Mateo 7:1-29

7  »Xuʼuluk a juzgareʼex utiaʼal maʼ a juzgartaʼaleʼex,  tumen jeʼel bix a juzgareʼexeʼ bey xan kan juzgartbileʼexoʼ, yéetel jeʼel bix a pʼiiseʼexeʼ bey xan kan pʼisbileʼexoʼ.  ¿Baʼaxten túun ka wilik le sojol yaan tu yich a sukuʼunoʼ, baʼaleʼ maʼ ta wilik le nuxiʼ cheʼ kʼatakbal ta wichoʼ?  Wa ¿bix u páajtal a waʼalik tiʼ a sukuʼun: ‹Chaʼa in jóoʼsik le sojol yaan ta wichoʼ›?; tsʼoʼoleʼ, ¡ile!, techeʼ yaan junpʼéel nuxiʼ cheʼ ta wich.  ¡J-kaʼapʼéel ich! Yáaxeʼ jóoʼs le nuxiʼ cheʼ kʼatakbal ta wichoʼ, utiaʼal ka páatak a wilik tubeel bix jeʼel a jóoʼsik le sojol yaan tu yich a sukuʼunoʼ.  »Maʼ a tsʼáaikeʼex le kiliʼich baʼaloʼob tiʼ le peekʼoʼoboʼ, mix a pulkeʼex a perlaʼex tu táan kʼéekʼenoʼob utiaʼal maʼ u pepeʼchaʼatikoʼob yéetel utiaʼal maʼ u sutkubaʼob xan u xeʼexetʼeʼexoʼob.  »Maʼ u xuʼulul a kʼáatkeʼex, tumen yaan u tsʼaʼabalteʼex; maʼ u xuʼulul a kaaxaneʼex, tumen yaan a kaxtikeʼex; maʼ u xuʼulul a kʼoopeʼex, tumen yaan u jeʼebelteʼex joonaj.  Tumen tuláakal máax ku kʼáatkeʼ ku tsʼaʼabaltiʼ, tuláakal máax ku kaaxaneʼ ku kaxtik yéetel tuláakal máax ku kʼoopeʼ ku jeʼebel joonaj tiʼ.  U jaajileʼ, ¿máax ichileʼex jeʼel u tsʼáaik junpʼéel tuunich tiʼ u paal ken u kʼáat waajeʼ? 10  Wa xan ku kʼáatik juntúul kayeʼ, ¿máasaʼ maʼ tu tsʼáaik juntúul kaan tiʼ? 11  Le oʼolaleʼ, wa teʼex kex kʼasaʼaneʼex a wojel a tsʼáaʼex maʼalob baʼaloʼob tiʼ a paalaleʼexeʼ, ¿kux túun a Taataʼex yaan teʼ kaʼanoʼ?, ¿maʼ wa maas jeʼel u tsʼáaik maʼalob baʼaloʼob tiʼ le máaxoʼob kʼáatiktiʼoʼ? 12  »Le oʼolal túuneʼ, tuláakal le baʼaxoʼob a kʼáateʼex ka beetaʼakteʼex tumen le máakoʼoboʼ, teʼexeʼ bey xan kʼaʼabéet a beetkeʼextiʼoboʼ. Tumen u jaajileʼ letiʼe baʼax ku kaʼansik le Ley yéetel le Profetaʼoboʼ. 13  »Ookeneʼex tiʼ le nuʼunutʼ joonajoʼ, tumen nojoch yéetel kóoch le bej ku bisik máak tiʼ xuʼulsajiloʼ, yéetel yaʼab máaxoʼob ku binoʼobiʼ; 14  baʼaleʼ nuʼutʼ le joonajoʼ yéetel chichan le bej ku bisik máak tiʼ kuxtaloʼ, yéetel maʼ yaʼab máaxoʼob kaxtik le bejaʼ. 15  »Kanáantabaʼex tiʼ le maʼ jaajil profetaʼob ku taaloʼob ta wiknaleʼex bey tamanoʼobeʼ, baʼaleʼ u jaajileʼ loboʼob* maʼatech u yuʼubik u naʼajtaloʼob. 