Mateo 22:1-46

22  Ka tʼaanaj Jesús tu kaʼatéeneʼ tu tsikbaltajtiʼob uláakʼ kettʼaanoʼob, táan u yaʼalik:  «U Reinoil kaʼaneʼ bey jeʼex juntúul rey tu beetaj u festejoil u tsʼoʼokol u beel u paaleʼ.  Letiʼeʼ tu túuxtaj u palitsiloʼob ka xiʼikoʼob u tʼan le máaxoʼob u invitartmaj utiaʼal u festejoil le tsʼoʼokol beeloʼ, baʼaleʼ le máakoʼoboʼ maʼ tu yóotoʼob taaliʼ.  Tu kaʼa túuxtaj uláakʼ u palitsiloʼobeʼ, ka tu yaʼalajtiʼob: ‹Aʼaleʼex tiʼ le máaxoʼob in invitartmoʼ: «¡Ileʼex! Tsʼoʼok in beetik janal, tsʼoʼok in kíimsik in waakaxoʼob yéetel le uláakʼ in waalakʼoʼob tin polokkíintoʼoboʼ, tsʼoʼok u listochajal tuláakal. Koʼoteneʼex tu festejoil le tsʼoʼokol beeloʼ»›.  Baʼaleʼ le invitadoʼoboʼ maʼ tu beetoʼob u cuentailiʼ, baʼaxeʼ binoʼob yaanal tuʼux, juntúuleʼ bin tu kool, uláakʼeʼ bin koonol;  baʼaleʼ u maasileʼ, tu machoʼob le palitsiloʼoboʼ, tu poʼopochʼoʼob yéetel tu jaʼajatsʼoʼob tak ka tu kíimsoʼob.  »Le rey túunoʼ jach kʼuuxilnajeʼ ka tu túuxtaj u soldadoʼob utiaʼal u xuʼulsoʼob tiʼ le j-kíimsaj máakoʼobaʼ bey xan utiaʼal u tóokik u kaajaloʼob.  Ka tsʼoʼokeʼ tu yaʼalaj tiʼ u palitsiloʼob: ‹U jaanlil le tsʼoʼokol beeloʼ tsʼoʼok u listochajal, baʼaleʼ le máaxoʼob in invitartmoʼ maʼ u náajaltmaj u taaloʼobiʼ.  Le oʼolaleʼ, xeeneʼex teʼ bejoʼob tu jóokʼbal le kaajoʼ, ka a invitarteʼex utiaʼal u festejoil le tsʼoʼokol beel jeʼel máaxak ka a wileʼexoʼ›. 10  Le palitsiloʼob túunoʼ jóokʼoʼob teʼ bejoʼoboʼ ka tu invitartoʼob le bukaʼaj máakoʼob tu yiloʼoboʼ, yanoʼobeʼ kʼasaʼanoʼob yéetel uláakʼoʼobeʼ utsoʼob; bey túunoʼ le kúuchil tuʼux ku beetaʼal le festejooʼ chuʼup yéetel le máakoʼob kulukbaloʼob yiknal le mesaoʼ. 11  »Ka ook le rey u yil le máaxoʼob invitartaʼaboʼoboʼ, tu yilaj juntúul máak maʼ u búukintmaj u nookʼil le tsʼoʼokol beeloʼ. 12  Ka túun tu yaʼalajtiʼ: ‹Amigo, ¿bix ookikech wa maʼ a búukintmaj u nookʼil le tsʼoʼokol beeloʼ?›. Baʼaleʼ le máakoʼ mix baʼal tu yaʼalaj. 13  Le rey túunoʼ tu yaʼalaj tiʼ le máaxoʼob meyajtikoʼ: ‹Kʼaxeʼex u kʼaboʼob yéetel u yookoʼob ka a jóoʼs a píikchʼinteʼex teʼ táankab tuʼux éeʼjochʼeʼenoʼ. Teʼeloʼ tiʼ kun okʼol yéetel tiʼ ken u karachʼt u kojiʼ›. 