼ táan in tuusiʼ, le kiliʼich muukʼoʼ* junmúuchʼ yéetel in concienciaeʼ ku jaajkúuntik  jach okʼom in wóol yéetel mantatsʼ yaachajaʼan u yóol in puksiʼikʼal.  Tumen jeʼel tak in tsʼíiboltik ka náachkuntaʼaken tiʼ Cristo bey xan ka kíimsaʼaken tu yoʼolal in sukuʼunoʼob, in wéet kʼiʼikʼeloʼob,  le israelitaʼoboʼ. Letiʼobeʼ ku náajmatkoʼob ka máataʼakoʼob tumen Dios bey u paalaloʼobeʼ yéetel ka nojbeʼenkúuntaʼakoʼob. Letiʼob xan tiaʼalintik le núuptʼaanoʼoboʼ, u tsʼíibil le Leyoʼ, u páajtalil u adorartikoʼob Dios yéetel letiʼob tiaʼalintik le baʼaxoʼob aʼalaʼan u tsʼaʼabaloʼ;  letiʼobeʼ tiʼ u taaloʼob tiʼ k-úuchben taataʼobeʼ, tiʼ máaxoʼob xan taal le Cristooʼ. Mantatsʼ ka kiʼikiʼtʼantaʼak Dios, le máax yaan tu yóokʼol tuláakal máakoʼ. Amén.  Baʼaleʼ lelaʼ maʼ u kʼáat u yaʼal wa maʼ béeychaj le baʼax tu yaʼalaj Diosoʼ. Baʼax úucheʼ maʼ tuláakal u paalaloʼob Israel táakpajaʼanoʼob ichil «Israeliʼ».  Maʼ xan tumen u paalaloʼob Abrahaneʼ tuláakloʼob jach u paalaloʼob Abrahán tu táan Diosiʼ, baʼaxeʼ jeʼex tsʼíibtaʼanilaʼ: «Le máaxoʼob kun aʼalbil ‹a chʼiʼibaloʼ› tiʼ Isaak kun taal».  Lelaʼ u kʼáat u yaʼaleʼ le paalaloʼob sijnáaloʼoboʼ maʼ tuláakloʼob jach u paalaloʼob Diosiʼ, baʼaxeʼ le paalaloʼob tsʼaʼab le promesa tiʼob tumen Diosoʼ, letiʼob táakaʼanoʼob ichil u chʼiʼibal Abrahán.  Tumen letiʼe baʼax tu yaʼalaj Dios kun úuchlaʼ: «Teʼ kʼiin in waʼalmoʼ yaan in suut, Sara túuneʼ yaan u yantal juntúul u paal». 10  Baʼaleʼ maʼ chéen teʼ kʼiinoʼob jeʼeloʼ, bey xan úuch le ka síijsaʼab j-iichoʼob tumen Rebecaoʼ, u paalal chéen juntúul máak, Isaak le k-úuchben taataoʼ. 11  Tumen táanil tiʼ u síijil le paalaloʼobaʼ yéetel táanil tiʼ u beetkoʼob baʼax uts wa baʼax kʼaaseʼ, utiaʼal maʼ u yéeyaʼal máak yoʼolal baʼax ku beetik, baʼaxeʼ ka seguernak u yéeyaʼal jeʼex u kʼáat le Máax tʼanik máakoʼ, 12  aʼalaʼab tiʼ Rebeca: «Le nojochoʼ yaan u palitsiltaʼal tumen le chichanoʼ». 13  Jeʼex tsʼíibtaʼanilaʼ: «Tin yaabiltaj Jacob, baʼaleʼ tin pʼektaj Esaú». 14  ¿Baʼax túun ken k-aʼale? ¿Kʼaas baʼax ku beetik Dios? ¡Maʼ! ¡Mix bikʼin ka úuchuk leloʼ! 15  Tumen letiʼeʼ tu yaʼalaj tiʼ Moisés: «Le máax ku yeʼesik yaabilajeʼ yaan xan in weʼesik yaabilaj tiʼ, le máax ku chʼaʼik óotsilileʼ yaan xan in chʼaʼik óotsilil tiʼ». 16  Bey túunoʼ lelaʼ maʼ tu yúuchul tumen bey u tsʼíiboltik máakoʼ mix tu yoʼolal le áalkab ku beetik máakoʼ, baʼaxeʼ ku yúuchul tumen bey u kʼáat Diosoʼ, le máax ku chʼaʼik óotsililoʼ. 17  Tsʼoʼoleʼ le Kiliʼich Tsʼíiboʼ ku yaʼalik tiʼ Faraón: «Yoʼolal le jeʼelaʼ tin chaʼaj a kuxtal tak bejlaʼeʼ, utiaʼal beyoʼ ta woʼolaleʼ ka in weʼes in páajtalil, yéetel utiaʼal ka kʼaʼaytaʼak in kʼaabaʼ tiʼ tuláakal yóokʼol kaab». 18  Bey túunoʼ Dioseʼ ku chʼaʼik óotsilil tiʼ máax u kʼáat, yéetel ku chaʼik u chichtal u puksiʼikʼal le máax u kʼáatoʼ. 