Romanos 11:1-36

11  Kin kʼáatik túun lelaʼ: ¿Máasaʼ Dioseʼ maʼ tu xúumpʼattaj u kaajaliʼ? ¡Maʼ! ¡Mix bikʼin ka úuchuk leloʼ! Tumen tak teen israelitaen; teneʼ tiʼ u paalaloʼob Benjamín in taal, letiʼobeʼ táakpajaʼanoʼob tiʼ u chʼiʼibal Abrahán.  U jaajileʼ Dioseʼ maʼ tu xúumpʼattaj u kaajaliʼ, le kaaj tu yáax kʼaj óoltoʼ. ¿Maʼ wa a wojleʼex le baʼax ku yaʼalik le Kiliʼich Tsʼíib yoʼolal Elías le ka tʼaanaj tu táan Dios tu contra le israelitaʼoboʼ? Elíaseʼ tu yaʼalaj:  «Jéeoba, tsʼoʼok u kíimskoʼob a profetaʼob yéetel tsʼoʼok u jenikoʼob a altaroʼob; tsʼoʼoleʼ chéen teen pʼaatlen yéetel táan u kaxtikenoʼob utiaʼal u luʼskoʼob in kuxtal».*  Baʼaleʼ ¿baʼax núukaʼabtiʼ tumen Dios? Núukaʼabtiʼ: «Teneʼ tsʼoʼok in wilik ka pʼáatakten siete mil máakoʼob, máaxoʼob maʼ xolajoʼob tu táan Baaliʼ».  Teʼ kʼiinoʼob xanaʼ, u yalab tiʼ u kajnáaliloʼob Israeleʼ tsʼoʼok u suutoʼob; lelaʼ úuchi tumen yéeyaʼaboʼob tu yoʼolal u nojoch utsil Dios.  Baʼaleʼ wa yéeyaʼaboʼob tu yoʼolal u nojoch utsil Dioseʼ, leloʼ u kʼáat u yaʼaleʼ maʼ yéeyaʼaboʼob yoʼolal le baʼaxoʼob tu beetoʼoboʼ, tumen wa beyoʼ, le nojoch utsiloʼ yaan u pʼáatal maʼ nojoch utsiliʼ.  ¿Baʼax túun ken k-aʼale? Le baʼax tu jach tsʼáaj u yóol u kaxt u kaajil Israeleʼ maʼ tsʼaʼabtiʼiʼ, baʼaxeʼ tsʼaʼab tiʼ le máaxoʼob yéeyaʼaboʼoboʼ. Le u maasiloʼob túunoʼ chichchaj u puksiʼikʼaloʼob;  jeʼex tsʼíibtaʼanilaʼ: «Dioseʼ tsʼoʼok u beetik u pʼáatloʼob jeʼex le máaxoʼob jach tʼuubul u weenloʼoboʼ; tsʼoʼoleʼ tu tsʼáaj xan tiʼob ichoʼob minaʼan u sáasililoʼob yéetel xiknoʼob kóoktakoʼob tak teʼ kʼiinoʼobaʼ».  David xaneʼ ku yaʼalik: «U kʼiinbesajoʼobeʼ* ka kʼuchuk u beetuba bey junpʼéel léecheʼ, bey junpʼéel u tuunichil tʼóochpajleʼ yéetel bey junpʼéel castigo utiaʼaloʼobeʼ; 10  ka lukʼuk u sáasilil u yichoʼob utiaʼal maʼ u paakatoʼob yéetel beet xan u wúutsʼul u paachoʼob utiaʼal mantatsʼ». 11  Le oʼolaleʼ kin kʼáatik: Le ka tʼóochpaj le israelitaʼoboʼ, ¿lúuboʼob wa ka tak pʼáat maʼ tu páajtal u líikʼloʼob? ¡Maʼ! ¡Mix bikʼin ka úuchuk leloʼ! Baʼaleʼ tumen maʼ tu tsʼoʼokbesoʼob le baʼax ku yaʼalik le leyoʼ yaan u salvartaʼal le j-táanxel luʼumiloʼoboʼ, lelaʼ utiaʼal ka beetaʼak u kʼuuxiloʼob.