14  »Tumen yaʼab máaxoʼob invitartaʼanoʼob, baʼaleʼ chéen junpʼíit le yéeyaʼanoʼoboʼ». 15  Le fariseoʼob túunoʼ, binoʼobeʼ ka tu múuchʼ tukultoʼob bix jeʼel u beetkoʼob u yaʼalik Jesús wa baʼax ka u tsʼáa tuʼux u takikoʼob u pooleʼ. 16  Ka tsʼoʼok túuneʼ tu túuxtoʼob jujuntúul tiʼ le disipuloʼob yaantiʼoboʼ, junmúuchʼ yéetel u j-tsaypachoʼob Herodes, utiaʼal u yaʼalikoʼob tiʼ Jesús: «J-Kaʼansaj, k-ojel ka waʼalik u jaajil yéetel ka kaʼansik u jaajil yoʼolal u bejil Dios, yéetel maʼ ta kaxtik a lúubul utsil tiʼ mix máak, tumen maʼ ta juzgartik máak yoʼolal bix u yilaʼal. 17  Le oʼolaleʼ, aʼaltoʼon, ¿bix a wilik? ¿Maʼalob wa ka boʼotaʼak le nojoch impuesto tiʼ Cesaroʼ, wa maʼ?». 18  Baʼaleʼ Jesuseʼ tumen u yojel kʼasaʼan máakoʼobeʼ tu yaʼalajtiʼob: «¿Baʼaxten ka túuntkeʼex in wóol, j-kaʼapʼéel icheʼex? 19  Eʼeseʼexten le taakʼin ikil u boʼotaʼal le nojoch impuestooʼ». Letiʼobeʼ tu taasoʼob junpʼéel denario* tiʼ. 20  Letiʼ túuneʼ tu kʼáatajtiʼob: «¿Máax ku chíikpajal teʼelaʼ yéetel máax kʼaabaʼ tsʼíibtaʼaniʼ?». 21  Letiʼobeʼ tu yaʼaloʼob: «César». Jesús túuneʼ tu yaʼalajtiʼob: «Jeʼeloʼ, boʼoteʼex tiʼ César le baʼaxoʼob utiaʼal Cesaroʼ, baʼaleʼ tiʼ Dioseʼ boʼoteʼex le baʼaxoʼob utiaʼal Diosoʼ». 22  Ka tu yuʼuboʼob baʼax tu yaʼaleʼ jaʼakʼ u yóoloʼob, ka tu pʼatoʼobeʼ ka binoʼob. 23  Teʼ kʼiin jeʼeloʼ le Saduceoʼob, le máaxoʼob ku yaʼalikoʼob maʼ kun kaʼa kuxkíintbil le kimenoʼoboʼ, náatsʼoʼob tu yiknaleʼ ka tu yaʼaloʼobtiʼ: 24  «J-Kaʼansaj, Moiseseʼ tu yaʼalaj: ‹Wa juntúul xiib ku kíimil táanil tiʼ u yantal u paalal u yataneʼ, u yíitsʼineʼ kʼaʼabéet u tsʼoʼokol u beel tu yéetel utiaʼal ka yanak u chʼiʼibal u sukuʼun›. 25  Ichiloʼon túuneʼ yanchaj siete sukuʼuntsiloʼob; le yáaxoʼ tsʼoʼok u beel, baʼaleʼ kíim táanil tiʼ u yantal u paalal, ka túun tu pʼataj u yatan tiʼ u yáax íitsʼin. 26  Baʼaleʼ bey xan úuchiktiʼoʼ, bey xan tiʼ le u kaʼatúuloʼ, tiʼ le u yóoxtúuloʼ tak tiʼ u maasiloʼoboʼ. 27  Ka tsʼoʼok u láaj kíimloʼobeʼ, kíim xan le koʼoleloʼ. 28  Le ken kaʼa kuxkíintaʼakoʼobeʼ, ¿máakalmáak tiʼ le siete sukuʼuntsiloʼob kun pʼáatal yéetel le koʼolelaʼ? Tumen tuláakloʼob tsʼoʼok u beeloʼob tu yéetel». 