16  Tiʼ u yichoʼobeʼ* tiʼ ken a kʼaj óolteʼex máaxoʼobiʼ. ¿Máasaʼ maʼatech u tʼoʼokol uvaʼob mix higoʼob tiʼ kʼiʼixoʼob? 17  Bey túun xanoʼ, tuláakal maʼalob cheʼeʼ ku tsʼáaik maʼalob ich, baʼaleʼ tuláakal cheʼ kʼaschajaʼaneʼ maʼ patal le ich ku tsʼáaikoʼ. 18  Junkúul maʼalob cheʼeʼ maʼ tu páajtal u tsʼáaik u yich maʼ pataliʼ; junkúul cheʼ kʼaschajaʼaneʼ maʼ xan tu páajtal u tsʼáaik maʼalob ich. 19  Tuláakal cheʼ maʼ tu tsʼáaik maʼalob icheʼ ku kúulchʼaktaʼaleʼ ku puʼulul ich kʼáakʼ. 20  U jaajileʼ, tiʼ u yichoʼobeʼ tiʼ ken a kʼaj óolteʼex le máakoʼob jeʼeloʼ. 21  »Maʼ tuláakal máax ku yaʼalikten: ‹Yuumtsil, Yuumtsil›, bíin okok tu Reinoil le kaʼanoʼ, baʼaxeʼ chéen le máax ku beetik baʼax u kʼáat in Taata yaan teʼ kaʼanoʼ. 22  Teʼ kʼiin jeʼeloʼ yaʼab máakoʼob ken u yaʼaloʼobten: ‹Yuumtsil, Yuumtsil, ¿maʼ wa profetizarnajoʼon ta kʼaabaʼiʼ? ¿Maʼ wa t-jóoʼsaj demonioʼob yéetel t-beetaj yaʼab uláakʼ nukuch baʼaloʼob* ta kʼaabaʼiʼ?›. 23  Baʼaleʼ teneʼ yaan in waʼaliktiʼob: ¡Junpuliʼ maʼ in kʼaj óoleʼexiʼ! ¡Náachkuntabaʼex tiʼ teen, kʼaakʼas máakeʼex! 24  »Bey túunoʼ, tuláakal máax ku chʼenxikintik yéetel ku beetik le baʼaxoʼob tsʼoʼok in waʼalikaʼ, bey juntúul xiib jach yaan u naʼat tu beetaj u yotoch yóoʼ cháaltuneʼ. 25  Sen kʼáax jaʼ, áalkabnaj le jaʼoʼ, kʼaʼamchaj le iikʼoʼ ka joʼopʼ u jaʼajatsʼaʼal le najoʼ, baʼaleʼ maʼ lúubiʼ tumen yóoʼ cháaltun beetaʼabi. 26  Baʼaleʼ tuláakal máax ku chʼenxikintik le baʼaxoʼob tsʼoʼok in waʼalikaʼ chéen baʼaleʼ maʼ tu beetkeʼ, bey juntúul xiib jach minaʼan u naʼat tu beetaj u yotoch yóoʼ arenaeʼ. 27  Sen kʼáax jaʼ, áalkabnaj le jaʼoʼ, kʼaʼamchaj le iikʼoʼ ka joʼopʼ u jaʼajatsʼaʼal le najoʼ, ka lúubi, bey túun jach tsʼoʼokiktiʼoʼ». 28  Ka tsʼoʼok túun u yaʼalik Jesús le baʼaloʼobaʼ, le yaʼabkach máakoʼoboʼ pʼáat jaajap u chiʼob yoʼolal bix u kaʼansaj, 29  tumen letiʼeʼ ku kaʼanskoʼob kaʼach bey juntúul máak tsʼaʼan autoridad tiʼeʼ, maʼ jeʼex le escribaʼoboʼ.

Tsolajiloʼob

Lelaʼ juntúul tsʼíitsʼik baʼalcheʼ ku kíimsik u yéet baʼalcheʼil; chíikaʼan tiʼ juntúul tsʼíitsʼik peekʼ.
Lelaʼ táan u tʼaan tiʼ le baʼaxoʼob ku beetkoʼoboʼ.
Wa: «yaʼab milagroʼob».