19  Le oʼolal techeʼ yaan a waʼalikten: «¿Baʼaxten túun Dioseʼ maʼ tu xuʼulul u yaʼalik yaan u siʼipil máak? Si tuláakal máak táan u beetik le baʼax u yaʼalmaj ka beetaʼakoʼ». 20  Baʼaleʼ wíinik, ¿jach máaxech túun teech utiaʼal ka a kʼáatnúukt u tʼaan Dios? Le baʼax pataʼanoʼ, ¿yaan wa u yaʼalik tiʼ le máax patmiloʼ: «¿Baʼaxten bey ta beetilenoʼ?»? 21  ¿Bix túun? Le máax patik le kʼatoʼ, ¿minaʼan wa u páajtalil tiʼ utiaʼal u chʼaʼik junwóol kʼat utiaʼal u patik junpʼéel nuʼukul utiaʼal baʼax maʼalob, wa utiaʼal u patik junpʼéel nuʼukul utiaʼal baʼax maʼ maʼalobiʼ? 22  Bey túunoʼ, wa Dios, kex taak u yeʼesik u kʼuuxilil bey xan u páajtalil, tu chaʼaj u yantal nuʼukuloʼob utiaʼal kʼuuxilil, beetaʼaniliʼob utiaʼal xuʼulsajil, yéetel chúukpaj u yóol tiʼ letiʼobeʼ, ¿baʼax túun yaantiʼ? 23  Lelaʼ beetaʼab xan utiaʼal u yeʼesaʼal u nojoch yéetel u kiʼichkelem nojbeʼenil Dios yóokʼol nuʼukuloʼob utiaʼal chʼaʼ óotsil, le baʼaxoʼob u beetmiliʼ Dios utiaʼal nojbeʼeniloʼ; 24  le nuʼukuloʼobaʼ toʼon máaxoʼon tu tʼanoʼon maʼ chéen ichil le judíoʼoboʼ, baʼaxeʼ tak ichil le j-táanxel luʼumiloʼoboʼ; wa bey tu beetiloʼ, ¿baʼax túun yaantiʼ? 25  Jeʼex u yaʼalik Dios xan tu libroil Oseaseʼ: «Le máaxoʼob maʼ in kaajaleʼ yaan in waʼaliktiʼob ‹in kaajal›, yéetel le koʼolel maʼ yaabiltaʼanoʼ yaan in waʼalik ‹yaabiltaʼan›; 26  yéetel teʼ tuʼux aʼalaʼabteʼex: ‹Teʼexeʼ maʼ in kaajaleʼexiʼ›, tiʼ kun aʼalbilteʼex ‹u paalaleʼex le kuxaʼan Diosoʼ›». 27  Tsʼoʼoleʼ Isaíaseʼ ku kʼaʼam aʼalik yoʼolal Israel: «Kex u yaʼabil u paalal Israel bey jeʼex u yaʼabil u arenail le kʼáaʼnáaboʼ, chéen le u yalab pʼaatal kun salvartbiloʼ. 28  Tumen Jéeobaeʼ yaan u kʼáatik cuenta tiʼ u kajnáaliloʼob le yóokʼol kaabaʼ, lelaʼ yaan u tsʼoʼokbesik yéetel yaan u séeb beetik». 29  Lelaʼ jach jeʼex úuchik u yaʼalik Isaías úuchjeakiloʼ: «Wa Jéeoba, le máax gobernartik u soldadoiloʼob kaʼan maʼ u chaʼik kaʼach u yantal k-chʼiʼibaleʼ, bejlaʼa tsʼoʼok k-pʼáatal jeʼex Sodoma yéetel Gomorraeʼ». 30  ¿Baʼax túun ken k-aʼale? Yaan k-aʼalikeʼ u kajnáaliloʼob le táanxel luʼumiloʼoboʼ, kex maʼatech u beetkoʼob baʼax tojeʼ, aʼalaʼab toj u kuxtaloʼob yoʼolal le fe yanchajtiʼoboʼ; 31  baʼaleʼ u kaajil Israeleʼ kex táan kaʼach u bisik u leyil le toj kuxtaloʼ, maʼ páajchaj u tsʼoʼokbesik le leyoʼ. 32  ¿Baʼaxten túun? Tumen maʼ yoʼolal u fejoʼob tu tsʼoʼokbesoʼobiʼ, baʼaxeʼ chéen tu yoʼolal le baʼaxoʼob tu beetoʼoboʼ. Tʼóochpajoʼob tiʼ «u tuunichil tʼóochpajal»; 33  jeʼex tsʼíibtaʼanileʼ: «¡Ileʼex! Táan in tsʼáaik junpʼéel u tuunichil tʼóochpajal tu kaajil Sión, bey xan junpʼéel nojoch tuunich ku beetik u lúubul máak, baʼaleʼ jeʼel máaxak ka u tsʼáa u fe tiʼeʼ maʼ kun pʼatbil ich suʼtsilil».

Tsolajiloʼob

Wa: «espíritu santooʼ». Ilaʼak Tipʼ. 16.