29  Jesuseʼ tu núukajtiʼob: «Teʼexeʼ maʼ maʼalob bix a tuukuleʼexiʼ, tumen maʼ a kʼaj óoleʼex le Kiliʼich Tsʼíiboʼoboʼ mix le páajtalil yaan tiʼ Diosoʼ, 30  tumen ken kaʼa kuxkíintaʼak le kimenoʼoboʼ, mix le xiiboʼob, mix le koʼoleloʼob kun tsʼoʼokol u beeloʼoboʼ, baʼaxeʼ yaan u kuxtaloʼob jeʼex le angeloʼob yanoʼob teʼ kaʼanoʼ. 31  Baʼaleʼ wa yoʼolal u kaʼa kuxkíintaʼal le kimenoʼoboʼ, ¿maʼ wa ta xokeʼex le baʼax tu yaʼalaj Dios tiʼ teʼexaʼ: 32  ‹Teen u Dios Abrahán, u Dios Isaak yéetel u Dios Jacob›? Letiʼeʼ maʼ u Dios kimenoʼobiʼ, baʼaxeʼ u Dios máaxoʼob kuxaʼanoʼob». 33  Le yaʼabkach máakoʼoboʼ, ka tu yuʼuboʼob lelaʼ, pʼáat jaajap u chiʼob yoʼolal bix u kaʼansaj. 34  Le fariseoʼoboʼ, ka tu yuʼuboʼob bix maʼakik u chiʼ le saduceoʼob tumen Jesusoʼ, muchʼlajoʼob. 35  Juntúul tiʼ letiʼob jach u yojel baʼax ku yaʼalik le Leyoʼ, tu kʼáataj tiʼ Jesús utiaʼal u túuntik u yóol: 36  «J-Kaʼansaj, ichil le baʼaxoʼob ku yaʼalik le Leyoʼ, ¿máakalmáak u maas nojchil?». 37  Letiʼeʼ tu yaʼalajtiʼ: «‹Kʼaʼabéet a yaabiltik Jéeoba yéetel tuláakal a puksiʼikʼal, tuláakal a kuxtal yéetel tuláakal a tuukul›. 38  Lelaʼ letiʼe u maas nojchiloʼ yéetel letiʼe yáax baʼax ku yaʼalik le Leyoʼ. 39  U kaʼapʼéeleʼ chíikaʼan tiʼ le u yáaxoʼ: ‹Kʼaʼabéet a yaabiltik a wéet máakil jeʼel bix a yaabiltikabaeʼ›. 40  Tiʼ le kaʼapʼéel baʼaloʼobaʼ tiʼ ku jóokʼol tuláakal le Leyoʼ bey xan tuláakal le baʼax kaʼansaʼab tumen le profetaʼoboʼ». 41  Tsʼoʼoleʼ le u muchʼmuba le fariseoʼoboʼ, Jesuseʼ tu kʼáatajtiʼob: 42  «¿Baʼax ka tuklikeʼex yoʼolal le Cristooʼ? ¿Máax paaliʼ?». Letiʼobeʼ tu núukoʼob: «U paal* David». 43  Letiʼeʼ tu yaʼalajtiʼob: «¿Baʼaxten túun Davideʼ, yáanal u nuʼuktaj le kiliʼich muukʼoʼ, tu yaʼalaj Yuumtsil tiʼ Cristo ka tu yaʼalaj: 44  ‹Jéeobaeʼ tu yaʼalaj tiʼ in Yuumtsil: «Kulen tin x-noʼoj kʼab tak ken in tsʼáa máaxoʼob pʼekmilech tu yáanal a wookoʼob»›? 45  Bey túunoʼ, wa David ku yaʼalik Yuumtsil tiʼeʼ, ¿bix túun u páajtal u yaʼalaʼal u paal?». 46  Mix máak páajchaj u yaʼalik mix baʼal tu yoʼolal le baʼax tu kʼáatoʼ. Desde teʼ kʼiin jeʼeloʼ, mix máak táab u beet uláakʼ kʼáatchiʼ tiʼ.

Tsolajiloʼob

Ilaʼak u tsolajil Mt 20:2.
Ilaʼak u tsolajil Mt 1:1.