* 12  Bey túunoʼ wa tu taasaj ayikʼalil tiʼ le yóokʼol kaab le úuchik u pʼáatal maʼ u tsʼoʼokbeskoʼob le leyoʼ, yéetel wa ku taasik ayikʼalil tiʼ le j-táanxel luʼumiloʼob le úuchik u pʼíittaloʼoboʼ, ¡bukaʼaj túun maas ayikʼalil jeʼel u taaskoʼob tu chúukaʼaniloʼobeʼ! 13  Beora túunaʼ táan in tʼaan ta wéeteleʼex, teʼex táanxel luʼumil a taaleʼex. Tumen túuxtaʼaben bey juntúul apóstol teʼ táanxel luʼumiloʼoboʼ, teneʼ kin nojbeʼenkúuntik le meyaj tsʼaʼanten 14  wa ka páajchajak in beetik u yaatal u yóol* le máaxoʼob in wéet luʼumiloʼoboʼ yéetel ka páajchajak in salvartik jujuntúul tiʼ letiʼobiʼ. 15  Tumen wa le úuchik u xúumpʼattaʼal le israelitaʼob ku beetik u kaʼa biskuba tuláakal máak yéetel Diosoʼ, ¿baʼax túun u kʼáat u yaʼal u kaʼa kʼaʼamloʼob? Lelaʼ u kʼáat u yaʼaleʼ bey ka líiʼsaʼakoʼob ichil le kimenoʼoboʼ. 16  Tsʼoʼoleʼ wa kiliʼich le u yáax jaats tiʼ le juuchʼ ku chʼaʼabloʼ, kiliʼich xan tuláakal le juuchʼoʼ; wa kiliʼich u moots le cheʼoʼ, kiliʼich xan u kʼaboʼob. 17  Baʼaleʼ wa kúulchʼaktaʼab jujunpʼéel tiʼ u kʼaboʼob, yéetel techeʼ kex kʼáaxil olivoecheʼ injertartaʼabech* tu jeeloʼob yéetel tsʼoʼok a poloktal yéetel u yiits ku taal tiʼ u mootsoʼ, 18  maʼ a taaskaba nojbaʼalil tu yóokʼol le kʼaboʼob jéekʼchʼaktaʼaboʼob tumen Diosoʼ, tumen maʼ teech tséentik u moots le cheʼoʼ, baʼaxeʼ letiʼe moots tséentikechoʼ. 19  Techeʼ jeʼel wal a waʼalikeʼ: «Jujunpʼéel tiʼ le kʼaboʼoboʼ kúulchʼaktaʼaboʼob utiaʼal ka injertartaʼaken tu jeeloʼob». 20  ¡Jaaj, beyoʼ! Tumen minaʼan u fejoʼobeʼ kúulchʼaktaʼaboʼob, baʼaleʼ techeʼ yoʼolal a fejeʼ tiʼ yanechiʼ. Xuʼuluk a taaskaba nojbaʼalil, baʼaleʼ chʼaʼ saajkil. 21  Tumen wa Dios maʼ tu chaʼaj u pʼáatal u jach jéejekʼal le cheʼoʼ, mix teech ken u chaʼa a pʼáatliʼ. 22  Le oʼolaleʼ, ilawile, Dioseʼ ku yeʼesik u yutsil, baʼaleʼ ku yeʼesik xan u pʼujaʼanil. Tiʼ le máaxoʼob náachchajoʼoboʼ ku yeʼesik u pʼujaʼanil, baʼaleʼ tiʼ techeʼ, wa ka pʼáatal tiʼ u yutsileʼ, yaan u yeʼesiktech u yutsil; wa maʼeʼ yaan xan a kúulchʼaktaʼal. 23  Tak letiʼobeʼ, wa ku kaʼa yantal u fejoʼobeʼ yaan u kaʼa injertartaʼaloʼobiʼ, tumen Dioseʼ jeʼel u páajtal u kaʼa takʼkoʼobeʼ. 24  Tumen wa teech kúulchʼaktaʼabech tiʼ junkúul kʼáaxil olivo, tsʼoʼoleʼ kex maʼ suukaʼan u beetaʼaleʼ, injertartaʼabech tiʼ junkúul olivo yaan teʼ parcelaoʼ, ¿maʼ wa túun maas jeʼel u kaʼa injertartaʼal le u jach jéejekʼal le olivo teʼ tuʼux jéekʼchʼaktaʼaboʼoboʼ? 25  Sukuʼuneʼex, teneʼ maʼ in kʼáat ka a tukleʼex wa jach táaj yaan a naʼateʼex ka tak pʼáatak maʼ a chʼaʼikeʼex en cuenta le kiliʼich baʼal taʼakaʼanaʼ: Tsʼeʼetsʼek tiʼ u kaajil Israeleʼ tsʼoʼok u chichtal u puksiʼikʼaloʼob, lelaʼ bey kun pʼáatal tak ken okok tuláakal le jaytúul j-táanxel luʼumiloʼob yéeyaʼanoʼob tumen Diosoʼ, 26  utiaʼal beyoʼ ka u salvartuba tuláakal u kaajil Israel. Jeʼex tsʼíibtaʼanilaʼ: «Le máax kun jáalkʼabtajoʼ tu kaajil Sión kun jóokʼol yéetel yaan u beetik u xuʼulul u beetaʼal baʼaloʼob kʼaastak tumen u paalal Jacob. 27  Lelaʼ letiʼe núuptʼaan ken in béeykunt tu yéeteloʼob le ken in luʼs u kʼebanoʼoboʼ». 28  U jaajileʼ, tiʼ baʼax yaan yil yéetel le maʼalob péektsiloʼ, letiʼobeʼ pʼektaʼanoʼob ta woʼolaleʼex, baʼaleʼ úuchik u yéeyaʼaloʼob tumen Dioseʼ yaabiltaʼanoʼob tu yoʼolal u úuchben láakʼtsiloʼob. 29  Tumen Dioseʼ maʼatech u yaatal u yóol ken tsʼoʼokok u síik wa baʼax mix ken tsʼoʼokok u yéeyik wa máax. 30  Teʼexeʼ maʼatech a wuʼuyikeʼex u tʼaan Dios kaʼachi, baʼaleʼ beoraaʼ Dioseʼ ku chʼaʼikteʼex óotsilil tu yoʼolal u x-maʼ uʼuyajtʼaanil le judíoʼoboʼ; 31  bey túun xanoʼ úuchik u chʼaʼikteʼex óotsilil Dios tu yoʼolal u x-maʼ uʼuyajtʼaanil le judíoʼoboʼ, beoraaʼ jeʼel u páajtal xan u chʼaʼabal óotsilil tiʼ letiʼobeʼ. 32  Tumen Dioseʼ tsʼoʼok u kʼalik tuláakal máak yáanal x-maʼ uʼuyajtʼaanil utiaʼal ka u chʼaʼ óotsilil tiʼ tuláakloʼob. 33  ¡Bukaʼaj taamil u ayikʼalil Dios, u naʼat bey xan u kʼaj óolal! ¡Maʼ tu páajtal u chʼaʼnuʼuktaʼal le baʼaxoʼob ku tuklik u beetkoʼ mix u xakʼaltaʼal u beeloʼob! 34  Tumen «¿máax tsʼoʼok u kʼuchul u kʼaj óolt u tuukul Jéeoba, wa, máax tsʼoʼok u tsolik u xikin?». 35  Wa, «¿máax tsʼoʼok u yáax tsʼáaik wa baʼax tiʼ Dios, utiaʼal ka kʼaʼabéetchajak u boʼotaʼaltiʼ?». 36  Tumen tiʼ letiʼ u taal tuláakal baʼal, tu yoʼolal letiʼ yanoʼob yéetel letiʼ láaj tiaʼalintikoʼob. Tiʼ letiʼ ka tsʼaʼabak nojbeʼenil utiaʼal mantatsʼ. Amén.

Tsolajiloʼob

Wa: «alma». Gr.: sikjé. Ilaʼak Tipʼ. 7A.
Lit.: «mesa».
Wa: «celosochajloʼob».
Wa: «celosochajal».
Wa: «yemartaʼabech».